ភ្នំពេញ ៖ ប្រជាពលរដ្ឋរស់នៅក្បែរ រមណីយដ្ឋានភ្នំព្រះរាជទ្រព្យ មានទីតាំងនៅភូមិជ័យឧត្តម ឃុំផ្សារដែក ស្រុកពញាឮ ខេត្តកណ្តាល បានសម្តែងការខឹងសម្បារ និង រិះគន់ចំពោះមន្ត្រីអាជ្ញាធរមូល ដែលបណ្តោយឲ្យមន្ត្រីផ្នែកទេសចរណ៍នៅ ទីនោះដឹកសំរាមយកមកចាក់ចោលនៅតាមផ្លូវសាធារណៈដែលបង្កឲ្យមានក្លិនស្អុយប៉ះពាល់បរិស្ថាននិងសុខភាពរបស់ពួកគាត់។
មន្ត្រីទេសចរណ៍ម្នាក់ឈ្មោះ ប៉ាត ដែលបានដឹកសំរាមមកចាក់ចោលទីនោះរាល់ថ្ងៃបានឆ្លើយប្រាប់ភ្នាក់ងារកម្ពុជាថ្មី ថា សំរាមលោកបានទទួលបញ្ជាពីមេថ្នាក់លើរបស់លោក ឲ្យដឹកសំរាមយកមកចាក់ចោលនៅទីនេះ ដោយសារតែដីនេះជារបស់គាត់។
លោក ញឹប ចាន់ មេឃុំផ្សារដែក នៅរសៀលថ្ងៃទី១៣ ខែតុលា ឆ្នាំ២០១៨ នេះបានមានប្រសាសន៍ថា បញ្ហាសំរាមនេះជារឿងរបស់ខាងមន្ត្រីទេសចរណប្រចាំរមណីដ្ឋានភ្នំព្រះរាជទ្រព្យ ដែលមានឈ្មោះ វ៉ាន ជាអ្នកទទួលបន្ទុកក្នុងបញ្ហាសំរាមនេះ។
ប្រជាពលរដ្ឋស្ទើរតែពេញភូមិជ័យឧត្តម និង អ្នកភូមិផ្សេងៗទៀតបានសម្តែងការមិនសប្បាយចិត្តចំពោះបញ្ហាដែលខាងអស់លោកមន្ត្រីទេសចរណ៍ និងលោក មេឃុំផ្សារដែក គាត់ឲ្យកូនចៅដឹកសំរាមយកមកចាក់គរចោលតាមផ្លូវសាធារណៈបែបនេះទេ ដែលបង្កក្លិនស្អុយប៉ះពាល់ដល់សុខភាពប្រជាជនដើរឆ្លងកាត់ទីនោះនិងប៉ះពាល់ដល់បរិស្ថានផងដែរមិនគួរណាពួកគាត់ចង់បានតែផលប្រយោជន៍ផ្ទាល់ខ្លួនឯងតែមិនគិតពីផលប៉ះពាល់ដល់ប្រជាជនបែបនេះឡើយ។
លោក ថន សុវណ្ណា អភិបាលស្រុកពញាឮ កាលពីរយៈពេលជាង២ខែមុន ធ្លាប់បាននិយាយប្រាប់ភ្នាក់ងារកម្ពុជាថ្មីថា លោកបានកំពុងតែឲ្យគេជីករណ្តៅដីសម្រាប់ចាក់សំរាមនោះហើយ ប៉ុន្តែមកដល់ពេលនេះមិនទាន់មានការចាត់ចែងជីករណ្តៅសម្រាប់ដាក់សំរាមកាកសំណល់ពីទីតាំងអ្នកលក់ដូរនៅជើងភ្នំ រមណីយដ្ឋានភ្នំព្រះរាជទ្រព្យ នោះនៅឡើយទេ គឺលោកនិយាយកុហកដោះសារយកតែរួចខ្លួនថាល្អប៉ុណ្ណោះ៕
Source: Kampuchea Thmey Daily
0 Comments