ភ្នំពេញ ៖ រាជរដ្ឋាភិបាលស្វីសបានប្រកាសផ្ដល់ជំនួយចំនួន១២លានដុល្លារសហរដ្ឋអាមេរិកដល់កម្ពុជា ដើម្បីជួយទ្រទ្រង់ដល់មន្ទីរពេទ្យគន្ធបុប្ផារយៈពេល៣ឆ្នាំ គឺចាប់ពីឆ្នាំ២០១៩ ដល់ឆ្នាំ២០២១ខាងមុខនេះ។
ការប្រកាសផ្តល់ជំនួយរបស់រដ្ឋាភិបាលស្វីសនេះបានធ្វើឡើងខណៈដែលលោក Ivo Siebber ឯកអគ្គរដ្ឋទូតស្វីសប្រចាំកម្ពុជាចូលជួបសម្ដែងការគួរសម និងពិភាក្សាការងារជាមួយលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល នៅទីស្ដីការក្រសួង។
លោក Ivo Siebber បានថ្លែងឲ្យដឹងថា «នៅរយៈពេល៣ឆ្នាំខាងមុខនេះ ពោលចាប់ពីឆ្នាំ២០១៩-២០២១ រដ្ឋាភិបាលនៃប្រទេសស្វីស នឹងបន្តផ្ដល់ថវិកាប្រមាណ១២លានដុល្លារ សម្រាប់បន្ដដំណើរការមន្ទីរពេទ្យគន្ធបុប្ផា។
លោក Ivo Siebber ក៏បានកោតសរសើរចំពោះរាជរដ្ឋាភិបាលកម្ពុជា និងក្រសួងសុខាភិបាល ដែលបានខិតខំពង្រឹងគុណភាព នៃមន្ទីរឲ្យដំណើរការដោយរលូន និងមិនមានបញ្ហាណាមួយកើតឡើង។
លោកសាស្ត្រាចារ្យ ម៉ម ប៊ុនហេង បានថ្លែងអំណរគុណចំពោះការគាំទ្ររបស់រដ្ឋាភិបាលស្វីស ព្រមទាំងថ្លែងអំណរគុណ ចំពោះកិច្ចសហប្រតិបត្តិការ ដែលភាគីទាំង២រួមដៃគ្នាធ្វើឡើង រហូតសម្រេចជោគជ័យជាបន្តបន្ទាប់។
លោករដ្ឋមន្ត្រី បានប្ដេជ្ញាចិត្តខិតខំប្រឹងប្រែងយកចិត្តទុកដាក់ និងថែរក្សាសុខភាពរបស់កុមារកម្ពុជាទូទៅឲ្យបានល្អបំផុត និងបានបង្ហាញពីអារម្មណ៍ក្ដុកក្ដួល និងសោកស្ដាយ ចំពោះការបាត់បង់វីរបុរសកុមារកម្ពុជាលោក Beat Richner ស្ថាបនិក នៃមន្ទីរពេទ្យគន្ធបុប្ផា ដែលលោកបានធ្វើមរណភាពកាលពីពេលកន្លងទៅ។
លោកបន្ដថា ក្រសួងសុខាភិបាល និងមន្ទីរពេទ្យគន្ធបុប្ផា បានកាន់មរណទុក្ខរបស់លោក Beat Richner ដើម្បីសំដែងការដឹងគុណចំពោះការលះបង់ដ៏ធំធេងរបស់លោកចំពោះកុមារកម្ពុជានាកាលកន្លងមក។
ក្នុងនោះ លោក Ivo Siebber បានស្នើសូមឲ្យក្រសួងសុខាភិបាល រៀបចំឯកសារ ឬប្រតិបត្តិការនានាដែលមន្ទីរពេទ្យបានកកើតឡើងក្នុងប្រទេសកម្ពុជា ក្រោមការខិតខំប្រឹងប្រែងរបស់លោក Beat Richner ដើម្បីទុកជាឯកសារយោង នៃការបើកដំណើរការមន្ទីរពេទ្យគន្ធបុប្ផា។
ជាការឆ្លើយតបលោករដ្ឋមន្ត្រីជម្រាបជូនលោកឯកអគ្គរដ្ឋទូតស្វីសថា រាជរដ្ឋាភិបាលកម្ពុជាកន្លងមក បានបង្កើតគណៈកម្មការ ដែលដឹកនាំដោយក្រសួងសេដ្ឋកិច្ច និងហិរញ្ញវត្ថុ ព្រមទាំងមានការចូលរួម ពីភាគីមន្ទីរពេទ្យគន្ធបុប្ផា ធ្លាប់បានពិភាក្សាគ្នាលើកិច្ចការនេះម្ដងមកហើយ។
