សេង ស្រឿ​ន ចាញ់​Chhouk Chhai​ទៀត ខណៈ ​អេ រដ្ឋា វាយ​ថៃ​សន្លប់​ទឹក​ទី​២

សេង ស្រឿ​ន អ្នក​ប្រដាល់​កម្ពុជា ក្លិប​មហិទ្ធិឫទ្ធិ​មេសរថ្ងក​ខេត្តស្វាយរៀង ដែល​ត្រូវ​គេ​ផ្តល់​ឱកាស​ឲ្យ​ជួប​សងសឹក​ជាមួយ​អ្នក​ប្រដាល់​ថៃ Chhouk Chhai កាលពី​ព្រឹក​ថ្ងៃអាទិត្យ​ ទី​២៨​ ខែ​តុលា ឆ្នាំ​២០១៨ លើ​សង្វៀន​Boostrong Fighter On Fire នៅ​ប៉ុស្តិ៍​អាស៊ីអាគ្នេយ៍​នោះ បាន​ចាញ់ Chhouk Chhai ទៀត​។

​ចាញ់​លើក​ទី​២​នេះ សេង ស្រឿ​ន ចាញ់​ធ្ងន់ធ្ងរ​ថែមទៀត ដោយ​ត្រូវ Chhouk Chhai ចាប់​អុក​នឹង​ជង្គង់​សន្លប់​ក្នុង​ទឹក​ទី​១ ខណៈ​ការប្រកួត​ទើបបាន​ប្រហែល​ពាក់កណ្ដាល​ទឹក​១​នោះ។

Chhouk Chhai គ្រាន់តែ​ចាប់ផ្តើម​ប្រកួត​ភ្លាម គេ​ដើរចូល​ទៅរក​ចាប់ ​សេង ស្រឿ​ន ដើម្បី​អុក​ជង្គង់​តែម្តង ទោះជា​ សេង ស្រឿ​ន ទាត់​កាត់ ឬក៏​ធាក់​ចេញ យ៉ាងណាក៏ដោយ ក៏​មិនអាច​ទប់​នឹង​ការ​វាយ​សម្រុក​របស់ Chhouk Chhai បានដែរ។​

​សេង ស្រឿ​ន និង Chhouk Chhai នេះ ធ្លាប់​ជួបគ្នា​ម្តង​ហើយ​កាលពី​ថ្ងៃទី​៣០​ ខែ​កញ្ញា ឆ្នាំ​២០១៧​កន្លងមក ដែល​ពេលនោះ សេង ស្រឿ​ន ត្រូវ Chhouk Chhai វាយ​អោយ​សន្លប់​ក្នុង​ទឹក​ទី​២។

​ចំពោះ អេ រដ្ឋា អ្នក​ប្រដាល់​ក្លិប​អេ​ភូ​ថង​កីឡា បាន​ផ្ដួល​យកឈ្នះ​អ្នក​ប្រដាល់​ថៃ ឈ្មោះ Pek Am ក្នុង​ទឹក​ទី​២។ ពួកគេ​ទាំងពីរ ប្រកួត​គ្នា​ក្នុង​ប្រភេទ​ទម្ងន់៥៧គីឡូក្រាម ។​

Pek Am ត្រូវ ​អេ រដ្ឋា (​ម៉ន រដ្ឋា​) ដាល់​ចំ​ចង្កា​មួយ​ដៃ​ពេញ ដែល​បណ្តាល​ឲ្យ​ Pek Am ដួល​ដាច់​ផ្ងារ សន្លប់​ធំ​តែម្តង នៅ​ដើម​ទឹក​ទី​២​នោះ។​

​ចំណែក ធី តុង​ហ៊ី អ្នក​ប្រដាល់​ក្លិប​ពន្លឺ​វិបុល​មានរិទ្ធ បាន​ផ្ដួល​យកឈ្នះ​អ្នក​ប្រដាល់​អ៊ីរ៉ង់ Moh sen Kordalivand ឲ្យ​បោះបង់ចោល​ការប្រកួត​ក្នុង​ទឹក​ទី​៤ ដោយ​ស៊ូ​ជាមួយ​កែង និង​ជង្គង់​របស់​ធី តុង​ហ៊ី​មិនបាន។ ក្នុងការ​ប្រកួត​ទឹក​ទី​៣ Moh sen Kordalivand ត្រូវ​អាជ្ញាកណ្ដាល​រាប់​៨​ម្តង ដោយសារ​ត្រូវ​កែង​របស់​តុង​ហ៊ី​នោះ។

