អ្នក​កាន់ទុក្ខ​អធិដ្ឋាន​ចំពោះ​ជនរងគ្រោះ​នៃ​ការវាយប្រហារ​នៅ​វិហារ​អាមេរិក

អ្នក​កាន់ទុក្ខ​បាន​ប្រារព្ធ​ពិធី​រំឭក​វិញ្ញាណក្ខន្ធ​កាលពី​ថ្ងៃអាទិត្យ​សម្រាប់​ជនរងគ្រោះ​នៃ​ការបាញ់ប្រហារ​នៅ​វិហារ​ក្រុង Pittsburgh ។ ខ្មាន់កាំភ្លើង​ដែល​និយាយថា គាត់ “​ចង់​ឲ្យ​ជនជាតិ​ជ្វី​ហ្វ​ទាំងអស់​ស្លាប់​” បាន​បើក​ការបាញ់ប្រហារ​លើ​មនុស្ស​មួយក្រុម​ដែល​ភាគច្រើន​មាន​វ័យ​ចំណាស់​។​
​
អាមេរិក​បានដឹង​ពី​អត្តសញ្ញាណ​នៃ​មនុស្ស​ទាំង​១១​នាក់​ដែល​ត្រូវបាន​សម្លាប់​នៅក្នុង​ការវាយប្រហារ​ដ៏​សាហាវព្រៃផ្សៃ​នៅឯ​វិហារ Tree of Life​។​
​
សាល Soldiers and Sailors Memorial Hall and Museum របស់​ទីក្រុង Pittsburgh គឺជា​កន្លែង​នៃ​ការ​អធិដ្ឋាន​រយៈពេល​៩០​នាទី​ដែល​ចាប់ផ្តើម​ជាមួយ​ការប្រគុំ​តន្ត្រី​មក​ក្រុម​អាមេរិក​-​អាហ្វ្រិក​។​
​អ្នក​និយាយបាន​ប្រកាសថា មនុស្ស​រាប់ពាន់នាក់​ទៀ​ត​បាន​ប្រមូល​ផ្ដុំគ្នា​ក្រោម​ភ្លៀង​ធ្លាក់​ដ៍​ត្រជាក់​នៅ​ខាងក្រៅ​ដោយ​ស្តាប់​តាមរយៈ​ឧបករណ៍​បំពង​សំឡេង​។​
​
បព្វជិត​ស្រី​ម្នាក់​បាន​ដឹកនាំ​ការ​ច្រៀង​ចម្រៀង​ជាតិ​ហើយ​អ្នក​ច្រៀង​ភេទ​ប្រុស​បាន​អាន Hatikvah ដែលជា​កំណាព្យ​ជ្វី​ហ្វ​និង​ជា​ចម្រៀង​ជាតិ​អ៊ីស្រាអែល​។​
​
លោក Rabbi Jeffrey Myers បាន​និយាយថា “​ពាក្យ​នៃ​ការ​ស្អប់​មិន​ត្រូវបាន​ស្វាគមន៍​ក្នុង​ទីក្រុង Pittsburgh ទេ​”​។ លោក​បន្តថា “​សុភាពបុរស សុភាពនារី​ទាំងឡាយ វា​ត្រូវតែ​ចាប់ផ្តើម​ជាមួយ​អ្នក ជាមួយ​មេដឹកនាំ​របស់​យើង​។ ឈប់​និយាយ​ពាក្យ​ស្អប់​”​។​
​
លោក Rabbi ដែល​បាន​ជួយ​ទាញ​មនុស្ស​ចេញពី​វិហារ​បន្ទាប់ពី​ការវាយប្រហារ​នោះបាន​ស្រែក​ពាក្យ​អធិស្ឋាន​ជា​ភាសា Hebrew ហើយ​ជូត​ទឹកភ្នែក​របស់គាត់​ដោយ​កន្សែងដៃ​។​
​
ព្រឹត្តិការណ៍​ស្រដៀង​គ្នា​នេះ​បានធ្វើ​ឡើង​នៅ​ទូទាំងប្រទេស​ដោយ​ពាក្យ​នៃ​ការ​លួងលោម​បាន​ចេញពី​សហគមន៍​ជ្វី​ហ្វ​របស់​អាមេរិក​ដែលជា​សហគមន៍​ធំ​បំផុត​នៅ​ខាងក្រៅ​ប្រទេស​អ៊ីស្រាអែល​ក៏ដូចជា​សម្តេច​ប៉ាប​និង​មេដឹកនាំ​អ៊ឺរ៉ុប​ផងដែរ​។​
​
មន្ត្រី​សហព័ន្ធ​បាន​និយាយ​កាលពី​ថ្ងៃអាទិត្យ​ថា ជនសង្ស័យ​អាយុ​៤៦​ឆ្នាំ​ម្នាក់​ឈ្មោះ Robert Bowers ដែល​ត្រូវបាន​ចាប់ខ្លួន​នៅ​វិហារ​បន្ទាប់ពី​ការបាញ់ប្រហារ​ជាមួយ​ប៉ូលិស​គឺ​ត្រូវ​ប្រឈម​នឹង​បទចោទប្រកាន់​ចំនួន​២៩​ករណី​ដែលមាន​ខ្លះ​ជា​ទោស​ប្រហារជីវិត​។​
​
គាត់​ត្រូវបាន​បញ្ជូនទៅ​មន្ទីរពេទ្យ​ជាមួយ​របួស​គ្រាប់កាំភ្លើង​ច្រើន​កន្លែង​ប៉ុន្តែ​នឹង​បង្ហាញខ្លួន​នៅមុខ​ចៅក្រម​សហព័ន្ធ​នៅ​ថ្ងៃ​ចន្ទ​៕ AFP

​

Source: Kampuchea Thmey Daily