ភ្នំពេញ ៖ ពិតជាសំណាងរបស់មេប៉ុស្តិ៍កាកាប២នោះណាស់ ដោយសារតែជនដៃដល់ចិត្តស្លុយពេកបន្ទាប់ពីវាយជនរងគ្រោះបែកក្បាលសន្លប់ដោយមិនដឹងមូលហេតុហើយនោះ ពេលសមត្ថកិច្ចប៉ុស្តិ៍កាកាបទី២ ហៅមកដោះស្រាយគ្នានៅប៉ុស្តិ៍ ស្រាប់តែជនដៃដល់ដដែលនោះដកកាំភ្លើងខ្លីពីហោប៉ៅខោមកបាញ់សំដៅមេប៉ុស្តិ៍ចំនួនពីរគ្រាប់ តែហាក់ដូចជាសំណាងណាស់ ឬក៏លោកមេប៉ុស្តិ៍ពូកែដល់ថ្នាក់បាញ់មិនចេញ ក៏មិនដឹង ទើបខ្មាន់កាំភ្លើងម្នាក់នោះ បាញ់មិនផ្ទុះសោះ ហើយប៉ូលិសចាប់ខ្លួនញាត់ទ្រុងនៅពេលនោះតែម្ដង ដែលហេតុការណ៍នេះបានកើតឡើង កាលពីវេលាម៉ោងប្រមាណ ១០យប់ ថ្ងៃទី០១ ខែធ្នូ ឆ្នាំ២០១៨ ចំណុចផ្លូវបេតុងក្នុង ភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ។
ជនបង្កមានឈ្មោះ គឹម ពេជ្រ ភេទប្រុស អាយុ៤៩ឆ្នាំ មុខរបររត់តាក់ស៊ី ស្នាក់នៅភូមិព្រៃទា៣ សង្កាត់ចោមចៅទី៣ ខណ្ឌពោធិ៍សែនជ័យ និងបក្ខពួកម្នាក់ទៀតឈ្មោះ សួន សុភក្ត្រ័ ភេទប្រុស អាយុ២១ឆ្នាំ មុខរបររត់រ៉ឺម៉កកង់បី ស្នាក់នៅភូមិព្រៃទា៣ សង្កាត់ចោមចៅទី៣ ខណ្ឌពោធិ៍សែនជ័យ។
ចំណែកភាគីជនរងគ្រោះមាន ឈ្មោះ ឆន នាវៃ ភេទប្រុស អាយុ៣៧ឆ្នាំ មុខរបរបើកបររថយន្ត ស្នាក់នៅភូមិត្រាចកុះ ឃុំក្រាំងលាវ ស្រុកបាទី ខេត្តតាកែវ រងរបួសបែកក្បាល ផ្នែកខាងលើ ចេញឈាម ខៀវភ្នែកខាងឆ្វេង និងហើមមាត់ និងជនរងគ្រោះទី២ ឈ្មោះ ភា ប្រុស ភេទប្រុស អាយុ៤៩ឆ្នាំ ជានាយប៉ុស្តិ៍នគរបាលកាកាបទី២ ខណ្ឌពោធិ៍សែនជ័យ។
បើតាមការបញ្ជាក់របស់ជនរងគ្រោះបានឲ្យដឹងថា មុនពេលកើតហេតុ ខ្លួនបានបើករថយន្តទៅយកភ្ញៀវចិននៅត្រង់ចំណុចកើតហេតុ ពេលទៅចំណុចនោះហើយ បន្ទាប់ពីដាក់ភ្ញៀវចុះក៏ចតឡាននៅចំណុចនោះ មួយសន្ទុះ ដើម្បីរង់ចាំម៉ូយ។ រំពេចនោះ ស្រាប់តែជនសង្ស័យ ឈ្មោះ គឹម ពេជ្រ បានស្ទុះដើរសំដៅចេញមកស្រែកឡូឡា ពេលនោះខ្លួនក៏ចុះទៅសួរនាំ ស្រាប់តែជនសង្ស័យដាល់ចំភ្នែកខាងឆ្វេង និងមាត់បណ្ដាលឲ្យហើម និងជនសង្ស័យទី២ ឈ្មោះ សួន សុភ័ក្រ ក៏បានរត់ចូលមក ដោយដៃមានកាន់ច្រវាក់ចាក់កិបមេសោសូឡិច មកសំពងលើក្បាលខ្លួនបណ្ដាលឲ្យដួលទៅលើដីសន្លប់បាត់បង់ស្មារតីមួយសន្ទុះធំ។
