ភ្នំពេញ ៖ ក្នុងពិធីបិទកម្មវិធីប្រកួតវីដេអូខ្នាតខ្លី ស្តីពីបរិស្ថានពានរង្វាន់អប្សរា ឆ្នាំ២០១៨ កាលពីរសៀលថ្ងៃទី១០ ខែវិច្ឆិកា ឆ្នាំ២០១៨ លោករដ្ឋមន្ត្រីក្រសួងព័ត៌មាន ខៀវ កាញារីទ្ធ បានកោតសរសើរ និងគាំទ្រចំពោះក្រសួងបរិស្ថាន និងស្ថានីយទូរទស្សន៍អប្សរា ដែលបានបង្កើតកម្មវិធីប្រកួតវិដេអូខ្នាតខ្លី ស្តីពីបរិស្ថានពានរង្វាន់អប្សរា ឆ្នាំ២០១៨នេះឡើង ពិតជាមានសារៈសំខាន់ណាស់ ដើម្បីលើកទឹកចិត្តពលរដ្ឋ ពិសេសយុវជនឱ្យចេះស្រឡាញ់ និងការពារបរិស្ថាន។
ក្នុងឱកាសនោះដែរលោករដ្ឋមន្ត្រី ខៀវ កាញារីទ្ធ ក៏បានចាត់ទុកការរៀបចំការប្រកួតវីដេអូខ្លី ស្តីពីបរិស្ថានបង្កើតបានផលិតករវ័យក្មេង ដែលផលិតបាននូវវីដេអូខ្នាតខ្លីមានខ្លឹមសារអប់រំប្រកបដោយគុណភាព សម្រាប់ផ្សព្វផ្សាយបន្តឲ្យបងប្អូនប្រជាពលរដ្ឋយើងមានការយល់ដឹង អំពីគ្រោះថ្នាក់បណ្តាលមកពីសំណល់ប្លាស្ទិក ហើយជួយឲ្យពួកគាត់ចេះរក្សាទុកដាក់កាកសំណល់ប្លាស្ទិក ដែលប្រើប្រាស់រួចឲ្យបានត្រឹមត្រូវរួមចំណែកដល់ការលើកកម្ពស់បរិស្ថានទីក្រុងរបស់យើងប្រកបដោយបរិស្ថានស្អាត។
តាមរបាយការណ៍របស់លោក ខ្វៃ អាទិត្យា អគ្គនាយកវិទ្យុ និងទូរទស្សន៍អប្សរាបានឲ្យដឹងថា ដោយមានការគាំទ្រពីក្រសួងបរិស្ថាន និង ក្រសួងព័ត៌មាន កម្មវិធីប្រកួតវីដេអូខ្លី ស្តីពីបរិស្ថានពានរង្វាន់ទូរទស្សន៍អប្សរាឆ្នាំ២០១៨ ក្រោមប្រធានបទ «ការអភិរក្សជីវៈចម្រុះ និងការកាត់បន្ថយការប្រើប្រាស់ប្លាស្ទិកនៅកម្ពុជា» បានចាប់ដំណើរការពីខែកញ្ញា ឆ្នាំ២០១៨ ដោយមានបេក្ខជន ជាយុវជន យុវនារី អាយុចន្លោះពី១៨ ទៅ២៥ឆ្នាំ ចំនួន៣៥ក្រុម ឬនាក់ បានដាក់ពាក្យចូលរួមប្រកួត ហើយឆ្លងកាត់វគ្គជម្រុះ មានតែ ២១ក្រុម បានឈានជើងចូលវគ្គពាក់កណ្តាលផ្តាច់ព្រ័ត្រ ហើយជាលទ្ធផលថ្ងៃនេះ កម្មវិធីជ្រើសរើសបានចំនួន ៤ក្រុម ចុងក្រោយឈានចូលវគ្គផ្តាច់ព្រ័ត្រ។ តាមរយៈការវាយតម្លៃរបស់គណៈកម្មការ៣រូប មកពីក្រសួងបរិស្ថាន ក្រសួងតព័ត៌មាន និងផលិតករឯករាជ្យ កម្មវិធីបានរកឃើញបេក្ខជនជ័យលាភីវគ្គផ្តាច់ព្រ័ត្រទទួលបានពិន្ទុបន្ថែមពីការចូលទស្សនា និងគាំទ្រ like និង view តាមរយៈ Facebook Page: អប្សរាសង់ត្រាល់apsaracentral ដែលត្រូវប្រកាសរង្វាន់នាថ្ងៃនេះ ក្នុងនោះជ័យលាភីលេខ១ បានទៅលើភិក្ខុ អេន បញ្ញា អ្នកនិពន្ធរឿង«ដៃរបស់ខ្ញុំ» ទទួលបានពាន១ ប័ណ្ណសរសើរ១ និងថវិកា ៥លានរៀល ជ័យលាភីលេខ២ បានទៅលើក្រុមលោក បូ ភក្ត្រា «រឿងភ្លើងសំរាម» ទទួលបានប័ណ្ណសរសើរ១ ថវិកា ៣លានរៀល ជ័យលាភីលេខ៣ បានទៅលើក្រុមលោក មៃ លីអ៊ាង «រឿងក្រោមមេឃតែមួយ» ទទួលបានប័ណ្ណសរសើរ១ ថវិកា ២លានរៀល និងជ័យលាភីលេខ៤ បានទៅលើក្រុមលោក ម៉ើត អះម៉ាត់ និពន្ធ«រឿងបរិស្ថាន» ទទួលបានប័ណ្ណសរសើរ១ និងថវិកា ១លានរៀល។
សូមបញ្ជាក់ថា កម្មវិធីនេះបានប្រព្រឹត្តទៅក្រោមអធិបតីភាពលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន លោក នេត្រ ភក្ត្រា រដ្ឋលេខាធិការក្រសួងបរិស្ថាន តំណាងរដ្ឋមន្ត្រីក្រសួងបរិស្ថាន សាយ សំអាល់ ព្រមទាំងមានការចូលរួមពីថ្នាក់ដឹកនាំក្រសួងព័ត៌មាន ក្រសួងបរិស្ថាន វិស័យឯកជន អង្គការសង្គមស៊ីវិល ដែលធ្វើការលើវិស័យបរិស្ថាន និងសិស្ស និស្សិតជាច្រើននាក់ផងដែរ៕
Source: Kampuchea Thmey Daily
0 Comments