នាពេលខាងមុខនេះ កម្ពុជានឹងមានគ្រូបង្វឹកកីឡាវាយសីកម្រិតបឋម ដែលមានចំណេះ ជំនាញច្បាស់លាស់ សម្រាប់ការបណ្ដុះបណ្ដាលថ្នាលកីឡាករវាយសី ឲ្យកាន់តែមានការវិវឌ្ឍន៍រីកចម្រើនថែមទៀត ស្របតាមការកំណត់របស់ក្រសួងអប់រំ យុវជន និងកីឡា ដែលតម្រូវឲ្យសហព័ន្ធកីឡាជាតិនីមួយៗ ត្រូវតែមានលក្ខណៈសម្បត្តិគ្រប់គ្រាន់ ដើម្បីឈានឆ្ពោះទៅធ្វើជាម្ចាស់ផ្ទះរៀបចំការប្រកួតកីឡាស៊ីហ្គេម នាឆ្នាំ២០២៣។
វគ្គបណ្ដុះបណ្ដាលគ្រូបង្វឹកវាយសីកម្រិតបឋម បានចាប់ផ្ដើមបើកកាលពីថ្ងៃទី២៨វិច្ឆិកាកន្លងមក ហើយបានបញ្ចប់នៅល្ងាចថ្ងៃទី០១ ខែធ្នូ ឆ្នាំ២០១៨ នៅទីស្នាក់ការគណៈកម្មាធិការជាតិអូឡាំពិកកម្ពុជា រាជធានីភ្នំពេញ។
លោកឧត្ដមសេនីយ៍ឯក លី កុសល ប្រធានសហព័ន្ធកីឡាវាយសីកម្ពុជា បានអញ្ជើញចូលរួមបិទ និងប្រគល់វិញ្ញាបនបត្របញ្ជាក់ការសិក្សា ព្រមទាំងប្រគល់សម្ភារៈសម្រាប់បង្វឹកហាត់ថ្នាលមួយចំនួនដល់សិក្ខាកាមជាគ្រូបង្វឹកកម្រិតបឋមនេះផងដែរ។
បើតាមរបាយការណ៍គណៈគ្រប់គ្រងវគ្គបានឲ្យដឹងថា វគ្គនេះ មានសិក្ខាកាមចូលរួមចំនួន៣៥រូប ដែលក្នុងនោះមានមកពីសហព័ន្ធកីឡាវាយសីកម្ពុជា ក្លិបដែលជាសមាជិកសហព័ន្ធចំនួន១០ សាលារៀនចំនួន១០ និងមកពីមន្ទីរអប់រំយុវជន និងកីឡារាជធានី ខេត្តចំនួន១១។ ឆ្លងកាត់ការសិក្សា ទាំងទ្រឹស្ដី និងការអនុវត្តជាក់ស្ដែងលើទីលានរយៈពេល៤ថ្ងៃនោះ និងការវាយតម្លៃរបស់លោកគ្រូឧទ្ទេសនាមផងនោះ សិក្ខាកាមដែលទទួលបានលទ្ធផលល្អ១០ % លទ្ធផលមធ្យម៩០% លទ្ធផលខ្សោយអត់មាន។
លោក Sanbenthan Sivqperuma ជាជនជាតិម៉ាឡេស៊ី និង ជាគ្រូជំនាញមកពីសហព័ន្ធកីឡាវាយសីទ្វីបអាស៊ី ដែលគ្រូឧទ្ទេសនាមក្នុងវគ្គនេះ បានអះអាងថា លោកមានទំនាក់ទំនងជាមួយសហព័ន្ធកីឡាវាយសីកម្ពុជាចំនួន៦ឆ្នាំមកហើយ។ សមាជិកសហព័ន្ធកីឡាវាយសីអាស៊ីមាន៤៨ប្រទេសហើយពួកគេកំពុងតែអភិវឌ្ឍន៍ខ្លាំងយ៉ាងលឿន។
លោកបញ្ជាក់ថា លោកបង្រៀនសិក្ខាកាមដែលជាគ្រូបង្វឹកបឋមពេលនេះ គឺដើម្បីឲ្យយកទៅបណ្ដុះបណ្ដាលដល់អ្នកក្មេងៗតាមសាលារៀន ដែលជាថ្នាល។ លោកមានជំនឿចិត្តថា ពួកគេនឹងក្លាយជាគ្រូល្អ មានសមត្ថភាពសម្រាប់អ្នកជំនាន់ក្រោយ។
លោកឧត្ដមសេនីយ៍ឯក លី កុសល ប្រធានសហព័ន្ធកីឡាវាយសីកម្ពុជា បានមានប្រសាសន៍ថា វគ្គនេះជាថ្នាលបណ្ដុះបណ្ដាលថ្មីមួយទៀត ដែលចាប់បានចាប់ផ្ដើមជាលើកទី៤ ដល់គ្រូកីឡាវាយសីកម្ពុជា តាមបណ្តាក្លិប សមាគម សាលារៀន ហើយដែលរំពឹងថា ទៅអនាគតគ្រូបង្វឹកកីឡាវាយសីកម្ពុជា នឹងមានចំណេះ ជំនាញច្បាស់លាស់ សម្រាប់ការបណ្តុះបណ្តាលថ្នាលកីឡាករវាយសី ឲ្យកាន់តែមានការវិវឌ្ឍន៍រីកចម្រើនថែមទៀត ស្របតាមការកំណត់របស់ក្រសួងអប់រំ យុវជន និងកីឡា ដែលតម្រូវឲ្យសហព័ន្ធកីឡាជាតិនីមួយៗ ត្រូវតែមានលក្ខណៈសម្បត្តិគ្រប់គ្រាន់ ដើម្បីឈានឆ្ពោះទៅធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមនាឆ្នាំ២០២៣ខាងមុខ។
សូមបញ្ជាក់ថា វគ្គគ្រូបង្វឹកកីឡាវាយសីកម្រិតបឋមនេះ រៀបចំដោយសហព័ន្ធកីឡាវាយសីកម្ពុជា សហការជាមួយសហព័ន្ធកីឡាវាយសីអាយស៊ី និងដោយមានការជួយជ្រោមជ្រែងឧបត្ថម្ភថវិកាពីក្រសួងអប់រំ យុវជន និងកីឡាផងដែរ៕
Source: Kampuchea Thmey Daily
0 Comments