កណ្ដាល ៖ បុរសនេសាទម្នាក់ បានបាត់បង់ជីវិត ខណៈក្រោកពីដេក ទៅបត់ជើងតូច តែចៃដន្យជួបសំណាងអាក្រក់ធ្លាក់ពីលើផ្ទះបាក់.ក ស្លាប់ មិនបានបណ្ដាំអីមួយម៉ាត់ ធ្វើឲ្យភរិយារងាឯកោជាមួយកូន។
ហេតុការណ៍នេះកើតឡើងនៅ ថ្ងៃ សៅរ៍ ១កើត ខែមិគសិរ ឆ្នាំ ច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៨ ខែធ្នូ ឆ្នាំ២០១៨ វេលាម៉ោង៤និង០០នាទីទៀបភ្លឺ នៅចំណុច លើផ្ទះជនរងគ្រោះ ស្ថិតក្នុងភូមិ ទួលចាន់ ឃុំលើកដែក ស្រុកកោះធំ ខេត្តកណ្តាល។
នគរបាលស្រុកកោះធំបានឲ្យដឹងថា ជនរងគ្រោះ ឈ្មោះ ឆន ថន ភេទប្រុស អាយុ៤៦ឆ្នាំ ជនជាតិ ខ្មែរមុខរបរនេសាទ មានទីលំនៅៗ ភូមិទួលចាន់ ឃុំលើកដែក ស្រុកកោះធំ ខេត្តកណ្តាល។
តាមការឆ្លើយបំភ្លឺរបស់ ឈ្មោះ ពៅ យឿន ត្រូវជាប្រពន្ធជនរងគ្រោះបានឲ្យដឹងថា ជារៀងរាល់យប់ ប្តីរបស់គាត់ ជាជនរងគ្រោះ បានដេកជាមួយគាត់ជាប្រពន្ធ លុះនៅវេលាម៉ោង៤និង០០នាទី ថ្ងៃទី ០៨ ខែធ្នូ ឆ្នាំ២០១៨ ប្តីរបស់គាត់ ជាជនរងគ្រោះបានក្រោកពីដំណេក ទៅបត់ជើងតូច នៅតាករោងបាយខាងក្រោយ ឯគាត់ជាប្រពន្ធ នៅសម្រាកក្នុងមុង បន្តិចក្រោយមក ក៏ស្នូរ ដូចជាមានធ្លាក់អ្វី បន្ទាន់គ្នានោះ គាត់ជាប្រពន្ធ ក៏ស្ទុះចេញពីមុងទៅមើល ឃើញប្តីនៅដេកនឹងដីចំរានហាលរោងបាយ ឃើញដូចនេះគាត់ជាប្រពន្ធ ក៏ចុះទៅមើលប្តី សួរនាំទៅតែប្តីមិនតបត ងើបក្បាលមាត់ ម្ហបៗ គាត់ជាប្រពន្ធ ក៏រឹតញីដើមទ្រូងឲ្យប្តី តែមិនអាចជួយសង្គ្រោះ បានក៏ដាច់ខ្យល់ស្លាប់ទៅ គាត់ក៏ហៅអ្នកជិតខាងមកជួយមើល និងរាយការណ៍ជូនមេភូមិ និង អាជ្ញាធរ រាយការណ៍បន្តជូនសមត្ថកិច្ច។
បន្ទាប់ពីទទួលបានព័ត៌មាន កម្លាំងជំនាញ អធិការដ្ឋាន នគរបាល ស្រុកកោះធំ បានចុះទៅដល់កន្លែងកើតហេតុ ដោយសហការជាមួយប៉ុស្តិ៍នគរបាលរដ្ឋបាល អាជ្ញាធរមូលដ្ឋាន និងក្រុមគ្រួសារជនរងគ្រោះ ដើម្បី ធ្វើការពិនិត្យកន្លែងកើតហេតុ ពិនិត្យសាកសព។
ការពិនិត្យ ឃើញថា ខ្លួនជនរងគ្រោះ មានប្រឡាក់ភក់ កទន់ បង្វិលបាន ក្រៅពីនេះពុំមានស្លាកស្នាមអ្វីគួរឲ្យកត់សំគាល់ឡើយ។
តាមការសួរបំភ្លឺ ប្រពន្ធជនរងគ្រោះ និងការពិនិត្យ វិភាគ កន្លែងកើតហេតុ គណៈកម្មការចម្រុះ សន្និដ្ឋានថា ជនរងគ្រោះពិតជាធ្លាក់ពីលើផ្ទះ បណ្ដាលឲ្យស្លាប់ប្រាកដមែន ពុំមានពាក់ព័ន្ធករណីផ្សេងឡើយ។
ក្រោយពីពិនិត្យចប់សព្វគ្រប់ សមត្ថកិច្ចបានប្រគល់សាកសពជនរងគ្រោះជូនក្រុមគ្រួសារ ធ្វើបុណ្យតាមប្រពៃណី៕
Source: Kampuchea Thmey Daily
0 Comments