រតនគិរី ៖ ជនសង្ស័យម្នាក់ ត្រូវបានកម្លាំងអធិការនគរបាលព្រហ្មទណ្ឌស្រុកបរកែវ សហការជាមួយកម្លាំងប៉ុស្តិ៍ឡាមិញ ឃាត់ខ្លួនពាក់ព័ន្ធករណីរំលោភសេពសន្ថវៈលើនារីម្នាក់បានសម្រេច។
ហេតុការណ៍នេះ បានកើតឡើងកាលពីវេលាម៉ោង០២និង០៥នាទីរសៀល ថ្ងៃទី១៥ ខែវិច្ឆិកា ឆ្នាំ២០១៨កន្លងទៅ ត្រង់ចំណុចភូមិគ្លិះ ឃុំស៊ើង ស្រុកបរកែវ ខេត្តរតនគិរី។
អធិការនគរបាលស្រុកបរកែវ លោក ជួប វណ្ណរក្ស បានឲ្យដឹងថា ជនសង្ស័យ ឈ្មោះ ទីង ទឹម ភេទប្រុស អាយុ៣២ឆ្នាំ ជនជាតិទំពួន សញ្ជាតិខ្មែរ មុខរបរធ្វើចម្ការ មានទីលំនៅសព្វថ្ងៃភូមិសំ ឃុំតេន ស្រុកអូរយ៉ាដាវ ខេត្តរតនគិរី។
លោកថា ការឃាត់ខ្លួនជនសង្ស័យខាងលើនេះ ដោយយោងតាមពាក្យបណ្ដឹងរបស់ម្ដាយជនរងគ្រោះ កាលពីថ្ងៃទី១៤ ខែវិច្ឆិកា ឆ្នាំ២០១៨ វេលាម៉ោង០៨និង០០នាទីព្រឹក រីឯជនរងគ្រោះមិនត្រូវបានសមត្ថកិច្ចប្រាប់ពីអត្តសញ្ញាណនោះឡើយ ដោយសារពាក្យបណ្ដឹងកាលពីថ្ងៃទី១៤វិច្ឆិកា កន្លងទៅ។
បច្ចុប្បន្ន ជនសង្ស័យ ត្រូវកម្លាំងនគរបាលជំនាញឃាត់ខ្លួន និងកសាងសំណុំរឿងបញ្ជូនទៅអយ្យការអមសាលាដំបូងខេត្ត ដើម្បីផ្ដន្ទាទោសទៅតាមផ្លូវច្បាប់៕
Source: Kampuchea Thmey Daily
0 Comments