ភ្នំពេញ ៖ មិនខុសពីឆ្នាំមុនៗ ទិវាអង្គការសហប្រជាជាតិ (UN Day) ត្រូវបានប្រារព្ធឡើង កាលពីថ្ងៃទី ២៤ ខែតុលា ឆ្នាំ២០១៨នេះ នៅអគារមួយឈ្មោះថា Factory Phnom Penh ដែលស្ថិតនៅតាមបណ្ដោយផ្លូវជាតិលេខ ២ ក្រោមប្រធានបទ “លើកកម្ពស់នវានុវត្តន៍ថ្ងៃនេះ ដើម្បីថ្ងៃស្អែកឲ្យកាន់តែប្រសើរ” ដោយមានការចូលរួម និងការដាក់តាំងបង្ហាញពីគម្រោងផ្សេង រួមនឹងសមិទ្ធផលជាច្រើន ពីអង្គការជាដៃគូ និងអ្នកពាក់ព័ន្ធ ដែលស្ថិតនៅក្រោមឆ័ត្រ របស់អង្គការសហប្រជាជាតិផងដែរ។
តើប្រធានបទ ដែលដាក់ចេញដោយ អង្គការសហប្រជាជាតិ “លើកកម្ពស់នវានុវត្តន៍ថ្ងៃនេះ ដើម្បីថ្ងៃស្អែកឲ្យកាន់តែប្រសើរ” មានអត្ថន័យ និងចក្ខុវិស័យយ៉ាងណាចំពោះកម្ពុជា?
លោកស្រី ផូលីន តាមេសិស (Pauline Tamesis) ប្រធានអង្គការសហប្រជាជាតិនៅកម្ពុជា បានឲ្យដឹងថា ៖ “ប្រធានបទសម្រាប់ឆ្នាំនេះ គឺការលើកកម្ពស់នវានុវត្តន៍ ដែលអង្គការសហប្រជាជាតិចង់សំដៅទៅលើ ការស្វែងរកដំណោះស្រាយថ្មី សម្រាប់បញ្ហាចាស់ៗ ឬសិក្សាទៅលើបញ្ហាចាស់ៗ នៅក្នុងបរិបទថ្មី ដែលអាចមានជម្រើស នៃដំណោះស្រាយថ្មីផ្សេងទៀត។ នវានុវត្តន៍ និងការអភិវឌ្ឍន៍ប្រកបដោយចីរភាព គឺចង់ឲ្យប្រជាជនទាំងអស់ ជាពិសេសយុវជនចូលរួមជាកម្លាំង ក្នុងការស្វែងរកនូវបញ្ហាលំបាកនានា នៅជុំវិញខ្លួនឯង ដែលបានកើតមាននៅក្នុងសង្គម មានដូចជា លុបបំបាត់ការអត់ឃ្លាន, លុបបំបាត់ភាពក្រីក្រ, ផ្ដល់ទឹកស្អាតទៅដល់មនុស្សគ្រប់រូប, ផ្ដល់សេវាសុខភាព, ការអប់រំ នៅក្នុងវិធីថ្មីមួយ ដែលមិនធ្លាប់បានធ្វើពីមុនមក ដែលអាចបម្រើដល់មនុស្សច្រើនជាងមុន និងធ្វើឲ្យជីវិតប្រសើរជាងមុន។”
លោកស្រីបន្តទៀតថា ៖ “តួយ៉ាងនៅក្នុងវិស័យអប់រំ តើយើងអាចផ្ដល់នូវការអប់រំដ៏ល្អ សម្រាប់ក្មេងនៅក្នុងតំបន់ដាច់ស្រយាល បានយ៉ាងដូចម្ដេច? យើងអាចប្រើប្រាស់ប្រព័ន្ធបច្ចេកវិទ្យា។ បច្ចេកវិទ្យាថ្មី ដែលប្រទេសជាច្រើនបានអនុវត្តរួចមកហើយ តាមរយៈការសិក្សាពីចម្ងាយ (Distance Learning – E-learning) និងការសិក្សាតាមបែបឌីជីថល (Digital Learning)។ តាមរយៈបច្ចេកវិទ្យានេះ យើងអាចបង្ហោះមេរៀននៅក្នុងប្រព័ន្ធអ៊ីនធឺណិត ឲ្យទៅលោកគ្រូអ្នកគ្រូ ហើយសិក្សានុសិស្ស អាចទទួលបានការសិក្សាតាមរយៈ ថ្នាក់អេឡិចត្រូនិច (E-Classroom)។ នេះគ្រាន់តែជាផ្នែកតូចមួយនោះទេ ហើយនេះជាអ្វី ដែលកម្មវិធីនៅក្នុងថ្ងៃនេះចង់បាន គឺថាស្វែងរកដំណោះស្រាយថ្មី សម្រាប់បញ្ហាចាស់ ដោយមានការចូលរួមពីយុវជន និងនវានុវត្តន៍ប្រព័ន្ធបច្ចេកវិទ្យា។”
