ភ្នំពេញ ៖ អ្នកនាំពាក្យគណបក្សប្រជាជនកម្ពុជា ដែលកំពុងដឹកនាំរាជរដ្ឋាភិបាលបានអះអាងថា គ្រាន់តែអ្នករាយការណ៍ អសប មកដល់កម្ពុជា មានមន្ត្រីអង្គការសង្គមស៊ីវិលមួយចំនួនបានប្រញាប់ទៅរាយការណ៍ភ្លាម ទាក់ទងសកម្មភាពអ្វី ដែលក្រុមសង្គមស៊ីវិលទាំងនោះ គិតថា ជារឿងអយុត្តិធម៌ ជាពិសេសទាក់ទងសកម្មភាពរបស់សមត្ថកិច្ច ដែលទៅក្បែរទីតាំងរបស់សង្គមស៊ីវិល ដែលកំពុងរៀបចំកម្មវិធីផ្សេងៗ និងបានអះអាងថា បើមិនមានកំហុស អង្គការសង្គមស៊ីវិល មិនគួរខ្លាចសមត្ថកិច្ចដូចចោរនោះទេ។
លោក សុខ ឥសាន អះអាងបែបនេះ បន្ទាប់ពីក្រុមអង្គការសង្គមស៊ីវិលមួយចំនួនបានលើកឡើងនៅក្នុងជំនួបជាមួយអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អ្នកស្រី រ៉ូណា ស្ម៊ីត (Rhona Smith) កាលពីថ្ងៃទី៣០ ខែតុលា អំពីបញ្ហាមួយ ទាក់ទងបញ្ហាសេរីភាពនៃការជួបប្រជុំ សេរីភាពសហគមន៍ និងសេរីភាពបញ្ចេញមតិជាដើម ដោយបានអះអាងថា ត្រូវបានគំរាមកំហែងដោយប្រព័ន្ធតុលាការ ហើយសូម្បីតែនៅទីតាំងដែលមានការរៀបចំសិក្ខាសាលា ឬជួបជុំផ្សេងៗ ក៏មានការតាមដានពីសំណាក់អាជ្ញាធរ មានសមត្ថកិច្ចផងដែរ។
ទាក់ទងបញ្ហានេះ លោក សុខ ឥសាន លើកឡើងថា នៅពេលលោកស្រីរ៉ូណា ស្មីត មកដល់កម្ពុជាមិនទាន់បានស្រួលជើងផង មានមន្ត្រីអង្គការសង្គមស៊ីវិលមួយចំនួនបានប្រញាប់ទៅ ទូលពិតលោកស្រីភ្លាម។ ពួកគេបានលើកឡើងថា សិទ្ធិសេរីភាពជាមូលដ្ឋានកំពុងត្រូវប្រឈម នឹងការរឹតត្បិត ដោយសារនៅពេលអង្គការសង្គមស៊ីវិលប្រជុំម្តងៗ គេតែងតែដាក់ភ្នាក់ងារយកការណ៍ ឬក៏ត្រូវបានមន្ត្រីសមត្ថកិច្ចចុះឃ្លាំមើលនៅក្នុងមូលដ្ឋាន ដែលធ្វើឲ្យប៉ះពាល់សតិអារម្មណ៍អ្នកចូលរួម។
តាមលោក សុខ ឥសាន ជាការគួរឲ្យចង់សើចណាស់ ដែលធ្វើដល់មន្ត្រីអង្គការសង្គមស៊ីវិលហើយមិនយល់ដឹងពីអ្វីទៅហៅថា សិទ្ធិមនុស្ស មិនយល់ដឹងពីតួនាទីរបស់សមត្ថកិច្ច ដែលតែងតែជួយការពារសន្តិសុខ សុវត្ថិភាព ជូនប្រជាជនទូទៅ ហើយបើសិនជាមានបាតុភាពមិនប្រក្រតីណាមួយកើតឡើងនៅពេលប្រជុំនោះ សមត្ថកិច្ចនៅមូលដ្ឋាន គឺជាអ្នកទទួលខុសត្រូវ ហើយបើជាមនុស្សត្រឹមត្រូវ មិនគួរខ្លាចសមត្ថកិច្ច ដូចចោរលួចចោរប្លន់ទេ។
លោកបញ្ជាក់ថា វត្តមានរបស់សមត្ថកិច្ច មិនមែនជាការគាបសង្កត់សិទ្ធិមនុស្ស ឬជាការគំរាមកំហែងណាមួយឡើយ។
សូមបញ្ជាក់ថា កាលពីថ្ងៃទី៣០ ខែតុលា ឆ្នាំ២០១៨ អ្នកស្រី រ៉ូណា ស្ម៊ីត (Rhona Smith) អ្នករាយការណ៍ពិសេសអង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា បានជួបជជែកទ្វេភាគីជាមួយនាយកប្រតិបត្តិអង្គការតម្លាភាពកម្ពុជា និងក្រុមអង្គការសង្គមស៊ីវិលមួយចំនួន។
នៅក្នុងជំនួបជាមួយអង្គការតម្លាភាពកម្ពុជា បានផ្តោតសំខាន់លើប្រធានបទគោលដៅអភិវឌ្ឍន៍ប្រកបដោយចីរភាព (SDGs) ដែលពាក់ព័ន្ធនឹងបញ្ហាសំខាន់ៗមួយចំនួនរបស់កម្ពុជា ដូចជា ការប្រឆាំងអំពើពុករលួយ បញ្ហាសិទ្ធិមនុស្សបញ្ហាអយុត្តិធម៌សង្គម ការពង្រឹងសមត្ថភាព និងគណនេយ្យភាពនៅតាមស្ថាប័នជាតិជាដើម។
ចំណែកនៅក្នុងជំនួនជាមួយក្រុមអង្គការសង្គមសស៊ីវិល ក្រុមមន្ត្រីអង្គការអាដហុក បានប្រាប់លោកស្រី រ៉ូណា ស្មីត ថា បច្ចុប្បន្នសេរីភាពជាមូលដ្ឋាន ដូចជាសេរីភាពនៃការជួបប្រជុំ សេរីភាពសហគមន៍ និងសេរីភាពបញ្ចេញមតិ ត្រូវបានគំរាមកំហែងដោយប្រព័ន្ធតុលាការ។ ជាពិសេសមន្ត្រី និងអតីតមន្ត្រីអាដហុក៥នាក់ ដែលតុលាការបង្គាប់ឲ្យឃុំខ្លួនជាង១៤ខែ១ថ្ងៃមកនោះ ពេលនេះពួកគេនៅជាប់ទោសព្យួរនៅឡើយ ហើយសូម្បីតែកន្លែងឯកជន ដែលមានការរៀបចំសិក្ខាសាលាជួបជុំផ្សេងៗ ក៏មានការតាមដានពីសំណាក់អាជ្ញាធរ មានមន្ត្រីប៉ូលិសជាដើម ដែលទាំងអស់នេះជាបញ្ហា៕
Source: Kampuchea Thmey Daily
0 Comments