ចំពោះកិច្ចការនេះក្រសួងសុខាភិបាល និងជម្រាបជូនដល់ក្រសួងសេដ្ឋកិច្ច និងហិរញ្ញវត្ថុ និងសូមឲ្យភាគីស្វីសអញ្ជើញចូលរួមពិភាក្សា ដើម្បីស្វែងរកចំណុចរួមគ្នា ក្នុងការដាក់ចេញគោលការណ៍នេះ។
ក្នុងនោះភាគីស្វីស បានសន្យាផ្ដល់ជំនួយខាងបច្ចេកទេស ដល់ក្រសួងសុខាភិបាល និងក្រសួងសេដ្ឋកិច្ច និងហិរញ្ញវត្ថុកម្ពុជា ប្រសិនបើមានតម្រូវការ។
លោកវេជ្ជបណ្ឌិត ហេង សុទ្ធី អនុប្រធានមន្ទីរពេទ្យគន្ធបុប្ផាបាន មានប្រសាសន៍ថា រដ្ឋាភិបាលស្វីសបានផ្ដល់ថវិកាចំនួន១២លានដុល្លារ រយៈពេល៣ឆ្នាំ ដើម្បីជួយដល់មន្ទីរពេទ្យគន្ធបុប្ផាបន្តដំណើរការទៀត។
លោកបន្តថា ទោះបីជាបច្ចុប្បន្ននេះ មន្ទីរពេទ្យនៅតែដំណើរការធម្មតាដោយមានការឧបត្ថម្ភពីគ្រប់មជ្ឈដ្ឋានក៏ដោយ ប៉ុន្តែលោកនៅតែបារម្ភ ខណៈរាល់ថ្ងៃឪពុកម្ដាយ កុមារកម្ពុជាជាច្រើនបានមករកសេវាការព្យាបាលនៅក្នុងមន្ទីរពេទ្យនេះកាន់តែកើនឡើងជាងមុន។
លោកបានបន្ថែមទៀតថា «មន្ទីរពេទ្យគន្ធបុប្ផាជួយព្យាបាលកុមារដែលឈឺប្រហែលជា៨០% នៃកុមារដែលឈឺនៅទូទាំងប្រទេស។ ដូច្នេះ ទំហំ នៃការព្យាបាលធំណាស់ ហើយមន្ទីរពេទ្យ យើងជាមន្ទីរពេទ្យដែលអត់បង់ប្រាក់ហើយប្រកបដោយគុណភាព ហើយសាធារណជន ក៏ដូចជារដ្ឋាភិបាលលោកទទួលស្គាល់នៅចំណុចទាំងអស់នេះ។ ដូច្នេះ ដើម្បីឲ្យដំណើរបាន មន្ទីរពេទ្យនៅតែត្រូវការការគាំទ្រទាំងចិត្តគំនិត ស្មារតី ក៏ដូចជា ថវិកាពីគ្រប់មជ្ឈដ្ឋានទាំងអស់ ដូច្នេះរាល់ថវិកា ក៏ដូចអំណោយសប្បុរសជនទាំងអស់ គឺមានអត្ថន័យណាស់សម្រាប់ជួយកុមារកម្ពុជា»។
លោកបានឲ្យដឹងទៀតថា កុមារដែលមកសម្រាកព្យាបាលនៅមន្ទីរគន្ធបុប្ផាទាំងនៅភ្នំពេញ និងសៀមរាបមានជាង២៥០០នាក់ ហើយសម្រាប់ជំងឺដែលមកបើកថ្នាំប្រហែល៣០០០ ទៅ៣៥០០ នាក់ក្នុងមួយថ្ងៃ។
គួរបញ្ជាក់ថា ចាប់តាំងពីឆ្នាំ១៩៩២មក ទឹកប្រាក់ជាង៧០០លានដុល្លារបានចំណាយលើមន្ទីរពេទ្យគន្ធបុប្ផា ជាមួយនឹងការព្យាបាលកុមារ ១,៧លាននាក់ និងការពិគ្រោះយោបល់ចំនួន១៣,៥លានករណី។
មន្ទីរពេទ្យគន្ធបុប្ផាត្រូវបានសាងសង់ឡើងដោយលោកវេជ្ជបណ្ឌិត Beat Richner ដែលជាជនជាតិស្វីស។ ស្ថាបនិកមន្ទីរពេទ្យគន្ធបុប្ផាលោកវេជ្ជបណ្ឌិត បេអាត រីច្នឺ (Beat Richner) បានលាលែងតំណែងរបស់លោកពីប្រធានគ្រប់គ្រងមន្ទីរពេទ្យ កាលពីឆ្នាំ២០១៧ បន្ទាប់ពីលោកមានជំងឺធ្ងន់ធ្ងរ។
លោកវេជ្ជបណ្ឌិត បេអាត រីច្នឺ (Beat Richner) បានទទួលមរណភាព កាលពីថ្ងៃទី៩ ខែកញ្ញា នៅប្រទេសស្វីសដោយជំងឺ ក្នុងជន្មាយុ៧១ឆ្នាំ៕
Source: Kampuchea Thmey Daily
0 Comments