ទូក(ង)វែងជាងគេ ត្រូវបានដង្ហែយកទៅតាំងនៅបរិវេណចុងប៉ម មុខសាលាខេត្តព្រៃវែងវិញហើយ

ភ្នំពេញ ៖ នៅព្រឹកព្រលឹមថ្ងៃចន្ទទី៣ ខែធ្នូ ឆ្នាំ២០១៨នេះ ទូកង ដែលវែងជាងគេនោះត្រូវបានដង្ហែយកទៅតាំងនៅបរិវេណចុង ប៉ម មុខសាលាខេត្តព្រៃវែង ព្រមទាំងរៀបចំ ជាសារមន្ទីរសម្រាប់ដាក់ទូក « ង » ឯក នេះ ផងដែរ។

គួរបញ្ជាក់ថា ទូក «ង» ដែលវែងជាងគេនេះ បានបង្ហាញវត្តមានជូនទស្សនាទាំងភ្ញៀវជាតិ និងអន្តរជាតិជនរួមជាតិទាំងអស់ ដែលមកកម្សាន្តនៅក្នុងព្រះរាជពិធីបុណ្យអុំទូក នៅមុខព្រះបរមរាជវាំងកន្លងទៅថ្មីៗនេះបានទស្សនា ពីរូបរាង ទូក ង ដ៏អស្ចារ្យ និងវែងជាងគេលើ ពិភពលោកនៅលើផ្ទៃទន្លេដោយផ្ទាល់ និងបានបង្ហាញឲ្យភ្ញៀវទេសចរអន្តរជាតិ បានឃើញ បានស្គាល់ និងយល់កាន់តែច្បាស់អំពីប្រវត្តិសាស្ត្រខ្មែរផងដែរ។

ទូក «ង» ដែលវែងជាងគេនេះ ទើបតែនឹងជាប់កំណត់ត្រាទូក «ង» ដែលវែងជាងគេលើពិភពលោក កាលពីថ្មីៗកន្លងទៅនេះ ហើយត្រូវបាន គណៈកម្មការ រៀបចំ ដង្ហែ យកមកដាក់តាំងក្នុងរោងទូក ដើម្បីបង្ហាញដល់ប្រជាពលរដ្ឋ និងទេសចរបរទេស បានចូលទស្សនាផ្ទាល់ ដោយឥតគិតថ្លៃ អស់រយៈពេល ជិត១០ថ្ងៃមកហើយ នៅបណ្ដោយផ្លូវព្រះសុធារស ខាងកើតទល់មុខវាលព្រះមេរុ ជាប់របងព្រះ បរមរាជវាំង ហើយនៅព្រឹកព្រលឹមថ្ងៃចន្ទ ទី៣ ខែធ្នូ ឆ្នាំ២០១៨នេះ ទូកង ដែលវែងជាងគេនេះ ត្រូវបានដង្ហែយកទៅកាន់កំពង់ផែថ្ម មាត់ទន្លេ ដើម្បី យកទៅតាំងនៅបរិវេណមុខសាលាខេត្ត ព្រៃវែងវិញ។

ទូក «ង» ដែលវែងជាងគេលើពិភពលោក ត្រូវបានដាក់តាំងបង្ហាញជូនសាធារណជនបានទស្សនាដោយឥតគិតថ្លៃតាំងពីថ្ងៃទី២៤ រហូតដល់ថ្ងៃទី០៣ ខែធ្នូ ឆ្នាំ២០១៨នេះ ដោយសង្កេត ឃើញថាមានភ្ញៀវជាតិ និងអន្តរជាតិ ជាពិសេសថ្នាក់ដឹកនាំ មន្ត្រីរាជការ សិស្ស និស្សិត យុវជន យុវនារី សិល្បករ សិល្បការិនី ស្ថាប័ន អង្គភាព និងបងប្អូន ពុកម៉ែ អុំពូមីង យាយតាយ៉ាងច្រើនកុះករ មកពីគ្រប់ទិសទី បានអញ្ជើញចូលមកទស្សនា និងផ្ដិតយករូបភាពទូក ង វែងជាងគេលើពិភពលោក ទុកជា អនុស្សាវរីយ៍ ជារៀងរាល់ថ្ងៃផងដែរ។

ទាំងនេះ គឺជាការលើកទឹកចិត្តដល់គណៈកម្មការផលិត ក៏ដូចជា បានចូលរួមលើកតម្កើងកិត្យានុភាព នូវស្នាដៃរបស់កូនខ្មែរ លើឆាកអន្តរជាតិ ឲ្យកាន់តែច្បាស់ថា កូនខ្មែរ អាចធ្វើបាន ទូកង ដ៏អស្ចារ្យ និងវែងជាងគេលើ ពិភពលោក (យើងជឿជាក់ លើកម្ពុជា)។

ជាមួយគ្នានោះដែរ ប្រធានគណៈកម្មការ កសាងទូកងវែងជាងគេលើពិភពលោក លោក ស សុខា បានបញ្ជាក់ថា ទូក « ង » ដែលមានប្រវែង៨៧.៣ម៉ែត្រនេះ អាចដាក់ ចំណុះទូក បាន២៥០នាក់ ឯណោះ។បើតាម ប្រធាន គណៈកម្មការទូកងដែល មានប្រជាពលរដ្ឋ នៅតាម បណ្ដា ខេត្ត ផ្សេងៗ បានស្នើ សុំយក ទូកង នេះទៅតាំង បង្ហាញនៅក្នុងខេត្តរបស់ខ្លួន ប៉ុន្តែដោយសារ ទូកមានប្រវែង វែង អាចងាយរងការខូចខាត ពេលលើកចុះឡើង ទើប មិនអាចធ្វើទៅ រួច។

