អតីតមេបញ្ជាការកងទ័ពលោក Jair Bolsonaro បានជាប់ឆ្នោតជាប្រធានាធិបតីនៃប្រទេសប្រេស៊ីលកាលពីថ្ងៃអាទិត្យជាមួយនឹងការសន្យាថា នឹងមានការផ្លាស់ប្តូរទិសដៅជាមូលដ្ឋានសម្រាប់ប្រទេសអាមេរិកឡាទីនមួយនេះ។
លទ្ធផលជាផ្លូវការបានបង្ហាញថា ប្រធានាធិបតីជាប់ឆ្នោតរូបនេះបានទទួលសំឡេងឆ្នោត៥៥,១៣ភាគរយទល់នឹង៤៤,៨៧ភាគរយនៃបេក្ខជនឆ្វេងនិយម Fernando Haddad សម្រាប់ការបោះឆ្នោតជុំទីពីរខណៈសន្លឹកឆ្នោតត្រូវគេរាប់បាន៩៩,៩៩ភាគរយ។
លោក Bolsonaro អាយុ៦៣ឆ្នាំនឹងត្រូវឡើងកាន់តំណែងនៅថ្ងៃទី១ខែមករា។
គាត់បាននិយាយនៅក្នុងសុន្ទរកថាជ័យជំនះរបស់គាត់ថា “យើងនឹងផ្លាស់ប្តូរទិសដៅរបស់ប្រទេសប្រេស៊ីលជាមួយគ្នា”។ សុន្ទរកថានេះត្រូវបានផ្សាយផ្ទាល់ចេញពីផ្ទះរបស់គាត់តាម Facebook ដែលជាប្រព័ន្ធផ្សព្វផ្សាយសង្គមមួយដែលគាត់បានប្រើដើម្បីធ្វើយុទ្ធនាការចាប់តាំងពីអ្នកវាយប្រហារបានចាក់គាត់ចំត្រង់ពោះនៅឯការជួបជុំមួយកាលពីថ្ងៃទី៦ខែកញ្ញា។
គាត់បានសន្យាថា នឹងគ្រប់គ្រងតាមព្រះគម្ពីរនិងរដ្ឋធម្មនុញ្ញហើយបាននិយាយថា “យើងមិនអាចបន្តប្រថុយជាមួយលទ្ធិសង្គមនិយម ភាពកុម្មុយនិស្ត ប្រជានិយមនិងភាពជ្រុលនិយមរបស់ពួកឆ្វេងនិយមបាននោះទេ”។
ប៉ុន្តែគាត់បានសន្យាថានឹងការពាររដ្ឋធម្មនុញ្ញ លទ្ធិប្រជាធិបតេយ្យនិងសេរីភាពដោយប្រឆាំងនឹងការព្រមានរបស់គូប្រជែងដែលថា គាត់នឹងព្យាយាមតម្រង់ទៅរកអំណាចផ្តាច់ការបន្ទាប់ពីគាត់បានបង្ហាញការកោតសរសើរដោយបើកចំហចំពោះរបបផ្តាច់ការយោធាដ៏ឃោរឃៅរបស់ប្រទេសប្រេស៊ីល (១៩៦៤-១៩៨៥) ។
អ្នកគាំទ្ររាប់ពាន់នាក់បានចេញមកតាមដងផ្លូវនៅខាងក្រៅផ្ទះរបស់គាត់ក្នុងទីក្រុង Rio de Janeiro ដោយគ្រវីទង់ជាតិប្រេស៊ីលនិងបាញកាំជ្រួចបំភ្លឺផ្ទៃមេឃ។
ស្របពេលជាមួយគ្នានោះ សេតវិមានបាននិយាយថា ប្រធានាធិបតីអាមេរិកលោក Donald Trump បានទូរស័ព្ទទៅលោក Bolsonaro ដើម្បីអបអរសាទរគាត់៕ AFP
Source: Kampuchea Thmey Daily
0 Comments