ភ្នំពេញ ៖ មន្ត្រីជាន់ខ្ពស់ក្រសួងការងារ និងបណ្ដុះបណ្ដាល វិជ្ជាជីវៈ បានឲ្យដឹងថា ប្រទេស កម្ពុជាមានប្រាក់ឈ្នួលអប្បបរមាខ្ពស់ជាងប្រទេសនាំចេញផលិតផលកាត់ដេរ និងផលិតស្បែកជើង ដែលជាដៃគូប្រកួតប្រជែងរបស់កម្ពុជា។
ថ្លែងនៅក្នុងពិធីបើកសិក្ខាសាលាកម្រិតខ្ពស់ ស្ដីពីការពិនិត្យតាមដានប្រាក់ឈ្នួលអប្បបរមា នៅសណ្ឋាគារ រ៉ាហ្វ៊ល ឡីរ៉ូយ៉ាល់ភ្នំពេញ កាលពីថ្ងៃទី២៦ ខែវិច្ឆិកា ឆ្នាំ២០១៨ លោក ហេង សួរ រដ្ឋលេខាធិការ ក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា បើគិតត្រឹមថ្ងៃ២៦ ខែវិច្ឆិកា ឆ្នាំ២០១៨ ប្រទេសកម្ពុជា មានប្រាក់ឈ្នួលអប្បបរមាខ្ពស់ជាងប្រទេសនាំចេញផលិតផលកាត់ដេរ និងផលិតស្បែកជើង ដែលជាដៃគូប្រកួតប្រជែងរបស់យើងក្នុងវិស័យនេះមួយចំនួនដូចជា ប្រទេសបង់ក្លាដេស ស្រីលង្កា ឥណ្ឌា មីយ៉ាន់ម៉ា ប៉ាគីស្ថាន ឡាវ តំបន់មួយចំនួន នៃប្រទេសឥណ្ឌូនេស៊ី និងខ្ពស់ជាងតំបន់ទី២ ទី៣ និងទី៤ នៃប្រទេសវៀតណាម ផងដែរ។
លោកបានបន្តថា កម្ពុជា បានបន្តដំឡើងប្រាក់ឈ្នួលអប្បបរមាសម្រាប់វិស័យវាយនភណ្ឌកាត់ដេរសំលៀកបំពាក់ និងផលិតស្បែកជើងជាបន្តបន្ទាប់ ពីចំនួន៤០ដុល្លារអាមេរិក ក្នុងមួយខែ នៅក្នុងឆ្នាំ ១៩៩៧ ដល់១៨២ដុល្លារអាមេរិក ក្នុងមួយខែ នៅឆ្នាំ២០១៩ ខាងមុខនេះ បូកនឹងប្រាក់អត្ថប្រយោជន៍បន្ថែមផ្សេងៗទៀត កម្មករនិយោជិតម្នាក់ អាចទទួលបានប្រាក់ឈ្នួលជាមធ្យមពី១៩៩ ដល់ ២១០ដុល្លារអាមេរិកក្នុងមួយខែ ដែលកម្រិតប្រាក់ឈ្នួលនេះ បានជួយធ្វើឲ្យកម្រិតជីវភាពរស់នៅរបស់បងប្អូនកម្មករនិយោជិកកាន់តែប្រសើរ។
ទន្ទឹមនឹងនេះ ក្រសួងការងារ និងបណ្ដុះបណ្ដាលវិជ្ជាជីវៈ នឹងខិតខំបង្កើតការងារថ្មីល្អកាន់តែច្រើន និងរក្សាការងារដែលមានស្រាប់ ដើម្បីជួយឲ្យប្រជាជនយើងមានការងារ មុខរបរ អាជីព ការគាំពារសង្គម និងជីវភាពកាន់តែប្រសើរឆ្លើយតបទៅនឹងសេចក្ដីប្រាថ្នាកាន់តែខ្ពស់របស់ខ្លួន។
ជាក់ស្ដែង ឆ្នាំ២០១៨នេះ វិស័យការងារបន្តរីកចម្រើន អត្រាមានការងារធ្វើ៩៩,៣% នៃកម្លាំងពលកម្មសរុបប្រមាណជិត១០លាននាក់។
សហគ្រាស គ្រឹះស្ថាន សេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារ និងបណ្ដុះបណ្ដាល មានចំនួនសរុបជាង១ម៉ឺន២ពាន់ និងមានកម្មករនិយោជិកសរុបចំនួនជិត១លាន៥សែននាក់, សហគ្រាស គ្រឹះស្ថានសេដ្ឋកិច្ចក្រៅប្រព័ន្ធសរុបមានចំនួនជិត៦សែន មានកម្មករចំនួនជាង២លាន៤សែននាក់, វិស័យកសិកម្មប្រមាណជាង៤លាននាក់, ពលករធ្វើការនៅក្រៅប្រទេសមានចំនួនប្រមាណ១លាន២សែន និងមន្ត្រីសាធារណៈចំនួនប្រមាណជាង៥សែននាក់៕
Source: Kampuchea Thmey Daily
0 Comments