ភ្នំពេញ ៖ ក្រសួងការងារ និងបណ្ដុះបណ្ដាលវិជ្ជាជីវៈសហការជាមួយសហភាពសហព័ន្ធយុវជនកម្ពុជារាជធានីភ្នំពេញ និងសមាគមរោងចក្រកាត់ដេរនៅកម្ពុជា(GMAC) បានរៀបចំមហាព្រឹត្តិការណ៍ការងារដ៏ធំប្រចាំឆ្នាំគឺ "ពិព័រណ៍ការងារ និងផលិតភាពជាតិឆ្នាំ២០១៨"រយៈពេលពីរថ្ងៃគឺចាប់ពីថ្ងៃទី២៧ និង២៨ ខែតុលា ឆ្នាំ២០១៨ ដោយនាំមកនូវឱកាសការងារគ្រប់ប្រភេទប្រមាណ២ម៉ឺនមុខតំណែងតាមរយៈក្រុមហ៊ុនសហគ្រាសធំៗ ១៥៦ ក្នុងបញ្ជរសរុបចំនួន៣០០ នៅអគារពិព័រណ៍កោះពេជ្រ។
ថ្លែងក្នុងពិធីបើកពិព័រណ៍ការងារ និងផលិតភាពជាតិកាលពីព្រឹកថ្ងៃទី ២៧ ខែតុលា ឆ្នាំ២០១៨ លោក បណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានគណៈកម្មាធិការជាតិបណ្ដុះបណ្ដាលបានមានប្រសាសន៍ថា ពិព័រណ៍ការងារ និងផលិតភាពជាតិក្នុងឆ្នាំ២០១៨នេះ ជាមហាព្រឹត្តិការណ៍ការងារដែលធំជាងគេប្រចាំឆ្នាំ និងបានទាក់ទាញយុវជន និងអ្នកស្វែងរកការងារយ៉ាងច្រើនកុះករចូលរួមដាក់ពាក្យស្វែងរកការងារ និងស្វែងយល់អំពីទីផ្សារការងារកម្ពុជានាពេលបច្ចុប្បន្នពិសេសមានការគាំទ្រយ៉ាងពេញទំហឹងនិងចូលរួមតាំងបង្ហាញពីសំណាក់ក្រុមហ៊ុន-សហគ្រាសនានា។
លោកបណ្ឌិតរដ្ឋមន្ត្រីបានបន្តថា ជាក់ស្ដែងមានក្រុមហ៊ុន-សហគ្រាសធំៗចំនួន១៥៦នៅក្នុងវិស័យសំខាន់ៗដូចជា ៖ ធនាគារ និងគ្រឹះស្ថានមីក្រូហិរញ្ញវត្ថុ, សំណង់, សណ្ឋាគារនិងបដិសណ្ឋារកិច្ច, ទូរគមនាគមន៍, ការអប់រំ និងបណ្ដុះបណ្ដាលបច្ចេកទេសវិជ្ជាជីវៈ, កម្មន្តសាល និងភ្នាក់ងារជ្រើសរើសឯកជនបានចូលរួមយ៉ាងសកម្មហើយយុវជនសិស្ស-និស្សិត និងអ្នកស្វែងរកការងារទាំងអស់មានឱកាសទទួលបានការងារធ្វើភ្លាមៗ, ការប្រឹក្សាយោបល់អំពីអាជីព, វិធីសាស្ត្រជោគជ័យក្នុងការដាក់ពាក្យស្វែងរកការងារ, ការត្រៀមលក្ខណៈចូលទីផ្សារការងារ និងវេទិកាចែករំលែកចំណេះដឹង និងបទពិសោធន៍ដោយវាគ្មិនល្បីៗដែលទទួលបានជោគជ័យក្នុងអាជីព និងទីផ្សារការងារ។ ពិព័រណ៍ដ៏ធំនេះ ត្រូវបានរំពឹងថា មានអ្នកចូលរួមទស្សនាប្រមាណ៣ម៉ឺននាក់ ដែលភាគច្រើនជាសិស្ស-និស្សិត យុវជន អ្នកស្វែងរកការងារ និងកម្មករនិយោជិកពីគ្រប់វិស័យ។
ដូច្នេះដើម្បីទទួលបានឱកាសការងារ និងការយល់ដឹងអំពីការបង្កើនផលិតភាពសូមយុវជន សិស្ស-និស្សិតអ្នកស្វែងរកការងារធ្វើ និងកម្មករនិយោជិកទាំងអស់ចូលរួមទស្សនា និងកុំភ្លេចយកប្រវត្តិរូបសង្ខេប (CV) មកជាមួយដើម្បីដាក់ពាក្យស្នើសុំការងារដោយផ្ទាល់ជាមួយនិយោជកដែលកំពុងត្រូវការជ្រើសរើសកម្លាំងពលកម្ម។
លោកបណ្ឌិតរដ្ឋមន្ត្រីបានបន្ថែមទៀតថា ពិព័រណ៍នេះ ក៏នឹងរៀបចំផងដែរនូវសិក្ខាសាលារយៈពេលពីរថ្ងៃស្ដីពីផលិតភាពដើម្បីចូលរួមលើកកម្ពស់ការយល់ដឹងពីផលិតភាព ការបង្ហាញអំពីវិធីសាស្ត្របំពេញការងារ គំនិតច្នៃប្រឌិតថ្មី ជំនាញនិងឧបករណ៍បច្ចេកវិទ្យាស្របតាមការវិវត្តន៍ នៃបច្ចេកវិទ្យាក្នុងយុគសម័យឧស្សាហកម្មទី៤ ដែលពឹងផ្អែកជាចម្បងលើប្រព័ន្ធឌីជីថលដោយមានការចូលរួមពីសំណាក់វាគ្មិនជាតិអន្តរជាតិល្បីៗ។ លើសពីនេះ អ្នកចូលរួមទាំងអស់នឹងទទួលបាននូវឱកាសដ៏កម្រក្នុងការបង្កើតបណ្ដាញទំនាក់ទំនងជាមួយអ្នកជំនាញធនធានមនុស្ស, អ្នកផ្តល់ការអប់រំបណ្ដុះបណ្ដាល និងធុរជនសំខាន់ៗ។
លោកបណ្ឌិត អ៊ិត សំហេង បានបញ្ជាក់ថា រាជរដ្ឋាភិបាលកម្ពុជា ក៏ដូចជាក្រសួងការងារ និងបណ្ដុះបណ្ដាលវិជ្ជាជីវៈ នឹងបន្តខិតខំបង្កើតការងារថ្មីល្អកាន់តែច្រើន និងរក្សាការងារដែលមានស្រាប់ ដើម្បីជួយឲ្យប្រជាជនយើងកាន់តែមានការងារ មុខរបរ អាជីព ការគាំពារសង្គម និងជីវភាពកាន់តែប្រសើរ ឆ្លើយតបទៅនឹងសេចក្តីប្រាថ្នាកាន់តែខ្ពស់របស់ខ្លួន៕
Source: Kampuchea Thmey Daily
0 Comments