កំពង់ឆ្នាំង ៖ ក្រសួងអភិវឌ្ឍន៍ជនបទ បានរៀបចំធ្វើពិធីអប់រំផ្សព្វផ្សាយ អំពីសុវត្ថិភាពចរាចរណ៍ផ្លូវគោក ដល់ប្រជាពលរដ្ឋ នៅក្នុងសាលាបឋមសិក្សាក្រាំងលាវ ឃុំក្រាំងលាវ ស្រុករលាប្អៀរ ខេត្តកំពង់ឆ្នាំង កាលពីថ្ងៃទី១៤ ខែវិច្ឆិកា ឆ្នាំ២០១៨ ក្រោមការអញ្ជើញចូលរួមពីសំណាក់ លោកបណ្ឌិត អ៊ុក រ៉ាប៊ុន រដ្ឋមន្ដ្រីក្រសួងអភិវឌ្ឍន៍ជនបទ លោក ឈួ ច័ន្ទឌឿន អភិបាល នៃគណៈអភិបាលខេត្តកំពង់ឆ្នាំង តំណាងដៃគូអភិវឌ្ឍន៍ អាជ្ញាធរមូលដ្ឋាន ស្រុក ឃុំ លោកមេភូមិ លោកគ្រូ អ្នកគ្រូ ប្រជាពលរដ្ឋ និងសិស្សសរុបចំនួន៦៤០នាក់។
ប្រជាពលរដ្ឋដែលបានចូលរួម គឺសុទ្ធសឹងតែជាប្រជាពលរដ្ឋរស់នៅតាមដងផ្លូវ ដែលបានកែលំអដោយគម្រោងកែលំអផ្លូវជនបទជំហាន២។ ការចុះផ្សព្វផ្សាយលើកនេះ បានផ្សារភ្ជាប់ជាមួយនឹងការខិតជិតមកដល់ នៃពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ជាបុណ្យប្រពៃណីជាតិដ៏ធំ។
សូមបញ្ជាក់ថា នៅក្នុងគម្រោងកែលំអផ្លូវជនបទជំហាន២នេះ មានផ្លូវចំនួន៧០ខ្សែ និងមានប្រវែងសរុបចំនួន១.២០០គីឡូម៉ែត្រ ស្ថិតនៅក្នុងខេត្តចំនួន១០មានដូចជា ខេត្តកំពង់ចាម ត្បូងឃ្មុំ តាកែវ កំពង់ស្ពឺ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ។
ដោយឡែក ការចុះអប់រំផ្សព្វផ្សាយខាងលើនេះ ក្រសួង រៀបចំធ្វើនៅក្នុងខេត្តកំពង់ឆ្នាំង ដែលជាខេត្តមួយមានផ្លូវគម្រោងចំនួន៩ខ្សែ និងមានប្រវែងសរុបចំនួន១២៥គីឡូម៉ែត្រ។
មានប្រសាសន៍នៅក្នុងឱកាសដ៏វិសេសវិសាលនោះ លោក អ៊ុក រ៉ាប៊ុន បានសម្ដែងនូវសេចក្ដីរីករាយដោយបានចូលរួមជួបសំណេះសំណាលដោយផ្ទាល់ជាមួយប្រជាពលរដ្ឋ ព្រមទាំងបានបញ្ជាក់ជូនប្រជាពលរដ្ឋទាំងអស់ថា រាជរដ្ឋាភិបាល រមែងគិតគូរអំពីសុខទុក្ខរបស់ប្រជាពលរដ្ឋគ្រប់ពេល និងគ្រប់កន្លែង។
ជាក់ស្ដែងសមិទ្ធផលក្នុងការសាងសង់ផ្លូវ ស្ពាន សាលារៀន ប្រឡាយទឹក ។- ល-។ គឺសុទ្ធតែបានមកដោយការខិតខំប្រឹងប្រែងគ្មានសំចៃរបស់ថ្នាក់ដឹកនាំរដ្ឋ ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី នៃប្រទេសកម្ពុជា។
ស្របតាមប្រសាសន៍ដ៏ខ្ពង់ខ្ពស់របស់សម្ដេច ដែលតែងរំលឹកថា មានផ្លូវ មានសង្ឃឹមនោះ រាជរដ្ឋាភិបាលកម្ពុជាបានខិតខំកសាងផ្លូវថ្មី និងកែលំអផ្លូវដែលមានស្រាប់ឲ្យបានច្រើនជាងមុន ធំជាងមុន វែងជាងមុន ជាប់ជាងមុន ដើម្បីជូនប្រជាពលរដ្ឋបានប្រើប្រាស់ សម្រួលការធ្វើដំណើរឲ្យបានឆាប់ជាងមុន ស្រួលជាងមុន សំដៅលើកកម្ពស់ជីវភាពប្រជាពលរដ្ឋឲ្យបានប្រសើរជាងមុន។