មា​ជ សុខ​រ៉ា និង ពុទ្ធ​ ឆាយ​រិទ្ធី ឈ្នះ ក្នុង​ជម្រុះ​ជុំ​ទី​៣ ខ្សែក្រវាត់​Wurkz ទម្ងន់​៦៧​គីឡូក្រាម អ្នក​ប្រដាល់​កម្ពុជា​២​រូប គឺ​មា​ជ សុខ​រ៉ា អ្នក​ប្រដាល់​ក្លិប​តា​ព្រហ្ម​មានជ័យ និង​អ្នក​ប្រដាល់ ​ពុទ្ធ ឆាយ​រិទ្ធី ក្លិប​ពុទ្ធ​សេរី វង្ស​កីឡា បាន​វាយ​ឈ្នះ​អ្នក​ប្រដាល់​ថៃ​ដូចគ្នា នៅក្នុង​ការ​ជួប​ប្រកួត​ក្នុង​ជុំ​ជម្រុះ​លើក​ទី​៣ នៃ​ព្រឹត្តិការណ៍​ដណ្ដើម​ខ្សែក្រវាត់​Wurkz រដូវ​កាល​ទី​២ ទម្ងន់​៦៧​គីឡូក្រាម លើ​សង្វៀន​SEA-TV កាលពី​ល្ងាច​ថ្ងៃទី​២៨​ ខែ​តុលា​ ឆ្នាំ​២០១៨​។

​មា​ជ សុខ​រ៉ា អ្នក​ប្រដាល់​ក្លិប​តា​ព្រហ្ម​មានជ័យ បាន​ផ្ដួល អ្នក​ប្រដាល់​ថៃ​Kao Ah ឲ្យ​សន្លប់​ក្នុង​ទឹក​ទី​១​ប៉ុណ្ណោះ។​

​ពុទ្ធ ឆាយ​រិទ្ធី អ្នក​ប្រដាល់​ក្លិប​ពុទ្ធ​សេរី​វង្ស​កីឡា គេ​វាយ​ឈ្នះ​អ្នក​ប្រដាល់​ថៃ​Phach Aroun ដោយ​ពិន្ទុ។​

នេះ​ជាការ​ប្រកួត​ជម្រុះ​លើក​ទី​៣ របស់​ពួកគេ​ទាំង​៤ ក្នុងការ​ប្រកួត​ជម្រុះ​ដណ្ដើម​ខ្សែក្រវាត់ Wurkz រដូវ​កាល​ទី​២​ទម្ងន់​៦៧​គីឡូក្រាម។​

សូម​បញ្ជាក់​ថា ព្រឹត្តិការណ៍​ប្រដាល់​ដណ្ដើម​ខ្សែក្រវាត់​Wurkz រដូវ​កាល​ទី​២ ទម្ងន់​៦៧​គីឡូក្រាម​នេះ មាន​អ្នក​ប្រដាល់​ជើង​ខ្លាំង​កម្ពុជា​៤​រូប និង អ្នក​ប្រដាល់​ជើង​ខ្លាំង​ថៃ​៤​រូប។

​ការប្រកួត គឺ​ពុំមាន​វគ្គ​ពាក់កណ្ដាល​ផ្តាច់ព្រ័ត្រ​ទេ។ ដូច្នេះហើយ ទើប​ទាំង​ប្រដាល់​ខ្មែរ ទាំង​អ្នក​ប្រដាល់​ថៃ គឺ​ត្រូវការ​ឈ្នះ​ដូចគ្នា ត្បិត​គេ​ជ្រើសរើស​យក​តែ​អ្នក​លេខ​១​ និង​លេខ​១ ​ក្នុង​ជុំ នៃ​ពូ​ល​ខ្មែរ​និង​ពូ​ល​ថៃ តែប៉ុណ្ណោះ៕ 

​

​

Source: Kampuchea Thmey Daily