សាកលវិទ្យាល័យ Harvard ត្រូវតុលាការជំនុំជម្រះក្តីកាលពីថ្ងៃចន្ទលើដំណើរការជ្រើសរើសការចូលរៀនដោយមិនច្បាស់លាស់មួយដែលអ្នករិះគន់និយាយថា ជាការរើសអើងប្រឆាំងនឹងនិស្សិតអាស៊ី។
ពាក្យបណ្តឹងមួយត្រូវបានដាក់ដោយប្រើពាក្យ “ពូជសាសន៍” ថាជាកត្តាមួយក្នុងការចូលរៀននៅសាកលវិទ្យាល័យ Harvard ដែលជាសាកលវិទ្យាល័យមានវ័យចំណាស់ជាងគេហើយប្រហែលជាមានកិត្យានុភាពបំផុតរបស់សហរដ្ឋអាមេរិក។
ចៅក្រមសហព័ន្ធលោក Allison Dale Burroughs បានស្តាប់ការជជែកវែកញែកនៅក្នុងការកាត់ក្តីស៊ីវិលនៅទីក្រុង Boston ដែលត្រូវបានគេរំពឹងថានឹងចំណាយពេល៣សប្តាហ៍។
សាកលវិទ្យាល័យ Harvardបានបដិសេធការរើសអើងចំពោះជនជាតិអាស៊ីប៉ុន្តែបាននិយាយការពារការប្រើប្រាស់លក្ខណៈវិនិច្ឆ័យការជ្រើសរើសដែលមានលក្ខណៈទូលំទូលាយរបស់ខ្លួន។
សាកលវិទ្យាល័យក៏បានកត់សម្គាល់ផងដែរថា សមាមាត្រនៃនិស្សិតមានប្រភពដើមអាស៊ីបានកើនឡើងយ៉ាងខ្លាំងចាប់តាំងពីឆ្នាំ២០១០មកហើយសព្វថ្ងៃនេះមានចំនួន២៣ភាគរយក្នុងចំណោមនិស្សិតថ្មីចំនួន២,០០០នាក់ដែលបានទទួលយកពីអ្នកដាក់ពាក្យចំនួន៤០,០០០នាក់។
មានជនជាតិស្បែកខ្មៅប្រហែល១៥ភាគរយនិងអ្នកនិយាយភាសាអេស្ប៉ាញ១២ភាគរយ។
នៅក្នុងការជជែកដេញដោលដោយបើកចំហរ មេធាវី Adam Mortara បានអះអាងថា សាកលវិទ្យាល័យ Harvard បានប្រើប្រាស់លក្ខណៈវិនិច្ឆ័យផ្ទាល់ខ្លួនដើម្បីទប់ស្កាត់ការចូលរៀនរបស់ជនជាតិអាស៊ីហើយគាំទ្រអ្នកដាក់ពាក្យសុំជាជនជាតិស្បែកខ្មៅ អ្នកនិយាយភាសាអេស្ប៉ាញនិងជនជាតិស្បែកស។
មេធាវីសាកលវិទ្យាល័យលោក Bill Lee បានអះអាងថា “សាកលវិទ្យាល័យ Harvard មិនអាចសម្រេចគោលដៅអប់រំរបស់ខ្លួនដោយមិនពិចារណាលើពូជសាសន៍ទេ”។ លោកអះអាងថា ពូជសាសន៍មិនមែនជារឿងអវិជ្ជមានក្នុងការចុះឈ្មោះចូលរៀនឡើយ។
ស្របពេលជាមួយគ្នានោះ រដ្ឋបាលរបស់លោកប្រធានាធិបតី Donald Trump បានគាំទ្រពាក្យបណ្តឹងនេះដោយអះអាងថា សាកលវិទ្យាល័យ Harvard បានចូលរួមក្នុង “តុល្យភាពពូជសាសន៍” នៅក្នុងដំណើរការចូលរៀនរបស់ខ្លួនដោយតម្លើងថ្លៃសម្រាប់និស្សិតដែលមានប្រភពដើមនៅអាស៊ី៕ AFP
Source: Kampuchea Thmey Daily
0 Comments