ភ្នំពេញ ៖ ក្នុងឱកាសជួបសំណេះសំណាលជាមួយលោកតៃម៉ី វ៉ាតាណាបេ អគ្គនាយក នៃនាយកដ្ឋានកិច្ចសហប្រតិបត្តិការអន្តរជាតិ នៃស្នាក់ការកណ្តាលជប៉ុន និងលោក ខេនតារ៉ូ អាគីម៉ូតូ តំណាងឲ្យក្រុមហ៊ុនមីតស៊ូប៊ីស៊ី នារសៀលថ្ងៃទី១៤ ខែវិច្ឆិកា លោក ឃួង ស្រេង អភិបាលនៃគណៈអភិបាលរាជធានីភ្នំពេញបានថ្លែងថា តាំងពីដើមរៀងមក ប្រជាពលរដ្ឋកម្ពុជាជាង៩០%ចូលចិត្តប្រើសម្ភារៈ និងទំនិញជប៉ុនជាពិសេសដូចជារថយន្ត,ឬម៉ូតូ ដែលពេញនិយមនៅកម្ពុជា។
លោកឃួង ស្រេង បញ្ជាក់ថា មូលហេតុចម្បងដែលប្រជាពលរដ្ឋកម្ពុជាចូលចិត្តប្រើសម្ភារៈជប៉ុនគឺដោយសាររបស់មានគុណភាពល្អ,និងមានមនោសញ្ចេតនាជាមួយជប៉ុន។
លោកអភិបាលបានថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាល និងប្រជាជនជប៉ុនតាមរយៈអង្គការJICA តែងបានជួយឧបត្ថម្ភ និងផ្តល់ជំនួយជាប្រាក់កម្ចីការប្រាក់ទាប ឬជាជំនួយឥតសំណងដល់កម្ពុជា ពិសេសជួយដល់រាជធានីភ្នំពេញទាំងផ្នែកហេដ្ឋារចនាសម្ព័ន្ធមានផ្លូវ,លូ,ប្រឡាយ,ប្រព័ន្ធចរាចរក្នុងទីក្រុងជាដើម។
នេះបញ្ជាក់ថា ជប៉ុនមិនដែលបោះបង់ចោលប្រទេសដ៏តូច១នេះទេ ទាំងក្នុងដំណាក់កាលស្វែងរកសន្តិភាពសម្រាប់កម្ពុជាក៏ដូចបុព្វហេតុ អភិវឌ្ឍន៍នៅកម្ពុជាផងដែរ ក្រោមការដឹកនាំរបស់សម្តេចអគ្គមហាសេនាបតីតេជោហ៊ុនសែន។
លោកតៃម៉ី វ៉ាតាណាបេ បានថ្លែងថា បើប្រៀបធៀបក្នុងរយៈ ពេល៣ឆ្នាំចុងក្រោយមកដល់ពេលនេះរាជធានីភ្នំពេញមានការអភិវឌ្ឍន៍រីកចម្រើនខ្លាំង ប្រកបដោយមោទនភាព។
តាមរយៈអង្គការJICA និងក្រុមហ៊ុនMitsubishi Corporation គឺជប៉ុននៅតែផ្តល់ការជួយឧបត្ថម្ភ និងផ្តល់ជំនួយដល់រាជធានីភ្នំពេញជានិច្ច៕
Source: Kampuchea Thmey Daily
0 Comments