ក្រសួងកសិកម្ម​និង​អង្គការ FAO​បើក​សិក្ខាសាលា​ស្តី​ពី​ការពិគ្រោះ​យោបល់​នៃ​ការវាយតម្លៃ​លើ​ការ​រួម​ចំណែក​របស់​អង្គការ​ស្បៀង

ភ្នំពេញ​ ៖ លោក វេ​ង សាខុន រដ្ឋមន្ត្រី​ក្រសួងកសិកម្ម រុក្ខា​ប្រមាញ់​និង​នេសាទ នា​ព្រឹក​ថ្ងៃ​ពុធ ៧​រោច ខែអស្សុជ ឆ្នាំច សំរឹទ្ធិស័ក ព​.​ស ២៥៦២ ត្រូវ​នឹង​ថ្ងៃ​ទី​៣១ ខែតុលា ឆ្នាំ​២០១៨ បាន​អញ្ជើញ​ជា​អធិបតី​ក្នុង​ពិធី​បើក​សិក្ខាសាលា​ស្តីពី​ការពិគ្រោះ​យោបល់​នៃ​ការវាយតម្លៃ​លើ​ការរួមចំណែក​របស់​អង្គការ​ស្បៀង និង​កសិកម្ម​នៃ​សហប្រជាជាតិ (FAO) នៅ​ព្រះរាជាណាចក្រ​កម្ពុជា​។



ក្រសួង​បាន​ឲ្យ​ដឹងថា សិក្ខាសាលា​នេះ​សហការ​រៀបចំ​និង​ឧបត្ថម្ភ​ដោយ​អគ្គនាយកដ្ឋាន​កសិកម្ម និង​អង្គការ FAO ដោយមាន​ការ​អញ្ជើញ​ចូលរួម​ពី ថ្នាក់ដឹកនាំ​ក្រសួង លោក Masahiro Igarashi នាយក​ទទួលបន្ទុក​ការងារ​វាយតម្លៃ​នៃ​អង្គការ FAO ប្រចាំ​ទីក្រុង​រ៉ូម លោក Alexandre Huynh តំណាង​អង្គការ FAO ប្រចាំ​កម្ពុជា ស្ថាប័នរដ្ឋ​ពាក់ព័ន្ធ អង្គការក្រៅរដ្ឋាភិបាល ដៃគូ​អភិវឌ្ឍ វិស័យ​ឯកជន សហគមន៍​កសិកម្ម ភ្ញៀវកិត្តិយស​ជាតិ​និង​អន្តរជាតិ​យ៉ាងច្រើន​កុះករ​។



ឆ្លៀត​ក្នុង​ឱកាស​នេះ លោក រដ្ឋមន្ត្រី​បាន​សម្តែង​នូវ​កិច្ច​ស្វាគមន៍​ចំពោះ​វត្តមាន​របស់​សមាជិក សមាជិកា​នៃ​អង្គសិក្ខា​សាលា​ដែល​បាន​ឆ្លៀតឱកាស​ដ៏​មានតម្លៃ​អញ្ជើញ​ចូលរួម​ក្នុង​ព្រឹត្តិការណ៍​ដ៏​មាន​សារៈសំខាន់​នា​ថ្ងៃនេះ​។ សិក្ខាសាលា​នេះ​មាន​គោលបំណង​ធ្វើការ​សិក្សា វាយតម្លៃ​លើ​ទិដ្ឋភាព​រួម​ពាក់ព័ន្ធ​នៅ​កម្រិត​យុទ្ធសាស្ត្រ​នៃ​កិច្ច​អន្តរាគមន៍​របស់​អង្គការ FAO ក្នុងការ​ឆ្លើយតប​ទៅ​នឹង​ផែនការ​យុទ្ធសាស្ត្រ​អភិវឌ្ឍន៍​វិស័យ​កសិកម្ម ព្រមទាំង​កំណត់​មេរៀន​ដែល​ទទួលបាន​ក៏ដូចជា​កត្តា​អំណោយផល កត្តា​ដែល​នាំ​ឲ្យ​រាំងស្ទះ​ដល់​ការសម្រេច​លទ្ធផល និង​កំណត់​យក​ចំណុច​ខ្វះខាត​ក្នុងការ​អនុវត្ត​កម្មវិធី​ក្នុង​វិស័យ​កសិកម្ម​ដែល​មាន​សក្តានុពល​សម្រាប់​អនុវត្ត​ការងារ​បន្ត​ឲ្យ​ទទួល​បាន​ជោគជ័យ​។



