ភ្នំពេញ ៖ លោក សួន សេរីរដ្ឋា ដែលជាអ្នកនយោបាយមួយរូប មកពីបរទេសដែរនោះ បានហៅ សម រង្ស៊ី ថាជាមនុស្សសំផឹងនយោបាយ អស់សាច់សម្រាប់អ្នកតាមដានតាំងពីឆ្នាំ១៩៩៨ មកម្ល៉េះ ហើយពួកអ្នកផ្កាប់មុខ ខ្វាក់ខួរក្បាល ជាមួយលោក សម រង្ស៊ី រឹតតែអស់សាច់ទៅទៀត ខណៈដែលចៅហ្វាយរបស់ខ្លួនកុហកបោកប្រាស់នៅលើគោកហើយ នៅតែតាមបិទបាំងហែហម ដែលករណីនេះ មិនខុសពីស្រាតខោខ្លួនឯងទៅធ្វើកន្ទបបិទបាំងឲ្យ សម រង្ស៊ី នោះទេ។
ការលើកឡើងរបស់អ្នកនយោបាយរូបនេះបានធ្វើឡើងបន្ទាប់ពី លោក សម រង្ស៊ី បានសរសេរប្រកាសតាមរយៈបណ្ដាញសង្គមហ្វេសប៊ុក (Facebook) ផ្លូវការរបស់ខ្លួន ដោយបបួលសម្ដេចតេជោ ហ៊ុន សែន ភ្នាល់គ្នាលើករណីការដោះលែង លោក កឹម សុខា ដែលក្នុងការភ្នាល់នេះ លោក សម រង្ស៉ី បានកំណត់ថា បើសិនមានការដោះលែង លោក កឹម សុខា នៅថ្ងៃទី២៩ ខែធ្នូ ឆ្នាំ២០១៨ ឬយ៉ាងយូរថ្ងៃទី០៣ ខែមីនា ឆ្នាំ២០១៩ ខាងមុខនោះ សម្ដេចតេជោ នឹងចុះចេញពីតំណែង តែបើសិនមិនមានការដោះលែងទេ លោក សម រង្ស៊ី នឹងស្ម័គ្រចិត្តប្រឈមចំពោះមុខច្បាប់ ដោយចូលឲ្យសមត្ថកិច្ចចាប់ខ្លួន ដើម្បីអនុវត្តទោសនៅក្នុងពន្ធនាគារ។
លោក សួន សេរីរដ្ឋា បានបញ្ជាក់យ៉ាងនេះថា “សម រង្ស៊ី លែងមានតម្លៃជាមនុស្សយូរណាស់មកហើយ តាំងពីបុគ្គលនេះ យកការភូតភរកុហកម្ដងហើយម្ដងទៀត មកធ្វើនយោបាយ។ ដោយរាប់តាំងពីការប្រកាសតាំងខ្លួនជាអ្នកក្លាហាន ហ៊ានជិះយន្តហោះចូលស្រុក និងបោកសកម្មជនថា ខ្លួននឹងមកចូលគុក ជាប់គុកជាមួយសកម្មជន នោះវាជាការកុហករាប់ភ្លេចទៅហើយ។
ថ្មីៗនេះទៀត សម រង្ស៊ី បង្ហោះសារលើ Facebook Page របស់ខ្លួនថា អាសនៈកម្ពុជា នៅអង្គការសហប្រជាជាតិ ត្រូវបានទុកឲ្យទំនេរនោះ គឺរឹតតែបញ្ជាក់ថា សម រង្ស៊ី គឺជាសំផឹងនយោបាយ ដែលចេះត្រឹមតែចាយសំដីកុហកបោកប្រាស់អ្នកគាំទ្រ និងសម្ងំសុខម្នាក់ឯង ដើរលេងធ្វើទេសចរណ៍នយោបាយ នៅក្រៅប្រទេស ចាយលុយពួកយួនសេរី និងចាយលុយពួកផ្កាប់មុខ ខ្វាក់ខួរក្បាលមួយចំនួន ដើម្បីតណ្ហានយោបាយ”។
តាមលោក សួន សេរីរដ្ឋា “ឥឡូវ សម រង្ស៊ី យកវាសនា កឹម សុខា មកលេងភ្នាល់លើ Facebook ដើម្បីបំបាក់ទឹកចិត្ត កឹម សុខា និងបន្ទាបគ្រួសារ កឹម សុខា ដោយចាត់ទុក កឹម សុខា ជាឧបករណ៍ល្បែងនយោបាយរបស់ខ្លួន ដើម្បីកម្សាន្ត។ នេះគឺមិនខុសពីពេលដែលសកម្មជនសង្គ្រោះជាតិ កំពុងជាប់គុកទេ ដែលកាលណោះ សម រង្ស៊ី ក៏យកការជាប់គុកច្រវាក់របស់សកម្មជនខ្លួនមកលេងសើច ដើម្បីចំណេញលុយ និងប្រមូលលុយសម្រាប់ទេសចរណ៍នយោបាយរបស់ខ្លួនដែរ។
សំផឹងនយោបាយដូច សម រង្ស៊ី វាអស់សាច់ទៅហើយសម្រាប់អ្នកចេះតាមដានតាំងពីឆ្នាំ១៩៩៨មក រហូតដល់ឆ្នាំ២០១៨ នេះ គឺវា២០ឆ្នាំហើយ។ តែពួកអ្នកផ្កាប់មុខ ខ្វាក់ខួរក្បាលជាមួយ សម រង្ស៊ី នោះ វារឹតតែអស់សាច់ទៅទៀត ដែលចៅហ្វាយខ្លួនលានកន្ទុយកុហកបោកប្រាស់នៅលើគោកហើយ ខ្លួននៅតែតាមបិទបាំងហែហម មិនខុសពីស្រាតខោខ្លួនឯងទៅធ្វើកន្ទបឲ្យ សម រង្ស៊ី ដែលកំពុងវង្វេងឆ្កួតដើរអត់ខោរនោះទេ”។
លោក សួន សេរីរដ្ឋា ធ្លាប់បានបញ្ជាក់ថា សម រង្ស៊ី និង កឹម សុខា ដែលលោកស្គាល់នោះ មិនមែនជាអ្នកនយោបាយស្នេហាជាតិ ឬជាអ្នកប្រជាធិបតេយ្យអីទេ តែគឺជាឈ្មួញនយោបាយ ដែលធ្វើនយោបាយស្វែងរកតែផលប្រយោជន៍ប៉ុណ្ណោះ មិនខ្លាចប្រើល្បិចឈឺសាច់ (បង្កគ្រោះថ្នាក់ឲ្យសកម្មជនខ្លួនស្លាប់ និងជាប់គុក) ដើម្បីយកភាពល្បី រួចយកលេសរៃអង្គាសយកលុយពីខ្មែរនៅក្រៅប្រទេសនោះឡើយ។
លោកបន្តថា ភាពជាឈ្មួញនយោបាយរបស់ពួកគេ មានទាំងអាជីវកម្ម ជួញដូរ រត់ពន្ធមនុស្ស ទៅរស់នៅអាមេរិក កាណាដា និងអឺរ៉ុបផងដែរ។ ដូច្នេះបើពលរដ្ឋខ្មែរ នៅបន្តចាញ់បោកពួកឈ្មួញនយោបាយនេះ គឺប្រទេសខ្មែរមិនអាចមានការផ្លាស់ប្ដូរឡើយ៕
Source: Kampuchea Thmey Daily
0 Comments