បាត់ដំបង ៖ ជនជាតិអាមេរិកកាំងម្នាក់ ដែលមានភរិយាជាជនជាតិខ្មែរ បានដេកស្លាប់នៅនឹងលំនៅឋានរបស់ភរិយា ដោយសារតែជនជាតិរូបនេះមានរោគប្រចាំកាយដ៏រ៉ាំរ៉ៃ រហូតដល់គ្រូពេទ្យលែងហ៊ានទទួលព្យាបាល ព្រោះលែងមានសង្ឃឹមនឹងរស់។
ការដេកស្លាប់នេះ កាលពីវេលាម៉ោង៤និង៣០នាទី ថ្ងៃទី០៦ ខែវិច្ឆិកា ឆ្នាំ២០១៨ នៅនឹងផ្ទះប្រពន្ធ ក្នុងក្រុមទី១៤ ភូមិពាក់ស្បែក ឃុំស្នឹង ស្រុកបាណន់ ខេត្តបាត់ដំបង ដោយជនជាតិអាមេរិកកាំងនេះមាន ឈ្មោះ ភីតទ្រីវ៉ូតឌីផល(PETREA WOODYPAUL) ភេទប្រុស អាយុ៥២ឆ្នាំ។
បើតាមការរៀបរាប់ពីសំណាក់ប្រពន្ធ ឈ្មោះ កែម ចាន់ធឿន អាយុ៣៨ឆ្នាំ រស់នៅក្នុងភូមិ/ឃុំខាងលើ បាននិយាយថា ប្តីរបស់គាត់ដែលមានដើមកំណើតជាជនជាតិអាមេរិកកាំង គឺបានគ្នាជាប្ដីប្រពន្ធយូរឆ្នាំមកហើយ ប៉ុន្តែក្រោយមកគាត់ក៏មានជំងឺប្រចាំកាយ ដោយគ្រូពេទ្យបានអះអាងថា ជាប្រភេទជំងឺ មហារីក រហូតក្រោយមកក៏កាន់តែមានសភាពធ្ងន់ធ្ងរឡើងៗ រហូតសឹងតែគ្រូពេទ្យលែងចង់ព្យាបាល ដោយសារតែគ្មានសង្ឃឹមនឹងរស់។
លុះដល់ថ្ងៃខាងលើ គាត់ក៏បានទទួលមរណភាពតែម្ដង ដោយមិនអាចព្យាបាលបាន ហើយបច្ចុប្បន្ននេះ សមត្ថកិច្ចក៏បានចុះពិនិត្យដែរ ដើម្បីបញ្ជាក់ឲ្យកាន់តែច្បាស់ថា ពិតជាស្លាប់ដោយសាររោគប្រចាំកាយមែន៕
Source: Kampuchea Thmey Daily
0 Comments