ម៉ិកស៊ិក ​ផ្តល់​ផែនការ​ដើម្បី​រក្សា​ជនអន្តោប្រវេសន៍​មិន​ឲ្យ​ទៅ​សហរដ្ឋអាមេរិក

ប្រទេស​ម៉ិ​ក​ស៊ិ​ក​កាលពី​ថ្ងៃ​សុក្រ ​បានផ្តល់​ឯកសារ​អត្តសញ្ញាណ​បណ្ដោះអាសន្ន ​និង​ការងារ​ដល់​ជនអន្តោប្រវេសន៍​ដែល​បាន​ចុះឈ្មោះ​សុំ​សិទ្ធិ​ជ្រកកោន​នៅក្នុង​ប្រទេស​ ដែល​នេះ​ជា​ការ​បង្កើន​កិច្ច​ខិតខំ​ប្រឹងប្រែង​ដើម្បី​បញ្ឈប់​ការ​ធ្វើ​ដំណើរ​ជា​ក្បួន​របស់​ជនជាតិ​អាមេរិក​កណ្តាល​ឆ្ពោះ​ទៅ​កាន់​សហរដ្ឋអាមេរិក។

ប្រធានាធិបតី​សហរដ្ឋអាមេរិក​លោក Donald Trump បាន​គំរាម​បិទ​ព្រំដែន​អាមេរិក​-​ម៉ិ​ក​ស៊ិ​ក​និង​កាត់​ជំនួយ​ទៅ​ប្រទេស​នៅ​តំបន់​អាមេរិក​កណ្តាល​ដើម្បី​ព្យាយាម​បញ្ឈប់​ក្បួន​មនុស្ស​រាប់ពាន់នាក់​។ ក្រុមមន្ត្រី​អាមេរិក​បាន​និយាយ​ថា ទាហាន​រហូតដល់​ទៅ​១,០០០​នាក់​អាច​ត្រូវបាន​បញ្ជូនទៅ​ព្រំដែន​ភាគខាងត្បូង​រប​ស់​សហរដ្ឋអាមេរិក​ដើម្បី​រារាំង​ជន​ចំណាកស្រុក​មិន​ឲ្យ​ឆ្លងកាត់​។​

ដោយ​សំដៅ​ដល់​ក្បួន​នេះ ប្រធានាធិបតី​ម៉ិ​ក​ស៊ិ​កលោក Enrique Pena Nieto បាន​និយាយថា ជនអន្តោប្រវេសន៍​ដែល​ចង់បាន​ឯកសារ​អត្តសញ្ញាណ​បណ្ដោះអាសន្ន ការងារ​ឬ​ការអប់រំ​សម្រាប់​កូនៗ​របស់​ពួកគេ​អាចធ្វើ​បាន​ដោយ​ការចុះឈ្មោះ​សុំ​សិទ្ធិ​ជ្រកកោន​នៅ​ភាគខាងត្បូង​ប្រទេស​ម៉ិកស៊ិក។

លោក Pena Nieto បាន​និយាយ​កាលពី​រសៀល​ថ្ងៃ​សុក្រ​ថា “​ផែនការ​នេះ​គឺ​សម្រាប់តែ​អ្នក​ដែល​គោរព​តាមច្បាប់​ម៉ិ​ក​ស៊ិ​ក​ប៉ុណ្ណោះ​ហើយ​វា​ជា​ជំហាន​ដំបូង​ឆ្ពោះទៅរក​ដំណោះស្រាយ​អចិន្ត្រៃយ៍​សម្រាប់​អ្នក​ដែល​ទទួលបាន​ឋានៈ​ជា​ជនភៀសខ្លួន​នៅក្នុង​ប្រទេស​ម៉ិ​ក​ស៊ិ​ក​”​។​

លោក Pena Nieto បាន​និយាយថា ដើម្បី​មាន​លក្ខណៈ​គ្រប់គ្រាន់​សម្រាប់​គម្រោង​ដែល​គាត់​ហៅថា “Estas en Tu Casa” នេះ ជនអន្តោប្រវេសន៍​ត្រូវតែ​ស្ថិតនៅក្នុង​រដ្ឋ​ភាគខាងត្បូង​នៃ Chiapas និង Oaxaca។​

លោក Pena Nieto ដែល​នឹងត្រូវ​ចាក​ចេញពី​តំណែង​នៅ​ថ្ងៃទី​៣០​ខែវិច្ឆិកា​បាន​ឲ្យ​ដឹង​ទៀតថា ការងារ​បណ្តោះអាសន្ន​នៅតាម​បណ្តា​រដ្ឋ​នានា​នឹង​ត្រូវបាន​ពង្រីក​បន្ថែម​ទៀត​ដើម្បី​ផ្តល់​អត្ថប្រយោជន៍​ដល់​ជនជាតិ​ម៉ិ​ក​ស៊ិ​ក​។​

មន្ត្រី​ម៉ិ​ក​ស៊ិ​កបាន​និយាយថា ជនអន្តោប្រវេសន៍​ទាំងឡាយណា​ដែល​មិនមាន​លក្ខណៈសម្បត្តិ​គ្រប់គ្រាន់​សម្រាប់​ឋានៈ​ជនភៀសខ្លួន​គឺអាច​ប្រឈម​នឹង​ការ​និរទេស​។​
រដ្ឋាភិបាល​ម៉ិ​ក​ស៊ិ​កបាន​និយាយថា មនុស្ស​ជាង​១,៧០០​នាក់​នៅក្នុង​ក្បួន​ចំណាកស្រុក​បាន​ចុះឈ្មោះ​សុំ​សិទ្ធិ​ជ្រកកោន​ខណៈដែល​អ្នកផ្សេង​ទៀត​បាន​ត្រឡប់ទៅផ្ទះ​វិញ​៕ REUTERS

​

Source: Kampuchea Thmey Daily