ប្រព័ន្ធផ្សព្វផ្សាយរដ្ឋ បានរាយការណ៍ថា ប្រទេសចិន នឹងបណ្តេញអតីតប្រធានប៉ូលិស Interpol លោក Meng Hongwei ចេញពីមុខតំណែងខ្ពស់មួយ បន្ទាប់ពីរដ្ឋាភិបាលចិនបានដាក់ឲ្យគាត់ស្ថិតក្រោមការស៊ើបអង្កេតពាក់ព័ន្ធការស៊ីសំណូកនិងការរំលោភបំពានផ្សេងទៀត។
ក្រោមការដឹកនាំរបស់លោកប្រធានាធិបតី Xi Jinping, ប្រទេសចិនបានចាប់ផ្តើមធ្វើការបង្ក្រាបយ៉ាងពេញទំហឹងទៅលើអំពើពុករលួយ។
កាលពីដើមខែនេះ ប៉ូលិស Interpol ដែលជាស្ថាប័នប៉ូលិសពិភពលោកមានមូលដ្ឋាននៅប្រទេសបារាំងបាននិយាយថា លោក Meng បានលាលែងពីតំណែងជាប្រធានរបស់ខ្លួនបន្ទាប់ពីអាជ្ញាធរបារាំងនិយាយថា មន្ត្រីចិនរូបនេះត្រូវបានភរិយារបស់គាត់រាយការណ៍ថា បានបាត់ខ្លួនក្រោយពេលគាត់ធ្វើដំណើរទៅប្រទេសកំណើតរបស់គាត់។
ទោះបីជាយ៉ាងណាក៏ដោយ វាមិនច្បាស់ទេអំពីកន្លែងដែលលោក Meng ត្រូវបានឃុំខ្លួនហើយគេមិនអាចទាក់ទងទៅគាត់ដើម្បីសុំការបំភ្លឺបានទេ។ វាក៏មិនច្បាស់ផងដែរថាតើគាត់ត្រូវបានគេអនុញ្ញាតឲ្យរក្សាតំណាងផ្នែកច្បាប់ដែរឬទេ។
ប្រព័ន្ធផ្សព្វផ្សាយរដ្ឋបាននិយាយកាលពីល្ងាចថ្ងៃសុក្រថា នៅក្នុងទង្វើចុងក្រោយបំផុតដោយរដ្ឋាភិបាលចិនប្រឆាំងនឹងលោក Meng, ស្ថាប័ននយោបាយ Chinese People's Political Consultative Conference ដែលផ្តល់ដំបូន្មានដល់សភាបើទោះបីជាមិនមានអំណាចនីតិប្បញ្ញត្តិក៏ដោយនោះគឺបានសម្រេចចិត្តបណ្តេញលោកចេញពីស្ថាប័ននេះ។
ទីភ្នាក់ងារសារព័ត៌មានស៊ីនហួបានរាយការណ៍ថា ការសម្រេចនេះនៅតែត្រូវការការយល់ព្រមជាផ្លូវការពីគណៈកម្មាធិការអចិន្ត្រៃយ៍របស់ស្ថាប័ននេះ។
លោក Meng ធ្លាប់ជាសមាជិកនៃគណៈកម្មាធិការកិច្ចការបរទេសរបស់ស្ថាប័ននេះ។
គួរបញ្ជាក់ថា លោក Meng អាយុ៦៤ឆ្នាំនិងជាអនុរដ្ឋមន្ត្រីក្រសួងសន្តិសុខសាធារណៈគឺបានក្លាយជាប្រធានភ្នាក់ងារសហប្រតិបត្តិការប៉ូលិសពិភពលោកនៅចុងឆ្នាំ២០១៦ចំពេលមានកិច្ចខិតខំប្រឹងប្រែងយ៉ាងខ្លាំងក្លារបស់ប្រទេសចិនដើម្បីទទួលបានតំណែងដឹកនាំនៅក្នុងអង្គការអន្តរជាតិ៕ REUTERS
Source: Kampuchea Thmey Daily
0 Comments