ប្រភពបន្ដថា បន្ទាប់ពីទទួលបានព័ត៌មានពីប្រជាពលរដ្ឋ កម្លាំងសមត្ថកិច្ចកំពុងល្បាតក្នុងមូលដ្ឋាន បានចុះទៅដល់កន្លែងកើតហេតុ ហើយហៅភាគីទាំងពីរមកដោះស្រាយគ្នា ដោយភាគីទាំងសងខាង សុំចរចាគ្នានៅប៉ុស្តិ៍កាកាបទី២។ លុះពេលមកដល់ប៉ុស្តិ៍ ភាគីទាំងសងខាងកំពុងតែធ្វើការសម្រួលគ្នាមិនទាន់ដឹងស ខ្មៅផង ស្រាប់តែ នៅវេលាម៉ោងប្រហែល១១និង៣០នាទីយប់ ថ្ងៃដដែល ជនរងគ្រោះ មានអាការៈវិលមុខរកក្អួតចង្អោរ ដោយសារតែត្រូវរបួសមុននេះធ្ងន់ពេក ហើយសមត្ថកិច្ចបានអនុញ្ញាតឲ្យជនរងគ្រោះទៅពិនិត្យរបួសនៅមន្ទីរពេទ្យឯកជនសិន។
ប្រភពពីសមត្ថកិច្ចបានបន្ដថា គ្រាន់តែឮថាមេប៉ុស្តិ៍ឲ្យជនរងគ្រោះទៅព្យាបាលសិន ស្រាប់តែភ្លាមនោះ ជនសង្ស័យឈ្មោះ គឹម ពេជ្រ មានការខឹងសម្បា ហើយច្រឡោតតូង និងបានដកកាំភ្លើងខ្លីម៉ាករ៉ូឡូលេខ000497-08 ចេញពីហោប៉ាវខោ មកភ្ជង់មេប៉ុស្តិ៍ និងបាញ់ចំនួន២គ្រាប់ តែមិនផ្ទុះ ទើបសមត្ថកិច្ចធ្វើការអន្តរាគមន៍ចាប់ដកហូតយកអាវុធពីជនសង្ស័យបាន ហើយធ្វើការត្រួតពិនិត្យអាវុធមានគ្រាប់៦គ្រាប់ ក្នុងនោះមានស្នាមញញួរចុចកិបសម្បកគ្រាប់ពីរគ្រាប់ តែមិនទាន់ផ្ទុះ បើផ្ទុះវិញមិនដឹងថាវាសនាលោកនាយប៉ុស្តិ៍ទៅជាយ៉ាងណាទេ គឺពិតជាសំណាងណាស់ ទេវតាពិតជាមានភ្នែកជួយមនុស្សល្អ មិនឲ្យបញ្ហាដោយសារមនុស្សចិត្តខ្មៅឃោរឃៅខុសរឿងធ្វើអ្វីបានឡើយ។
បច្ចុប្បន្ន ជនសង្ស័យទាំង២នាក់ បានបញ្ជូនឲ្យផ្នែកជំនាញព្រហ្មទណ្ឌខណ្ឌ ដើម្បីឃុំខ្លួនជាបណ្ដោះអាសន្ន រង់ចាំកសាងឯកសារបញ្ជូនឲ្យតុលាការចាត់ការតានីតិវិធី ដោយឡែក លោក យឹម សារ៉ាន់អធិការនគរបាលខណ្ឌពោធិសែនជ័យ ពេលសួរថា តើជនសង្ស័យជាខ្មាន់កាំភ្លើងដៃឆៅនោះមានសមាសភាពជាអ្វីឲ្យពិតប្រាកដទៅ ទើបគេហ៊ានដកកាំភ្លើងបាញ់សមត្ថកិច្ចបែបនេះ តែលោកមិនឆ្លើយតប៕
Source: Kampuchea Thmey Daily
0 Comments