ភ្នំពេញ ៖ ការិយាល័យអ្នកនាំពាក្យរាជរដ្ឋាភិបាលកម្ពុជាបានចេញសេចក្តីថ្លែងការណ៍មួយកាលពីថ្ងៃទី៣០ ខែតុលា ឆ្នាំ២០១៨ ដោយអះអាងថា ដំណើរទស្សនកិច្ចរបស់លោកស្រី រ៉ូណា ស្មីត អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា គឺជាការងារបច្ចេកទេសសុទ្ធសាធ ដែលធ្វើឡើងក្នុងនាមជាដៃគូរាជរដ្ឋាភិបាល ដើម្បីជំរុញវិស័យសិទ្ធិមនុស្ស ឲ្យទទួលបានផ្លែផ្កា។
សេចក្តីថ្លែងការណ៍របស់ការិយាល័យអ្នកនាំពាក្យរាជរដ្ឋាភិបាលកម្ពុជានេះធ្វើឡើង បន្ទាប់ពីមានបណ្តាញសារព័ត៌មានជាច្រើន បានចាប់អារម្មណ៍ចំពោះដំណើរទស្សនកិច្ចរបស់លោកស្រី រ៉ូណា ស្មីត មកកាន់ប្រទេសកម្ពុជាជាថ្មីទៀតរយៈពេល១១ថ្ងៃ ហើយទស្សនកិច្ចនេះ ធ្វើឡើងតាមការអញ្ជើញរបស់រាជរដ្ឋាភិបាលកម្ពុជា។
លោក ផៃ ស៊ីផាន បានលើកឡើងថា អាស្រ័យដោយកិច្ចខិតខំប្រឹងប្រែងរបស់រាជរដ្ឋាភិបាល ជាមួយនឹងការយកចិត្តទុកដាក់ខ្ពស់លើបញ្ហាសិទ្ធិមនុស្សនោះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អាណត្តិទី៦ បានចុះអនុសារណៈរវាងរាជរដ្ឋាភិបាលកម្ពុជា និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ដើម្បីអនុវត្តកម្មវិធីកិច្ចសហប្រតិបត្តិការបច្ចេកទេស ស្ដីពីបញ្ហាសិទ្ធិមនុស្សនៅកម្ពុជា។
តាមលោក ផៃ ស៊ីផាន “លោកស្រី រ៉ូណា ស្មីត (Rhona Smith) អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ដែលជាមន្ត្រីរបស់អង្គការសហប្រជាជាតិ ស្ថិតនៅក្នុងការងារបច្ចេកទេសសុទ្ធសាធ ដែលមានកាតព្វកិច្ច និងសមត្ថកិច្ច ជាដៃគូជាមួយរាជរដ្ឋាភិបាល ក្នុងកិច្ចជំរុញវិស័យនេះ ឲ្យទទួលបានផ្លែផ្កាវិជ្ជមាន ដោយគ្មានប្រទូសរ៉ាយ ជាមួយអធិបតេយ្យកម្ពុជា ក្រៅពីការងារប្រកបដោយកិត្តិយសចំពោះមុខ រាជរដ្ឋាភិបាលកម្ពុជា ដែលជារដ្ឋសមាជិកពេញសិទ្ធិរបស់អង្គការសហប្រជាជាតិ ក៏ដូចជាផលប្រយោជន៍ប្រជាពលរដ្ឋកម្ពុជា ក្នុងការចូលរួមក្នុងកិច្ចបន្តការរស់នៅក្នុងភាពក្សេមក្សាន្ត សន្តិភាព ស្ថិរភាព និងវិបុលភាព ដោយគ្មានការរំលោភក្នុងរូបភាពណាមួយ នៃសេចក្តីថ្លៃថ្នូររបស់ជាតិខ្មែរ។
សូមបញ្ជាក់ថា អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា លោកស្រី រ៉ូណា ស្មីត (Rhona Smith) បានមកដល់ប្រទេសកម្ពុជាកាលពីថ្ងៃអាទិត្យ ទី២៨ ខែតុលា ឆ្នាំ២០១៨ ដើម្បីបំពេញទស្សនកិច្ចនៅកម្ពុជារយៈពេល១១ថ្ងៃ ចាប់ពីថ្ងៃទី២៩ ខែតុលា ដល់ថ្ងៃទី៨ ខែវិច្ឆិកា ឆ្នាំ២០១៨ តាមការអញ្ជើញរបស់រាជរដ្ឋាភិបាល។ នៅក្នុងអំឡុងទស្សនកិច្ចរយៈពេល១១ថ្ងៃនេះ អ្នកជំនាញរូបនេះ គ្រោងជួបប្រជុំជាមួយមន្ត្រីជាន់ខ្ពស់របស់រាជរដ្ឋាភិបាលតំណាងសង្គមស៊ីវិល និងសមាជិកសហគមន៍ការទូតនានា។
អ្នករាយការណ៍ពិសេស អ.ស.ប បំពេញទស្សនបំពេញបេសកកម្មផ្លូវការជាទៀងទាត់មកកាន់ប្រទេសកម្ពុជា និងធ្វើរបាយការណ៍ប្រចាំឆ្នាំទៅក្រុមប្រឹក្សាសិទ្ធិមនុស្ស ដែលក្រុមប្រឹក្សានេះបានតែងតាំងលោកស្រីនៅក្នុងខែមីនា ឆ្នាំ២០១៥។ លោកស្រីនឹងបង្ហាញរបាយការណ៍បន្ទាប់របស់លោកស្រីទៅក្រុមប្រឹក្សាសិទ្ធិមនុស្សក្នុងខែកញ្ញា ឆ្នាំ២០១៨ ហើយមុននឹងបញ្ចប់ដំណើរទស្សនកិច្ចរបស់ខ្លួន លោកស្រីនឹងមានសន្និសីទសារព័ត៌មានមួយ ដើម្បីពិភាក្សាអំពីរបកគំហើញបឋម នៃដំណើរទស្សនកិច្ចរបស់លោកស្រី ដែលសន្និសីទនេះនឹងប្រព្រឹត្តទៅនៅថ្ងៃព្រហស្បតិ៍ ទី៨ ខែវិច្ឆិកា ឆ្នាំ២០១៨ នៅវេលាម៉ោង៣ រសៀល ម៉ោងនៅក្នុងប្រទេសកម្ពុជា នៅការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ដែលមានអាស័យដ្ឋានអគារលេខ៤ ផ្លូវ២៧១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ៕
Source: Kampuchea Thmey Daily
0 Comments