ភ្នំពេញ ៖ បុរសម្នាក់និងស្ត្រីម្នាក់ ត្រូវបានប្រជាជនជាម្ចាស់ផ្ទះ២ទីតាំងផ្សេងៗគ្នា ចាប់ខ្លួនទុកប្រគល់ឲ្យនគរបាលមូលដ្ឋានចាត់ការតាមច្បាប់ ចោទពីបទចូលមកក្នុងផ្ទះប៉ុនប៉ងលួចទ្រព្យសម្បត្តិតែមិនបានសម្រេច កាលពីអំឡុងយប់ថ្ងៃទី១២ ខែវិច្ឆិកា ឆ្នាំ២០១៨ នៅសង្កាត់ទឹកថ្លានិងសង្កាត់គោកឃ្លាង ខណ្ឌសែនសុខ។ ប៉ូលិសបាននិយាយថា ជនសង្ស័យទាំង២ ទី១.ឈ្មោះ កែវ ស្រីនិច អាយុ២១ឆ្នាំ គ្មានមុខរបរនិងទីលំនៅច្បាស់លាស់ ត្រូវបានគេចាប់ខ្លួននៅវេលាម៉ោង ២១និង
៣០នាទីយប់ នៅភូមិដីថ្មី សង្កាត់គោកឃ្លាង ចោទប្រកាន់ដោយស្ត្រីឈ្មោះ សៀងធី អាយុ៥៣ឆ្នាំជាជនរងគ្រោះនិងជាម្ចាស់ផ្ទះ ជនរងគ្រោះបញ្ជាក់ថា ជនសង្ស័យ បានលបលួចឡើងមករើកកាយនៅលើផ្ទះគាត់ប៉ុនប៉ងលួចយកលុយកាក់ ខណៈគាត់កំពុងនៅជាន់ក្រោមរៀបចំធ្វើម្ហូបដាំបាយ។
ជនសង្ស័យទី២. ឈ្មោះ ចាន់ សុធឿន ភេទប្រុស អាយុ៣៦ឆ្នាំ គ្មានមុខរបរនិងទីលំនៅពិតប្រាកដ ត្រូវបានចាប់ខ្លួននៅវេលាម៉ោង២២និង៣០នាទីយប់ថ្ងៃទី១២ខែវិច្ឆិកា ឆ្នាំ២០១៨ នៅភូមិបុរី១០០ខ្នង សង្កាត់ទឹកថ្លា ដែលចោទប្រកាន់ដោយលោក ឃឹម អ៊ុកភារម្យ អាយុ៣៤ឆ្នាំជាជនរងគ្រោះនិងជាម្ចាស់ផ្ទះ។ ជនសង្ស័យរូបនេះ ត្រូវបានចាប់ខ្លួនខណៈគេលបចូលមកពួននៅក្រោមគ្រែនៅលើផ្ទះប៉ុនប៉ងលួចលុយកាក់និងទ្រព្យសម្បត្តិ នៅគ្រាដែលម្តាយជនរងគ្រោះនៅផ្ទះតែម្នាក់ឯងបានដឹងថា មានចោរចូលផ្ទះហើយក៏ទូរស័ព្ទហៅជនរងគ្រោះឲ្យមកចាត់ការ។
ប៉ូលិសនិយាយថា ជនទាំង២នាក់មានផ្ទុកនូវសារធាតុញៀនក្នុងទឹកនោមផងដែរ ក្រៅពីសារភាពថា ពិតជាបានលបចូលមកក្នុងផ្ទះគេដើម្បីប៉ុនប៉ងលួចយកទ្រព្យសម្បត្តិគេបែបនេះមែន៕
Source: Kampuchea Thmey Daily
0 Comments