ជាង​នេះ​ទៅ​ទៀត​គឺ​ដើម្បី​ដកស្រង់​នូវ​បទពិសោធន៍​ល្អៗ និង​រិះរក​នូវ​គំនិត​ច្នៃប្រឌិត​ថ្មីៗ​បន្ថែម​ទៀត ដើម្បី​ចូលរួម​វាយតម្លៃ​ពី​គុណសម្បត្តិ គុណវិបត្តិ ចំណុចខ្លាំង ចំណុចខ្សោយ បញ្ហា​ប្រឈម​នានា និង​បទពិសោធន៍ ឬ​មេរៀន​ល្អៗ​ដែល​យើង​ទទួល​បាន​ពី​ការអនុវត្ត​គម្រោង​កម្មវិធី​របស់ FAO នៅ​កម្ពុជា​នា​ពេល​កន្លងមក រួច​ដាក់​ចេញ​នូវ​ផែនការ​យុទ្ធសាស្ត្រ​អនុវត្ត​បន្ត​ធ្វើ​យ៉ាងណា​ឲ្យ​គម្រោង​ផ្សេងៗ​ទៀត​ទទួល​បាន​ជោគជ័យ​តាម​គោលដៅ​រំពឹងទុក​។



លោក រដ្ឋមន្ត្រី​បាន​បញ្ជាក់​ថា ​ការរៀបចំ​សិក្ខាសាលា​នា​ពេល​នេះ គឺ​ស្រប​ពេល​ដែល​ក្រសួង​បាននឹងកំពុង​រៀបចំ​ផែនការ​យុទ្ធសាស្ត្រ​អភិវឌ្ឍន៍​វិស័យ​កសិកម្ម​ឆ្នាំ​២០១៩-២០២៣ ដោយ​តម្រង់​ទិស​ឆ្ពោះទៅ​រក​ការ​លើកកម្ពស់ និង​ជំរុញ​ការ​អភិវឌ្ឍ​វិស័យ​កសិកម្ម​ប្រកបដោយ​ភាព​វៃឆ្លាត ដើម្បី​ធានា​សន្តិសុខ​ស្បៀង និង​អាហារូបត្ថម្ភ ការកាត់បន្ថយ​ភាព​ក្រីក្រ ជំរុញ​ការអនុវត្ត​កសិកម្ម​ប្រកបដោយ​ស្ថិរភាព និង​មាន​ភាព​ធន់​ទ្រាំ​នឹង​ការប្រែប្រួល​អាកាសធាតុ​។

​តាមរយៈ​របាយការណ៍​របស់​ក្រុមការងារ​វាយតម្លៃ​នៃ​អង្គការ FAO រាល់​អនុសាសន៍​ទាំងឡាយ​ដែល​បានលើកឡើង និង​ចំណាប់អារម្មណ៍​របស់លោក​នាយក Masihiro Igarashi គឺ​ពិត​ជា​មាន​សារៈសំខាន់​និង​ឆ្លុះបញ្ចាំង​ពី​សភាពការណ៍​ជាក់ស្តែង ស្របតាម​គោលនយោបាយ​របស់​រាជរដ្ឋាភិបាល ជាពិសេស​ផែនការ​យុទ្ធសាស្ត្រ​អភិវឌ្ឍ​វិស័យ​កសិកម្ម​របស់​ក្រសួង​សម្រាប់​រយៈពេល​៥​ឆ្នាំ​ខាងមុខ​។ ដូច្នេះ ក្នុងនាម​ក្រសួង លោក​រដ្ឋមន្ត្រី​បាន​គាំទ្រ​ដល់​អនុសាសន៍​ទាំងនោះ និង​សូម​ស្នើ​ឲ្យ​អង្គការ​នេះ​បន្ត​យក​អនុសាសន៍​ទាំងនោះ​ទៅ​ដាក់បញ្ចូល​នៅក្នុង​ផែនការ​យុទ្ធសាស្ត្រ​របស់ខ្លួន​ក្នុង​រយៈពេល​៥​ឆ្នាំ​ខាងមុខ៕

Source: Kampuchea Thmey Daily