ភ្នំពេញ ៖ មន្ត្រីជាន់ខ្ពស់នៃអាជ្ញាធរជាតិប្រយុទ្ធប្រឆាំងគ្រឿងញៀនបានឲ្យដឹងថា ខ្លួននឹងបង្កើនវិធានការត្រួតពិនិត្យយ៉ាងតឹងរ៉ឹងដើម្បីទប់ស្កាត់ការធ្វើចរាចរណ៍គ្រឿងញៀននៅតាមតំបន់ព្រំដែនសំដៅបង្កើនប្រសិទ្ធភាពក្នុងការទប់ស្កាត់ការរត់ពន្ធគ្រឿងញៀនឆ្លងដែនខុសច្បាប់ចូលមកក្នុងប្រទេសកម្ពុជា។
ថ្លែងប្រាប់អ្នកសារព័ត៌មានក្រោយបញ្ចប់កិច្ចប្រជុំអាជ្ញាធរជាតិប្រយុទ្ធ ប្រឆាំងគ្រឿងញៀនកាលពីព្រឹកថ្ងៃទី៣១ ខែតុលា ឆ្នាំ២០១៨ នាយឧត្តមសេនីយ៍កែ គឹមយាន ឧបនាយករដ្ឋមន្ត្រីនិងជាប្រធានអាជ្ញាធរជាតិប្រយុទ្ធ ប្រឆាំងគ្រឿងញៀនបានមានប្រសាសន៍ថា ការពង្រឹងវិធានការបង្ក្រាបបទល្មើសគ្រឿងញៀនតាមព្រំដែននេះដោយសារតែបញ្ហាការចរាចរណ៍គ្រឿងញៀនពីបណ្តាប្រទេសជិតខាងដូចជា ប្រទេសថៃ ឡាវ និងប្រទេសវៀតណាមចូលមកកម្ពុជា នៅតែមានសកម្មភាពសកម្ម ពិសេសច្រកផ្លូវគោកនៃ បណ្តាខេត្តនៅភាគឦសាន។
លោកឧបនាយករដ្ឋមន្ត្រី កែ គឹមយានបានបន្តថា កម្ពុជាពុំមែនជាប្រទេសផលិតគ្រឿងញៀនទេ ប៉ុន្តែវាបានហូរចូលពីបណ្តាច្រក ព្រំដែននៃប្រទេសជិតខាងដែលទាមទារឲ្យមានការរឹតបណ្តឹងការត្រួតពិនិត្យទប់ស្កាត់ឲ្យ បានខ្លាំងក្លា។
លោកបានបន្ថែមថា ការងារទប់ស្កាត់គ្រឿងញៀននេះក្រុមសមត្ថភាពពាក់ព័ន្ធនឹងចូលរួមសកម្មបន្ថែមទៀតក្នុង ប្រតិបត្តិការត្រួតពិនិត្យគ្រឿងញៀនជាមួយបណ្តាប្រទេសជាប់ព្រំដែន តាមរយៈការផ្លាស់ប្តូរ ព័ត៌មានទៅវិញទៅមកពីបទល្មើសគ្រឿងញៀន និងការសិក្សាពីរូបភាពថ្មីៗរបស់ជនល្មើស ដែលធ្វើសកម្មភាពជួញដូរគ្រឿងញៀនដែនខុសច្បាប់។
លោកបានបញ្ជាក់ថា ដើម្បីឈានទៅទប់ស្កាត់បានទាន់ពេលវេលានចំពោះករណី ជួញដូរគ្រឿងញៀនឆ្លងដែនខុសច្បាប់ អាជ្ញាធរជាតិគ្រឿងញៀន បានបង្កើតភូមិសគ្មានគ្រឿង ញៀននៅតាមព្រំដែនកម្ពុជា -ថៃ និង កម្ពុជា-ឡាវ នឹងឈានទៅបង្កើតបន្ថែមទៀតនៅតំបន់ ព្រំដែនកម្ពុជា-វៀតណាម ព្រមទាំងពង្រីកការិយាល័យទំនាក់ទំនងព្រំដែននៅតំបន់ដែល ទទួលការគំរាមកំហែងដោយគ្រឿងញៀន។
នាយឧត្តមសេនីយ មាស វីរិទ្ធ អគ្គលេខាធិការជាតិប្រយុទ្ធប្រឆាំងគ្រឿងញៀនបានឲ្យដឹងថា ជាមួយគ្នានេះដែរ អាជ្ញាធរគ្រឿងញៀនបានសម្រេចបង្កើតក្រុមការងារត្រួតពិនិត្យតាមព្រលាននិង កំពង់ផែអន្តរជាតិផ្សេងទៀតដើម្បីទប់ស្កាត់បញ្ហាគ្រឿងញៀនកុំឲ្យជ្រៀតចូលក្នុងសង្គមកម្ពុជាទាំងច្រកផ្លូវអាកាស ផ្លូវទឹក និងច្រកផ្លូវគោកតាមព្រំដែនជាដើម។
ចំណែកនាយឧត្តមសេនីយ៍ម៉ក់ ជីតូ អគ្គស្នងការរងនគរបាលជាតិនៃក្រសួងមហាផ្ទៃបានឲ្យដឹងថា ក្រុមសមត្ថកិច្ចជំនាញកំពុងបង្កើនប្រសិទ្ធភាពក្នុងការបោសសំអាតសំបុកចែកចាយគ្រឿង ញៀនខុសច្បាប់នានានៅក្នុងប្រទេស ដោយអនុវត្តសកម្មភាពព្រមៗគ្នាដើម្បីធានាឲ្យសង្គមកម្ពុជាគ្មានបញ្ហាគ្រឿងញៀនតទៀត។
សូមបញ្ជាក់ថា ក្នុងរយៈពេល៩ខែឆ្នាំ២០១៨នេះក្រុមសមត្ថកិច្ចបានបង្ក្រាបបទល្មើសគ្រឿង ញៀននៅទូទាំងប្រទេសបានរហូតដល់ជិត៦ពាន់ករណីគឺថយចុះជាង១០០០ករណីបើធៀប នឹងរយៈពេលដូចគ្នាកាលពីឆ្នាំទៅ រួមជាមួយនឹងឃាត់ខ្លួនជនសង្ស័យបានចំនួនជាង១ម៉ឺននាក់ ថ្នាំញៀនជាង៥០០គីឡូក្រាម៕
Source: Kampuchea Thmey Daily
0 Comments