ភ្នំពេញ ៖ ដោយបានជោគជ័យទៅលើប្រជាកសិករនៅតាមបណ្ដាខេត្ត មិនអាចប្រកួតប្រជែងទីផ្សារបានជាមួយ ក្រុមហ៊ុនស៊ីភីកម្ពុជា(CP) ក្នុងការកាប់ជ្រូកលក់, ក្រុមហ៊ុនCP កាន់តែមានមហិច្ឆតាគ្របដណ្ដប់ មកលើអាជីវករដែលជាដៃគូរកស៊ីជាមួយគ្នាឲ្យដួលរលំ ក្នុងគោលបំណងផ្ដាច់មុខ ងាយស្រួលដំឡើងតម្លៃទីផ្សារស្រេចអំពើចិត្ត ទើបធ្វើឲ្យអាជីវករសត្តឃាតនៅទូទាំងរាជធានីភ្នំពេញ ផ្ទុះការតវ៉ា ឡើងស្នើសុំឲ្យក្រុមហ៊ុនCP បញ្ឈប់ការកាប់ជ្រូកលក់នៅលើទីផ្សារ ព្រោះថាក្រុមហ៊ុនជាអ្នកផ្គត់ផ្គង់លក់ជ្រូករស់ឲ្យអាជីវករសត្តឃាតកាប់ជ្រូកលក់សាច់បែរជាខ្លួនឯង(ក្រុមហ៊ុនCP) កាប់ជ្រូកលក់សាច់ដែរ ហើយក្នុងតម្លៃថោកជាងទៀត។
នេះជាការលើកឡើងរបស់ លោកស្រី ហាវ ឈួនវង តំណាងឲ្យអាជីវករសត្តឃាតជ្រូកនៅរាជធានីភ្នំពេញ ក្នុងកិច្ចប្រជុំពិភាក្សារកដំណោះស្រាយ រវាងក្រមហ៊ុនស៊ីភីកម្ពុជា(CP) ជាមួយអាជីវករសត្តឃាត និងបានការចូលរួមពីមន្ត្រីជំនាញរបស់មន្ទីរកសិកម្ម រុក្ខាប្រមាញ់ និងនេសាទ រាជធានីភ្នំពេញ កាលពីរសៀលថ្ងៃទី១៥ ខែវិច្ឆិកា ឆ្នាំ២០១៨។
លោកស្រី ហាវ ឈួនវង បានលើកឡើងថា នៅក្នុងរាជធានីភ្នំពេញ មានអាជីវករសត្តឃាតជ្រូកប្រមាណជាង៩០ភាគរយ ដែលទិញជ្រូករស់ពីក្រុមហ៊ុនស៊ីភីកម្ពុជា យកមកកាប់សាច់លក់បន្ត ចែកចាយទៅអាជីវករផ្សេងទៀតនៅតាមបណ្ដាផ្សារក្នុងរាជធានីភ្នំពេញ ប៉ុន្តែជាងមួយឆ្នាំចុងក្រោយនេះ ក្រុមហ៊ុនស៊ីភី បានក្រឡុកទីផ្សារ ដោយសារតែ ក្រុមហ៊ុន បានលក់ជ្រូកឲ្យអាជីវករកាប់សាច់ហើយ បែរជាកាប់សាច់លក់ខ្លួនឯង ដោយប្រកួតប្រជែងតម្លៃជាមួយអ្នកកាប់ជ្រូកដែលទិញបន្តពីខ្លួនទៅវិញ ដែលអ្នកស្រីបានបញ្ជាក់ថា ក្រុមហ៊ុនលក់ជ្រូកឲ្យតំណាងចែកចាយជ្រូករស់ថ្លៃជាងការកាប់លក់ខ្លួនឯង ក្នុងមួយក្បាលខុសគ្នា រហូតដល់៧ម៉ឺនរៀល។
អាជីវករទិញជ្រូករបស់ក្រុមហ៊ុន១០០គីឡូក្រាម តម្លៃ៨៧ម៉ឺនរៀល បូកតម្លៃសេវាកម្ម ស្មើ៨៩ម៉ឺនរៀល។ ប៉ុន្តែពេលដែលក្រុមហ៊ុនកាប់លក់ខ្លួនឯង១០០គីឡូក្រាម ត្រឹមតែ៧៨៧.០០០រៀលតែប៉ុណ្ណោះ ដូច្នេះក្នុងមួយក្បាលអាជីវករកាប់ជ្រូកត្រូវខាតបង់អស់៦២.០០០រៀល។
