កាលពីថ្ងៃសុក្រ ក្លិប Arsenalបាននិយាយថា ពួកគេនឹងដាស់តឿនក្រុមកីឡាករពីទំនួលខុសត្រូវរបស់ពួកគេ ក្រោយវីដេអូមួយឃើញតារាបាល់ទាត់ជាច្រើនរបស់ពួកគេ ហឺតសារធាតុអុកស៊ីដនីត្រូដ។
កីឡាករទាំងនោះដែលរួមទាំងកីឡាករ Mesut Ozil, Pierre-Emerick Aubameyang, Alexandre Lacazette និងកីឡាករ Matteo Guendouzi ឃើញមាននៅក្នុងវីដេអូ ដែលថតបានដោយកាមេរ៉ាសុវត្ថិភាព ហើយត្រូវបានគេចុះផ្សាយដោយកាសែត The Sunកាលពីថ្ងៃសុក្រ។
នៅក្នុងសេចក្តីថ្លែងការណ៍មួយ ក្លិប Arsenalបាននិយាយថា ក្រុមកីឡាករនឹងត្រូវនិយាយគ្នាពីករណីមួយនេះ ហើយនិងក្រើនរំឭកពីទំនួលខុសត្រូវរបស់ពួកគេក្នុងនាមជាអ្នកតំណាងរបស់ក្លិប។
សូមបញ្ជាក់ថា សារធាតុអុកស៊ីដនីត្រូដ ដែលជាប្រភេទឧស្ម័ននោះ គឺជាសារធាតុអាចរកទិញបានដោយសេរី បើទោះបីជាតាមន័យបច្ចេកទេស វាខុសច្បាប់ក្នុងការលក់សម្រាប់គោលបំណងកម្សាន្តក៏ដោយ។
នៅក្នុងវីដេអូនេះ ដែលគេរាយការណ៍ថាកើតឡើងនៅលើរុក្ខវិថីមួយកន្លែងស្ថិតក្នុងទីក្រុងឡុងដ៍ មុនពេលចាប់ផ្តើមយុទ្ធនាការបាល់ទាត់បច្ចុប្បន្ននោះ គេឃើញកីឡាករដទៃទៀតរបស់ក្លិប Arsenalដែលរួមទាំងកីឡាករ Henrikh Mkhitaryan បានបដិសេធមិនប្រើប្រាស់ឧស្ម័នមួយនេះ៕
Source: Kampuchea Thmey Daily
0 Comments