ភ្នំពេញ ៖ សហភាពសហព័ន្ធយុវជនកម្ពុជា គ្រោងរៀបចំព្រឹត្តិការណ៍ “៤០គីឡូម៉ែត្រទៅកាន់ប្រវត្តិសាស្ត្រ” រយៈពេល៣ថ្ងៃ នៅក្នុងបរិវេណស្រុកមេមត់ ខេត្តត្បូងឃ្មុំ និងស្រុកស្នួល ខេត្តក្រចេះ ក្នុងបំណងផ្ដល់ឲ្យយុវជនចេះរួបរួមគ្នាក្នុងគ្រាលំបាក គ្រាសុខសាន្ត និងស្វែងយល់ពីកម្រិតសមត្ថភាពរបស់ខ្លួន ក៏ដូចជាកម្រិតនៃការតស៊ូ ភាពអត់ធ្មត់ និងសមត្ថភាពដោះស្រាយបញ្ហាជាក់ស្តែង រួមជាមួយការស្វែងយល់បន្ថែមពីប្រវត្តិសាស្ត្រ តាមរយៈការធ្វើដំណើរថ្មើរជើងរួមគ្នា។
គំរោងនៃការរៀបចំកម្មវិធីខាងលើនេះ ត្រូវបានប្រកាសនៅក្នុងសន្និសីទសារព័ត៌មានមួយកាលពីរសៀលថ្ងៃទី១៦ ខែតុលា ឆ្នាំ២០១៨ នៅទីស្នាក់ការសហភាពសហព័ន្ធយុវជនកម្ពុជា នាសង្កាត់ចតុមុខ ខណ្ឌដូនពេញ។ ព្រឹត្តិការណ៍នេះ មានគោលបំណងផ្ដល់ជាវេទិកាដល់យុវជនឲ្យចេះរួបរួមគ្នាក្នុងគ្រាលំបាក និងគ្រាសុខសាន្ត ស្វែងយល់ពីកម្រិតសមត្ថភាពរបស់ខ្លួន ក៏ដូចជាកម្រិតនៃការតស៊ូ ភាពអត់ធ្មត់ និងសមត្ថភាពដោះស្រាយបញ្ហាជាក់ស្តែង រួមជាមួយការស្វែងយល់បន្ថែមពីប្រវត្តិសាស្ត្រតាមរយៈការធ្វើដំណើរថ្មើរជើងរួមគ្នា នៅលើគន្លងផ្លូវ ដែលមានចម្ងាយ៤០គីឡូម៉ែត្រ។ មិនត្រឹមតែប៉ុណ្ណោះ ព្រឹត្តិការណ៍នេះ គឺធ្វើឡើងដើម្បីបង្កើតបរិយាកាសស្និទ្ធស្នាល និងប្រកបដោយតម្លាភាព ដែលក្នុងនោះ យុវជនទាំងអស់ត្រូវបានលើកទឹកចិត្តឲ្យមានសកម្មភាពកសាងក្រុម ការដើររួមគ្នា ច្រៀងចំរៀងរួមគ្នា ការចម្អិនអាហាររួមគ្នា ការបោះជំរំ ការដុតភ្លើងគប់ ការនិទានរឿង ការបញ្ចេញសមត្ថភាព ទេពកោសល្យផ្ទាល់ខ្លួន ក៏ដូចជាការច្រៀងរាំកំសាន្តផ្សេងៗ។
ព្រឹត្តិការណ៍នេះ នឹងត្រូវធ្វើឡើងចាប់ពីថ្ងៃទី២៩ ខែវិច្ឆិកា ដល់ថ្ងៃទី០១ ខែធ្នូ ឆ្នាំ២០១៨ នៅក្នុងបរិវេណស្រុកមេមត់ ខេត្តត្បូងឃ្មុំ និងស្រុកស្នួល ខេត្តក្រចេះ ដែលតាមគ្រោងទុក សហភាពសហព័ន្ធយុវជនកម្ពុជារំពឹងថា នឹងមានការចូលរួមពីសំណាក់យុវជន និងមហាជនប្រមាណ ៥០០នាក់។ ដើម្បីធានាឲ្យព្រឹត្តិការណ៍នេះ ប្រព្រឹត្តិទៅដោយរលូន អ្នកចូលរួមទាំងអស់ នឹងត្រូវបានបែងចែកជាក្រុម ហើយត្រូវធ្វើដំណើរនៅលើដងផ្លូវមួយ ដែលមានចម្ងាយ៤០គីឡូម៉ែត្រ សម្រាប់បុរស និង២០ គីឡូម៉ែត្រសម្រាប់ស្ត្រី។ តាមការកំណត់ដំណើរការនេះ ត្រូវចំណាយពេលវេលាប្រមាណ២ថ្ងៃ១យប់ និងមួយផ្នែកទៀត សម្រាប់ការបោះជំរំ នៅទីតាំងវិមានអនុស្សាវរីយ៍២ធ្នូ។
លោក ហ៊ុន ម៉ានី បានថ្លែងនៅក្នុងសន្និសីទនោះថា មួយផ្នែកនៃព្រឹត្តិការណ៍នេះ មិនត្រឹមតែជាការចងចាំនូវប្រវត្តិសាស្ត្រនោះទេ តែយើងចង់ធ្វើអ្វីមួយ ដើម្បីបង្ហាញនូវការចងចាំរបស់យើង ហើយអ្វីដែលយើងចង់មានបទពិសោធន៍ទៀតនោះ គឺការតស៊ូ ការរួមគ្នា ដើម្បីសម្រេចផលប្រយោជន៍ជាតិ តាមរយៈការធ្វើដំណើរចម្ងាយ៤០គីឡូម៉ែត្រ ហើយការធ្វើដំណើររយៈពេល ៤០គីឡូម៉ែត្រនេះ យើងរំពឹងរំពឹងថា ពីមួយជំហានទៅមួយជំហាន យុវជនអាចស្រមើស្រមៃទៅលើអ្វីមួយពីអតីតកាលរបស់យើង។