ក្រៅពីនោះ អាជីវករក៏បានលើកឡើងពីបញ្ហាដែលជញ្ជីងថ្លឹងរបស់ក្រុមហ៊ុនស៊ីភី មិនត្រឹមត្រូវថែមទៀតផង។ អ្វីដែលអាជីវករកាប់ជ្រូកទាំងអស់ សំណូមពរទៅក្រុមហ៊ុនស៊ីភីនោះ គឺសូមឲ្យក្រុមហ៊ុនបញ្ឈប់សកម្មភាពកាប់ជ្រូកលក់ដោយខ្លួនឯង បើត្រឹមកាប់សាច់ដើម្បីធ្វើប្រហិត ឬ ហតដក មិនជាបញ្ហានោះទេ។
បើក្រុមហ៊ុននៅតែបន្តបែបនេះ អាជីវករទាំងអស់ នឹងដាក់ញត្តិស្នើសុំការអន្តរាគមន៍ពីសម្ដេចតេជោហ៊ុន សែន នាយករដ្ឋមន្ត្រី។
ជាការឆ្លើយតប លោក សុផាត ចាន់វង្ស តំណាងក្រុមហ៊ុនស៊ីភីកម្ពុជាបានឲ្យដឹងថា លោកនឹងយកសំណើនេះ ទៅថ្នាក់ដឹកនាំរបស់ក្រុមហ៊ុន ដោយសារតែលោកមិនមានសិទ្ធិសម្រេចបែបណានោះឡើយ ហើយបានសន្យាថា យ៉ាងយូរនៅថ្ងៃច័ន្ទសប្ដាហ៍ក្រោយ នឹងជូនលទ្ធផលមកកាន់អាជីវករកាប់ជ្រូកវិញ។
ដោយឡែក លោក យ៉ាន់ពៅ ប្រធានការិយាល័យផលិតកម្ម និងបសុព្យាបាលរាជធានីភ្នំពេញមិនបានឆ្លើយតបអ្វីទាំងអស់ បើទោះបីជាអ្នកសារព័ត៌មាន ព្យាយាមចង់បានការបង្ហាញទស្សនៈរបស់គាត់ ក្នុងនាមជាមន្ត្រីជំនាញដែលបានចូលរួមក្នុងការស្វែងរកដំណោះស្រាយនេះ។
អាជីវកភាគច្រើនបានបង្ហើបឲ្យដឹងថា ក្រុមហ៊ុនស៊ីភីកម្ពុជា ធ្វើបែបនេះ គឺមានបំណងចង់ចែកចាយផ្ដាច់មុខនូវសាច់ជ្រូកទូទាំងប្រទេស ធ្វើឲ្យកសិករ និងអាជីវករខ្មែរ លែងមានមុខរបរ ដើម្បីឲ្យក្រុមហ៊ុនខ្លួន មានឱកាសចែកចាយសត្វជ្រូក ក្នុងតម្លៃបែបណាក៏បាន នៅពេលដែលអាជីវករសត្តឃាតទ្រាំនឹងការខាតបង់លែងបាន។
សូមបញ្ជាក់ថា កិច្ចពិភាក្សាស្វែងដំណោះស្រាយខាងលើនេះ មានការចូលរួមពី លោក ភោគ យី ប្រធានសម្របសម្រួល, លោក យ៉ាន់ ពៅ ប្រធានការិយាល័យផលិតកម្ម និងបសុព្យាបាល រាជធានីភ្នំពេញ, តំណាងក្រុមហ៊ុន CP កម្ពុជា លោក សុផាត ចាន់វង្ស (Sophat Chanwong) ជាជនជាតិថៃ ព្រមទាំងអាជីវករចែកចាយ អាជីវករសត្តឃាតជិត១០០នាក់។
នៅក្នុងកិច្ចប្រជុំខាងលើនេះ ក្រុមអាជីវករដែលកំពុងជួបផលលំបាក បានស្នើសុំ៣ចំណុចធំៗដាក់ជូនក្រុមហ៊ុន គឺឲ្យបញ្ឈប់ជាបន្ទាន់នូវការកាប់ជ្រូកដោយខ្លួនឯង ដែលធ្វើឲ្យខាតបង់ដល់អាជីវកររកមិនចំណេញហើយ ការបោះប៉ាយឲ្យមានភាពសមស្រប ព្រមទាំងសំណូមពរឲ្យមានការថ្លឹងជ្រូកឲ្យបានត្រឹមត្រូវ ពីព្រោះកន្លងមកបាត់គីឡូច្រើនណាស់៕
Source: Kampuchea Thmey Daily
0 Comments