ភ្នំពេញ ៖ ក្រសួងធនធានទឹក និងឧតុនិយម បានប្រកាសថា ខេត្តចំនួន ៥ រួមមាន ខេត្តព្រះវិហារ ឧត្តរមានជ័យ ស្ទឹងត្រែង មណ្ឌលគិរី និងរតនគិរី អាចនឹងចុះត្រជាក់ដល់ ១៩ អង្សាសេចាប់ពីថ្ងៃទី០១ ដល់ ០៧ ខែវិច្ឆិកា ឆ្នាំ២០១៨។
សេចក្តីប្រកាស បង្ហាញថា សីតុណ្ហភាពអប្បបរមា នៅតាមបណ្តាខេត្តនៅតំបន់ព្រៃភ្នំ ទាំង ៥ ខាងលើនេះ មានចន្លោះពី ១៩ ដល់ ២១ អង្សាសេ ខណៈដែលសីតុណ្ហភាពអតិបរមា មានចន្លោះចាប់ពី ២៩ ដល់ ៣១ អង្សាសេ។
ដោយឡែក នៅតាមបណ្តាខេត្តដទៃទៀត នៅទូទាំងប្រទេស ក៏ត្រូវបានក្រសួងធនធានទឹក និងឧតុនិយម បានប្រកាសថា នឹងអាចមានសីតុណ្ហភាពអប្បបរមាចន្លោះ ពី ២៣ ដល់ ២៥ អង្សាសេ និងអតិបរមា ចន្លោះពី ៣០ ទៅ ៣២ អង្សាសេ។
ក្រសួងធនធានទឹក និងឧតុនិយម បានប្រកាសថា ស្ថានភាពអាកាសធាតុចុះត្រជាក់បែបនេះ គឺបណ្តាលមកពីខ្យល់មូសុងឦសាន ចាប់ផ្តើមមានឥទ្ធិពល មកលើកម្ពុជា។ ក្នុងនោះ នៅតាមបណ្តាខេត្តមួយចំនួន ពិសេសនៅភ្នំពេញ បានចាប់ផ្តើមចុះត្រជាក់ ធ្លាក់ខ្យល់ នាពេលព្រឹកៗ ចាប់តាំងពីថ្ងៃអាទិត្យ ទី២៨ ខែតុលា ឆ្នាំ២០១៨។
លោកចាន់យុត្ថា អ្នកនាំពាក្យនិងជារដ្ឋលេខាធិការក្រសួងធនធានទឹកនិងឧតុនិយមបានប្រាប់ឲ្យដឹងនៅថ្ងៃទី៣១ ខែតុលា ឆ្នាំ២០១៨ ថា សីតុណ្ហភាពចូលដល់ដើមខែវិច្ឆិកានេះ ចាប់ផ្តើមចុះត្រជាក់ ហើយដោយចុះទាបជាងពេលមុននេះជាមធ្យម៣អង្សាសេ(ពី៣ទៅ៥អង្សាសេ)។ នៅតំបន់ភ្នំសីតុណ្ហភាពអប្បបរមាអាចចុះដល់១៩អង្សាសេក្នុងរយៈពេលពីរបីថ្ងៃ រួចក៏កើនឡើងវិញនិងមានភ្លៀងធ្លាក់តិចតួចនៅតំបន់ទំនាបភាគខាងត្បូង៕
Source: Kampuchea Thmey Daily
0 Comments