លោករដ្ឋមន្ត្រី ក៏បានសំណូមពរឲ្យប្រជាពលរដ្ឋ ចូលរួមខិតខំថែរក្សាផ្លូវដែលមាននេះឲ្យប្រើប្រាស់បានយូរអង្វែង ដើម្បីជួយសន្សំសំចៃថវិកាក្នុងការជួសជុល និងជាឧត្ដមប្រយោជន៍ដល់ប្រជាពលរដ្ឋយើងទាំងអស់គ្នា ហើយក៏បានផ្ដាំផ្ញើប្រជាពលរដ្ឋ ឲ្យប្រកាន់ឥរិយាបថធ្វើដំណើរដោយសុវត្ថិភាពមានដូចជា ការមិនបើកបរហួសល្បឿនកំណត់ មិនបើកបរក្រោយពេលទទួលទានគ្រឿងស្រវឹង ត្រូវគោរពស្លាកសញ្ញាចរាចរណ៍ និងត្រូវពាក់មួកសុវត្ថិភាពឲ្យបានត្រឹមត្រូវរៀងរាល់ពេល មិនថាធ្វើដំណើរជិត ឬឆ្ងាយ។
ភ្ជាប់នឹងការពាក់មួកសុវត្ថិភាពនេះដែរ លោករដ្ឋមន្ត្រី ក៏បានណែនាំប្រជាពលរដ្ឋ និងសិស្សានុសិស្សឲ្យបានដឹងពីវិធីជ្រើសរើសមួយចំនួនដែលជួយឲ្យអាចទិញមួកដែលមានគុណភាពល្អ ត្រូវតាមស្តង់ដារបាន។
ការពាក់មួកដែលប្រកបដោយគុណភាពល្អ នឹងអាចជួយការពារក្បាលបានប្រសើរជាងមួកដែលមិនមានគុណភាពត្រឹមត្រូវ។
នៅក្នុងពិធីអប់រំផ្សព្វផ្សាយនេះ លោក អ៊ុក រ៉ាប៊ុន ក៏បានផ្ដល់មួកសុវត្ថិភាពចំនួន១២៥មួក ជូនដល់សិស្ស និងលោកមេឃុំ និងមេប៉ុស្តិ៍ មកពី១៣ឃុំ នៅក្នុងស្រុករលាប្អៀរ និងសិស្សានុសិស្សដែលជាសិស្សពូកែនៅក្នុងថ្នាក់រៀន។
ក្រៅពីមួកសុវត្ថិភាព ក៏មានការផ្ដល់ជូននូវសម្ភារៈសិក្សាដល់សិស្សដែលបានចូលរួម ចំនួន៣០០នាក់ ក្នុងនោះសិស្សពូកែប្រចាំថ្នាក់ចំនួន៥៣នាក់ បានទទួលសៀវភៅសរសេរចំនួនប្រាំក្បាល និងប៊ិចចំនួនមួយដើម រីឯសិស្សផ្សេងទៀតទទួលបានសៀវភៅសរសេរចំនួនមួយក្បាល និងប៊ិចចំនួនមួយដើមផងដែរ។
សូមបញ្ជាក់ថា តាមរបាយការណ៍ នៃប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍ផ្លូវគោកនៅប្រទេសកម្ពុជា បង្ហាញថារៀងរាល់ពេលបុណ្យជាតិធំៗ រមែងមានចំនួនគ្រោះថ្នាក់កើតឡើងច្រើនជាងពេលធម្មតា។
ក្នុងនោះពិធីបុណ្យអុំទូក គឺជាពេលដែលមានគ្រោះថ្នាក់ចរាចរណ៍ខ្ពស់គួរឲ្យកត់សម្គាល់មួយ។ ជាក់ស្ដែង កំឡុងរយៈពេល៧ថ្ងៃ ក្នុងពេលអុំទូកកាលពីឆ្នាំ២០១៧កន្លងមក មានគ្រោះថ្នាក់ចរាចរណ៍កើតឡើង និងបណ្ដាលឲ្យមានអ្នករងគ្រោះដល់ជីវិតចំនួន៥៥នាក់ របួសធ្ងន់១០១នាក់ របួសស្រាល១៣៣នាក់។
សរុបមក ក្នុងឱកាសនោះ មានមនុស្សបាត់បង់ជីវិតជាមធ្យមចំនួន៨នាក់ ក្នុងមួយថ្ងៃ ដែលធម្មតាមានអ្នកស្លាប់ត្រឹមតែ៥នាក់ប៉ុណ្ណោះក្នុងមួយថ្ងៃ៕
Source: Kampuchea Thmey Daily
0 Comments