ភ្នំពេញ ៖ សេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៩ ត្រូវបានសម័យប្រជុំរដ្ឋសភាលើកទី១ នីតិកាលទី៦ ព្រឹកថ្ងៃទី១៥ ខែវិច្ឆិកានេះអនុម័តដោយសំឡេង ១១៣ នៃសមាជិកសមាជិការដ្ឋសភាទាំងមូលដែលបានចូលរួម។
សម័យប្រជុំនេះ ដឹកនាំដោយសម្ដេចអគ្គមហាពញាចក្រី ហេង សំរិន ប្រធានរដ្ឋសភា និងដោយមានវត្តចូលរួមពីសមាជិកសមាជិការដ្ឋសភាក្នុងពេលដំបូង ១១៥រូប។
ឯកឧត្តមបណ្ឌិតរដ្ឋ ជាម យៀប ប្រធានគណៈកម្មការសេដ្ឋកិច្ចហិរញ្ញវត្ថុ ធនាគារ និងសវនកម្មនៃរដ្ឋសភា ថ្លែងថា សេចក្តីព្រាងច្បាប់នេះ មានគោលដៅគាំទ្រដល់ការអនុវត្តកម្មវិធីនយោបាយរបស់រាជរដ្ឋាភិបាល ជាពិសេសការអនុវត្តអាទិភាពគោលនយោបាយសំខាន់ៗ និងវិធានការកែទម្រង់ជាក់លាក់ក្នុងការបម្រើប្រជាពលរដ្ឋ។
ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ តំណាងរាជរដ្ឋាភិបាលឡើងការពារច្បាប់នេះ បានលើកឡើងថា ច្បាប់ថវិកាឆ្នាំ២០១៩នេះ គឺត្រូវបានរៀបចំឡើងតាមគោលនយោបាយពង្រឹងការគ្រប់គ្រងថវិកា ក្នុងគោលដៅដោះស្រាយឱ្យបានជាសារវ័ន្តនូវសេចក្តីត្រូវការ ក្នុងការឆ្លើយតបទៅនឹងអាទិភាពគោលនយោបាយធំៗរបស់រាជរដ្ឋាភិបាល និងតម្រូវការជាចាំបាច់ជាមូលដ្ឋានរបស់ក្រសួងស្ថាប័ននានា ដើម្បីបម្រើ និងផ្តល់នូវការឆ្លើយតបប្រកបដោយប្រសិទ្ធភាពទៅនឹងការទន្ទឹងរង់ចាំ និងបំណងប្រាថ្នារបស់ប្រជាជន ដែលជាម្ចាស់ឆ្នោតនៅក្នុងឆ្នាំ២០១៩ ដែលជាឆ្នាំទី១ នៃរាជរដ្ឋាភិបាលនីតិកាលទី៦ នៃរដ្ឋសភា ជាពិសេសការអនុវត្តឱ្យចេញជាលទ្ធផលជាក់ស្តែងប្រកបដោយប្រសិទ្ធភាពនូវកម្មវិធី នយោបាយ និងយុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាល។ ក្របខ័ណ្ឌថវិកានេះក៏មានគោលដៅធានារក្សានូវសមិទ្ធផល នៃការអភិវឌ្ឍទាំងពួង ដែលសម្រេចបាននៅក្នុងនីតិកាលមុនៗកន្លងមក ក៏ដូចជាការរក្សាការពារឱ្យបានដាច់ខាតនូវអធិបតេយ្យភាពរបស់កម្ពុជា ក្នុងឋានៈជារដ្ឋមួយដែលមានឯករាជ្យភាពពេញបរិបូណ៌ និងការខំប្រឹងងើបឈរឡើង ដើម្បីធ្វើជាម្ចាស់លើកជោគវាសនារបស់ខ្លួនដោយខ្លួនឯងទាំងនៅក្នុងអតីតកាល បច្ចុប្បន្ន និងតទៅអនាគត។
តាមសេចក្តីថ្លែងហេតុអំពីសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៩ របស់រាជរដ្ឋាភិបាលបានបង្ហាញថា សម្រាប់ឆ្នាំ២០១៩ រាជរដ្ឋាភិបាលបានកំណត់ការចំណាយថវិកាថ្នាក់ជាតិសរុបចំនួន ២៥ ៧៦៥ ០២៨លានរៀល ត្រូវជា ២៣,៤៥%នៃ ផ.ស.ស មានកំណើន ១០%ធៀបឆ្នាំ២០១៨។ ក្នុងនោះចំណាយលើបន្ទុកបុគ្គលិក ចំណាយក្រៅបន្ទុកបុគ្គលិក ចំណាយទៅតាមវិស័យគ្របដណ្តប់លើក្រសួងស្ថាប័នទាំង ៣៩ នៅថ្នាក់ជាតិ ចំណាយទៅលើការគាំទ្រគម្រោងវិនិយោគសាធារណៈជាអាទិភាព ចំណាយលើការទូទាត់ប្រាក់ខ្ចី ចំណាយលើផ្នែករដ្ឋបាលថ្នាក់ក្រោមជាតិ(រាជធានី ខេត្ត ក្រុង ស្រុក និងឃុំ សង្កាត់) និងចំណាយទៅលើផ្នែកសង្គមកិច្ចផងដែរ។
ក្នុងគោលបំណងសម្រេចឱ្យបាននូវគោលនយោបាយនេះដែរ រាជរដ្ឋាភិបាលក៏បានគ្រោងចំណូលថវិកាថ្នាក់ជាតិសរុបជាង ២៣% នៃ ផ.ស.ស ផងដែរ៕
Source: Kampuchea Thmey Daily
0 Comments