មន្ត្រី​ព្រឹទ្ធសភា​បារាំង​ម្នាក់ ​ត្រូវបាន​ចាប់ខ្លួន​ពីបទ​ធ្វើ​ចារកម្ម​ឲ្យ​កូរ៉េខាងជើង

ប្រភព​តុលាការ​នៅ​ទីក្រុង​ប៉ារីស​បាន​និយាយ​ថា ភ្នាក់ងារ​ស៊ើបការណ៍​សម្ងាត់​បាន​ចាប់ខ្លួន​មន្ត្រី​ជាន់ខ្ពស់​បារាំង​ម្នាក់​ពី​បទ​ធ្វើ​ចារកម្ម​ឲ្យ​ប្រទេស​កូរ៉េខាងជើង។

លោក Benoit Quennedey ប្រធាន​សមាគម​មិត្តភាព​បារាំង​-​កូរ៉េ​ដែល​សរសេរ​សៀវភៅ​អំពី​ប្រទេស​ឯកោ​មួយ​នេះ​ត្រូវបាន​ឃុំឃាំង​កាលពី​ថ្ងៃអាទិត្យ​។​

ប្រភព​តុលាការ​បាន​និយាយ​កាលពី​ថ្ងៃ​ចន្ទ​ថា រដ្ឋអាជ្ញា​ទីក្រុង​ប៉ារីស​កំពុង​ស៊ើបអង្កេត​គាត់​អំពី​ការប្រមូល​និង​ការ​ផ្តល់ព័ត៌មាន​ដល់​មហាអំណាច​បរទេស​ដែល​ទំនងជា​ធ្វើ​ឲ្យ​ប៉ះពាល់​ដល់​ផលប្រយោជន៍​ជា​មូលដ្ឋាន​របស់​ជាតិ​។​

ប្រភព​ដដែល​និយាយថា ក្រុម​អ្នកស៊ើប​អង្កេត​មកពី​ទីភ្នាក់ងារ​ចារកម្ម​ក្នុងស្រុក DGSI របស់​ប្រទេស​បារាំង​កំពុង​ពិនិត្យ​មើលថា​តើ​លោក Quennedey បានផ្តល់​ព័ត៌មាន​ទៅកាន់​ទីក្រុង​ព្យុងយ៉ាង​ដែរ​ឬក៏​អត់​។​

កម្មវិធី​ទូរទស្សន៍​ប្រចាំថ្ងៃ Quotidien បាន​រាយការណ៍​ថា ការិយាល័យ​ព្រឹទ្ធសភា​របស់គាត់​ត្រូវបាន​គេ​វាយឆ្មក់​។ ការស៊ើបអង្កេត​នេះ​បានចាប់ផ្តើម​នៅក្នុង​ខែមីនា​។​

យោងតាម​វេ​ប​សាយ​ព្រឹទ្ធសភា​បានបង្ហាញ​ថា លោក Quennedey គឺជា​អ្នកគ្រប់គ្រង​ជាន់ខ្ពស់​នៅក្នុង​សភា​ជាន់ខ្ពស់​របស់​បារាំង​នៃ​នាយកដ្ឋាន​ស្ថាបត្យកម្ម បេ​តិក​ភ័​ណ្ឌ​និង​សួនច្បារ​។​

ជា​ញឹកញាប់ គាត់​បាន​សរសេរ​អត្ថបទ​អំពី​ប្រទេស​កូរ៉េខាងជើង​និង​បានធ្វើ​ដំណើរ​យ៉ាង​ទូលំទូលាយ​នៅ​ទូទាំង​ឧបទ្វីប​។ នេះ​បើ​យោងតាម​វេ​ប​សាយ Delga របស់គាត់​។​

សមាគម​មិត្តភាព​បារាំង - កូរ៉េ​បាន​ជំរុញ​ឲ្យ​មាន​ទំនាក់ទំនង​កាន់តែ​ជិតស្និទ្ធ​ជាមួយ​កូរ៉េខាងជើង​និង​គាំទ្រ​ការបង្រួបបង្រួម​កូរ៉េ​ទាំងពីរ​ដែល​បែកបាក់​គ្នា​។​

នៅក្នុង​បទសម្ភាសន៍​មួយ​ដែល​បាន​បង្ហោះ​នៅលើ​គេហទំព័រ YouTube កាលពី​ខែសីហា លោក Quennedey បាន​ស្វាគមន៍​ចំពោះ​ការបន្ធូរបន្ថយ​ភាព​តានតឹង​រវាង​កូរ៉េ​ទាំងពីរ​។​
​ទោះបីជា​យ៉ាងណាក៏ដោយ ប្រធានព្រឹទ្ធសភា​បាន​បដិសេធ​ធ្វើ​អត្ថាធិប្បាយ​៕ AFP


Source: Kampuchea Thmey Daily