តាមលោក ហ៊ុន ម៉ានី ស្ថានភាពផ្លូវនៅពេលបច្ចុប្បន្នមិនស្រួលប៉ុន្មាន ប៉ុន្តែក៏មិនដូចពីអតីតកាលដែរ ពីព្រោះកាលពីជំនាន់មុន ការដើរទៅតាមផ្លូវ មានការព្រួយបារម្ភទាក់ទងទៅនឹងមីន ហើយដំណើរឆ្ពោះទៅរកការតស៊ូរំដោះប្រទេសនេះ មិនអាចដើរពេលថ្ងៃបានទេ គឺដើរបានតែពេលយប់ ព្រោះតំបន់ព្រៃភាគច្រើនគ្រប់គ្រងដោយពួកខ្មែរក្រហម ដូច្នេះយុវជនសម័យនោះ ត្រូវការដើរក្នុងភាពលាក់លៀម ស្ងៀមសម្ងាត់ គឺពេលយប់។
មួយទៀត ការធ្វើដំណើរឆ្ពោះទៅរកការតស៊ូរំដោះប្រទេសរបស់យុវជននាសម័យនោះ គឺបរិបូណ៌ទៅដោយព្រៃក្រាស់ៗ មិនស្រួលទេ ដូច្នេះព្រឹត្តិការណ៍នេះ យើងចង់ឲ្យយុវជននឹកឃើញចំណុចទាំងអស់នាសម័យនោះ។ ទោះជាយ៉ាងណាការធ្វើដំណើរនាពេលនេះ សុវត្ថិភាពជាចម្បង ដែលគ្មានមីនដូចកាលពីសម័យមុននោះទេ ហើយអ្វីដែលជាភាពងាយស្រួលរបស់យុវជននាពេលនេះទៀតនោះ គឺចម្ងាយ៤០គីឡូម៉ែត្រ ដែលត្រូវធ្វើដំណើរនេះ គឺត្រូវបានក្រុមការងាររៀបចំរួចជាស្រេចទៅហើយ។
លោក ហ៊ុន ម៉ានី លើកឡើងទៀតថា ការធ្វើដំណើរចម្ងាយ៤០គីឡូម៉ែត្រនេះ ក្នុងគោលបំណងចង់ឲ្យយុវជនធ្វើតេស្តខ្លួនឯងថា តើអាចដើរបានដែរ ឬទេ ដូច្នេះរយៈចម្ងាយ៤០គីឡូម៉ែត្រនេះ ពួកគាត់អាចធ្វើតេស្តបានថា តើត្រូវអត់ធ្មត់ ត្រូវតស៊ូ យ៉ាងម៉េច។
គួរបញ្ជាក់ថា ព្រឹត្តិការណ៍នេះ នឹងបើកឲ្យមានការចូលរួមពីគ្រប់មជ្ឈដ្ឋាន ដែលក្នុងនោះ យុវជន និងមហាជន ដែលមានបំណងចូលរួម ត្រូវមានអាយុចន្លោះពី១៨ ឆ្នាំទៅ៤៥ ឆ្នាំ មានកាយសម្បទារឹងមាំ មានសុខភាពផ្លូវចិត្តប្រក្រតី គោរពតាមបទបញ្ជាផ្ទៃក្នុងនៃព្រឹត្តិការណ៍ ដោយឆ្លងកាត់ការវិនិច្ឆ័យ និងការសម្ភាសន៍ផ្ទាល់មាត់ពីក្រុមការងាររៀបចំ។ បន្ទាប់ពីទទួលបានជោគជ័យនៃការវិនិច្ឆ័យ និងការសម្ភាសន៍រួចរាល់ហើយ អ្នកចូលរួមត្រូវមានឆន្ទៈក្នុងការបង់វិភាគទានចូលរួមចំនួន៤ម៉ឺនរៀល ដោយមានប្រាក់តម្កល់ចំនួន៣៦ម៉ឺនរៀលបន្ថែម ហើយប្រាក់តម្កល់៣៦ម៉ឺនរៀលនេះ នឹងប្រគល់ជូនអ្នកចូលរួមវិញក្រោយចប់កម្មវិធី និងដរាបណាអ្នកចូលរួមទាំងអស់បានអនុវត្តពេញលេញនូវបទបញ្ជាផ្ទៃក្នុង និងលក្ខន្តិកៈរបស់ព្រឹត្តិការណ៍តាមការព្រមព្រៀងជាមុន។
អ្នកដែលមានបំណងក្នុងការចូលរួម អាចទាញយកពាក្យសុំចូលរួម និងលក្ខន្តិកៈផ្សេងៗតាមរយៈ www.bit.ly/20sgjHW ឬទាក់ទងសហភាពសហព័ន្ធយុវជនកម្ពុជាស្នាក់ការកណ្ដាល ដែលមានអាសយដ្ឋាន ផ្ទះលេខ២៤ ផ្លូវ២២៨ សង្កាត់ចតុមុខ ខណ្ឌដូនពេញ រាជធានីភ្នំពេញ ឬទាក់ទងតាមទូរស័ព្ទ ០១០ ៥៥៥ ៩៨៧៕
Source: Kampuchea Thmey Daily
0 Comments