“ដើម្បីសម្រេចបាននូវរបៀបវារៈ ឆ្នាំ ២០៣០ សម្រាប់ការអភិវឌ្ឍន៍ប្រកបដោយចីរភាព យើងត្រូវធានាថា សម្លេងរបស់មនុស្សទាំងអស់ ត្រូវបានតំណាងដោយសេរី និងស្មើភាពគ្នានៅក្នុងសង្គម។ សព្វថ្ងៃនេះប្រជាជនកម្ពុជា ៦០ ភាគរយ មានអាយុក្រោម ៣០ ឆ្នាំ។ ប្រជាជនវ័យក្មេងមានចំនួនប្រហែល ១ ភាគ ៣ នៃអ្នកដែលបានចុះឈ្មោះបោះឆ្នោត ដែលមានប្រហែល ៨ លាននាក់។ កត្តាប្រជាសាស្ត្រនេះ ប្រសិនបើត្រូវបានប្រើប្រាស់ នឹងត្រូវក្លាយទៅជាកម្លាំងជំរុញ សម្រាប់ការអភិវឌ្ឍសង្គម និងសេដ្ឋកិច្ចរបស់កម្ពុជា” លោកស្រី ប្រធានអង្គការសហប្រជាជាតិនៅកម្ពុជា បានលើកឡើង រួចបន្តទៀតថា “មានការងារជាច្រើនអាចធ្វើបាន ដើម្បីធានាថា សំឡេងរបស់យុវជនត្រូវបានតំណាង ប្រកបដោយអត្ថន័យ នៅក្នុងដំណើរការនៃការធ្វើសេចក្តីសម្រេចចិត្ត។ មានយុវជនជាច្រើន មានបំណងលើសពីការចូលរួម ក្នុងការជំរុញសេដ្ឋកិច្ចជាតិ គឺពួកគេចង់ឲ្យសំឡេងរបស់គេ ត្រូវបានគេឮនៅពេលដែលឈានដល់ការសម្រេចចិត្ត ដែលមានឥទ្ធិពលចំពោះជីវិតរបស់ពួកគេ”។
តាមការសិក្សារបស់ អង្គការសហប្រជាជាតិ គេរកឃើញថា មនុស្សជំនាន់ក្រោយ មានតម្លៃចំពោះការបោះឆ្នោត ដែលជាផ្នែកមួយដ៏សំខាន់ នៃការចូលរួមក្នុងផ្នែកនយោបាយ ដើម្បីបំពេញកាតព្វកិច្ច ជាពលរដ្ឋរបស់ពួកគេ ក្នុងការជ្រើសរើសមេដឹកនាំ ដែលពួកគេចង់បាន។
“នៅប្រទេសកម្ពុជា យុវជនដើរតួយ៉ាងសំខាន់ ក្នុងការដោះស្រាយវិសមភាព ប៉ុន្តែពួកគេត្រូវការការវិនិយោគ។ ខ្ញុំមិនមែនមានន័យថា ជាប្រាក់កាក់នោះទេ។ គឺពួកគេត្រូវការអ្នកណែនាំ, ទទួលបានការថែទាំងសុខភាព, ការអប់រំប្រកបដោយគុណភាព, ជំនាញដែលមានតម្រូវការនៅក្នុងទីផ្សារ, ទទួលបានការងារសមរម្យ និងកិច្ចគាំពារសង្គម។ ប៉ុន្តែយើងមិនគួរត្រូវខ្លាចឧបសគ្គនេះទេ ត្រូវសម្លឹងមើលទៅពួកវា និងចាត់ទុកវា ថាជាឱកាសទៅវិញ។ តើយើងអាចប្រើប្រាស់ បច្ចេកវិជ្ជាថ្មីៗយ៉ាងដូចម្ដេច ដើម្បីលើកកម្ពស់សំឡេងរបស់យុវជន ដើម្បីធានាអោយមានការចូលរួមដោយស្មើភាពគ្នា និងបង្កើនជីវភាពរស់នៅរបស់ពួកគេ?” លោកស្រី ផូលីន បញ្ជាក់ និងបន្ថែមទៀតថា “រាជរដ្ឋាភិបាលកម្ពុជា ដឹងអំពីការរំខានដែលជិតមកដល់នេះ ហើយបានប្តេជ្ញាចាត់វិធានការចំពោះបញ្ហានេះ ដោយបានចាប់ផ្តើមរួចទៅហើយ ជាមួយគំនិតផ្ដួចផ្ដើមដ៏គួរឱ្យគោតសរសើរ។ ឧទាហរណ៍ អង្គការសហប្រជាជាតិ រួមជាមួយរាជរដ្ឋាភិបាល បានបង្កើតគំនិតផ្តួចផ្តើមនូវកម្មវិធីអក្ខរកម្មពិសេសមួយ សម្រាប់កម្មករកម្មការិនីរោងចក្រ ដែលជាទូទៅគេហៅថា កម្មវិធីអក្ខរកម្មរោងចក្រ។ អង្គការសហប្រជាជាតិ ក៏កំពុងធ្វើការជាមួយយុវជន និងយុវនារី ទាំងនៅសាលារៀន និងក្រៅសាលារៀន ដើម្បីផ្តល់ឱ្យពួកគេនូវជំនាញអាជីវកម្ម និងសហគ្រិនភាព។ដើម្បីសម្រេចបាននូវរបៀបវារៈ ឆ្នាំ ២០៣០ សម្រាប់ការអភិវឌ្ឍប្រកបដោយនិរន្តរភាពសម្រាប់ពិភពលោក ឲ្យកាន់តែមានសន្តិភាព, ស្ថេរភាព និងវិបុលភាព យើងត្រូវការមនុស្សវ័យក្មេងដើម្បីដឹកនាំ។ សូមចូលរួម នៅក្នុងកិច្ចខិតខំប្រឹងប្រែងរបស់យើង ដើម្បីបញ្ចេញសមត្ថភាពរបស់យុវវ័យ”៕
Source: Kampuchea Thmey Daily
0 Comments