ប្រទេស​ម៉ិ​ក​ស៊ិ​ក​និរទេស​ជន​ចំណាកស្រុក​អាមេរិក​កណ្តាល​ជាច្រើន​នាក់

ប្រទេស​ម៉ិ​ក​ស៊ិ​កបាន​និរទេស​ជន​ចំណាកស្រុក​អាមេរិក​កណ្តាល​ជាច្រើន​នាក់​ដែល​ត្រូវបាន​ចាប់ខ្លួន​បន្ទាប់ពី​មនុស្ស​រាប់រយ​នាក់ ​បាន​បង្ខំ​ធ្វើដំណើរ​ឆ្លងកាត់​របាំង​ប៉ូលិស​ម៉ិ​ក​ស៊ិ​ក​ ហើយ​ឆ្ពោះ​ដំណើរ​ទៅ​សហរដ្ឋអាមេរិក​ ប៉ុន្តែ​ត្រូវ​ជួបប្រទះ​ជាមួយ​ឧស្ម័ន​បង្ហូរទឹកភ្នែក​និង​គ្រាប់កាំភ្លើង​ជ័រ។

បុរស ស្ត្រី​និង​កុមារ​ប្រហែល​៥០០​នាក់​ដែលជា​ផ្នែក​មួយ​នៃ​ក្បួន​មនុស្ស​ប្រហែល​៥,០០០​នាក់​ភាគច្រើន​ជា​ជនជាតិ​ហុង​ឌូ​រ៉ា​សបាន​ឡើង​របង​ដែក​ហើយ​ឆ្ពោះទៅ​ទីក្រុង San Diego កាលពី​ថ្ងៃអាទិត្យ។

ក្រុម​នេះ​ត្រូវ​បាន​បញ្ឈប់​ដោយ​របង​ចាក់​ច្រវាក់​ ដែលមាន​ដាក់​លួស​បន្លា​នៅ​ខាងលើ​ហើយ​ភ្នាក់ងារ​ល្បាត​ព្រំដែន​របស់​សហរដ្ឋអាមេរិក​បាន​បាញ់​ឧស្ម័ន​បង្ហូរទឹកភ្នែក​និង​គ្រាប់កាំភ្លើង​ជ័រ​។ បុរស​យ៉ាងតិច​ម្នាក់​បាន​រង​របួស។

ប្រធាន​ភ្នាក់ងារ​ល្បាត​លោក Rodney Scott បាន​ប្រាប់ CNN ថា “​ជនអន្តោប្រវេសន៍​មួយចំនួនធំ​ដែល​ភាគច្រើន​ជា​បុរស​បាន​ឆ្លងកាត់​វា​ហើយ​៤២​នាក់​ក្នុងចំណោម​ពួកគេ​ត្រូវបាន​ចាប់ខ្លួន​”​។​

លោក Gerardo Garcia ស្នងការ​នៃ​វិទ្យាស្ថាន​ជាតិ​ចំណាកស្រុក​របស់​ម៉ិ​ក​ស៊ិ​ក​បានបញ្ជាក់​ពី​ការចាប់ខ្លួន​មនុស្ស​៩៨​នាក់​នៅ​ប្រទេស​របស់គាត់​ដោយ​និយាយថា មាន “​អ្នក​ញុះញង់​” ក្នុងចំណោម​ជន​ចំណាកស្រុក​ដែល​ជំរុញ​ឲ្យ​មនុស្ស​ឆ្លងដែន​ដោយ​ខុសច្បាប់​។​

ឧបទ្ទវ​ហេតុនេះ​គឺជា​សភាព​ធ្ងន់ធ្ងរ​បំផុត​ក្នុង​វិបត្តិ​រយៈពេល​មួយ​សប្តាហ៍​ដែល​លោក​ប្រធានាធិបតី​អាមេរិក Donald Trump បាន​ប្រើ​ដើម្បី​ជួយ​ទាក់ទាញ​ការគាំទ្រ​ដល់​ការបោះឆ្នោត​ពាក់កណ្តាល​អាណត្តិ​នៅ​ខែ​នេះ​។​

ប៉ុស្តិ៍​ព្រំដែន San Ysidro ឆ្លងកាត់​មកពី​ទីក្រុង Tijuana ដែល​ជា​ច្រក​ឆ្លងដែន​អាមេរិក​-​ម៉ិ​ក​ស៊ិ​ក​ដ៏​មមាញឹក​បំផុត​បាន​បិទ​ការ​ធ្វើ​ចរាចរណ៍​ និង​អ្នក​ថ្មើរជើង​ជាច្រើន​ម៉ោង​បន្ទាប់ពី​ឧបទ្ទវ​ហេតុនេះ​។​

ជន​ចំណាកស្រុក​ជាច្រើន​នាក់​បាន​និយាយថា ពួកគេ​កំពុង​ភៀសខ្លួន​ចេញពី​អំពើ​ហិង្សា​និង​ភាព​ក្រីក្រ​នៅក្នុង​ប្រទេស​ហុង​ឌូ​រ៉ា​ស​ដើម្បី​ស្វែងរក​សិទ្ធិ​ជ្រកកោន​នៅ​ភាគ​ខាងជើង​នៃ​ព្រំដែន៕ AFP

​

Source: Kampuchea Thmey Daily