លោក ស សុខា បញ្ជាក់ថា ដោយមានការសំណូមពរឲ្យយកទូកនេះទៅតាមបណ្ដាខេត្តផ្សេងៗ តែអ្វី ជាបញ្ហា គឺការលើកចុះឡើង ព្រោះទូកវែង វាអាចប្រេះហើយ ពិបាកពេលយើងយកទៅប្រើក្នុងទឹកវិញ។ តាមពិតទៅអ្នកនៅទីរួមខេត្តព្រៃវែងមិនទាន់បានឃើញទូកនេះនៅឡើយទេ ឃើញតែអ្នកនៅ អ្នកលឿង ព្រោះយើងបានរៀបចំកម្មវិធីនៅទីនោះ។

សូមជម្រាបជូនថា នេះមិនមែនលើកទីមួយឡើយ ដែលកម្ពុជាបានបំបែកកំណត់ត្រាឯតទគ្គកម្មពិភពលោក ព្រោះកន្លងមកកម្ពុជា បានបំបែកកំណត់ត្រាជាច្រើនរួចមកហើយមានដូចជា នំអន្សមយក្ស រាំម៉ាឌីហ្សូន និង ក្រមាវែង មួយពាន់ម៉ែត្រ ហើយឯតទគ្គកម្មចុងក្រោយដែលកម្ពុជាយើងទើបបំបែកបាននេះ គឺ ទូក «ង» ដែលវែងជាងគេលើពិភពលោក ដែលត្រូវបានប្រសិទ្ធិនាមថា «កម្ពោជិកបុត្តាខេមរាតរី» ដែលមានអត្ថន័យថា «ទូកងរបស់កូនខ្មែររស់នៅក្នុងដែនដីកម្ពុជា» ក្រោមការ ផ្ដួចផ្ដើម គំនិត របស់ លោក ស សុខា អនុប្រធាន សហភាពសហព័ន្ធយុវជនកម្ពុជា និងជាប្រធាន គណៈកម្មការ ផលិតទូក ង វែងជាងគេលើពិភពលោក ព្រមទាំងថ្នាក់ដឹកនាំ ពាក់ព័ន្ធ គ្រប់ជាន់ថ្នាក់ និងដោយមានការជួយជ្រោមជ្រែង យកចិត្តទុកដាក់ របស់ឯកឧត្ដម ហ៊ុន ម៉ានី ប្រធានគណៈកម្មាធិការទី៧ នៃរដ្ឋសភា និងប្រធានសហភាពសហព័ន្ធយុវជនកម្ពុជា និងធ្វើឡើង ដោយសហព័ន្ធ សហភាព យុវជន កម្ពុជា (ស.ស.យ.ក) បានចំណាយ កម្លាំង មនុស្សចំនួនជាង១៣,០០០នាក់ មាន ទាំងខ្មែរ និង បរទេសចូលរួម និងធ្វើដោយឧបករណ៍ប្រើដោយដៃទាំងស្រុង ច្រវា លាប ពណ៌ និង គូររូប ទង់ជាតិ នៃប្រទេសកម្ពុជា មានរំលេចអក្សរ « រួមគ្នា ដើម្បីកម្ពុជា រុងរឿង » ធ្វើឡើងពីឈើស្រឡៅ ដែលមានទម្ងន់ស្រាល។ ចំណែកតួទូកធ្វើពីឈើគគីរដែលធន់នឹងទឹក ហើយត្រូវបានជាប់ឯតទគ្គកម្មពិភពលោក World Guinness Record ជាផ្លូវការ នៅថ្ងៃទី១២ ខែវិច្ឆិកា ឆ្នាំ២០១៨ ដោយមានការចូលរួមពី លោក Pravin Patel អ្នកវិនិច្ឆ័យ World Guinness Record ហើយទូកនេះមានប្រវែងរហូតដល់៨៧.៣ម៉ែត្រ, ទទឹង១.៩៤ម៉ែត្រ និងជម្រៅ០.៨ម៉ែត្រ ត្រូវបានរចនាឡើងដោយផ្នែកខាងក្បាលទូក ធ្វើជាក្បាលនាគ និងមានកន្ទុយហង្សប្រកបដោយក្បូរក្បាច់រចនា ដ៏ល្អប្រណិតដែលផ្ទុកបានចំណុះរហូតដល់១៧៩នាក់ឯណោះ ដោយក្នុងនោះ១០០នាក់ មកពីទាហានជើងទឹក និង៧៩នាក់ មកពីនគរបាលជើងទឹក។

គួររំឭកទៀតថា បន្ទាប់ពីបានបំបែកកំណត់ត្រាពិភពលោក ទូក «ង» វែងជាងគេនៅ លើពិភពលោក សម្ដេច ក្រឡាហោម ស ខេង បានថ្លែងនូវការកោតសរសើរយ៉ាងខ្លាំងដល់យុវជនខ្មែរគ្រប់ស្រទាប់វណ្ណៈទាំងអស់ ដែលបានចូលរួមផ្ដួចផ្ដើមគំនិត និងកសាងទូក «ង» វែងជាងគេលើនៅពិភពលោក រហូតឈានដល់ការបំបែកបាននូវឯតទគ្គកម្ម World Guinness Record ដោយបានថ្លែងយ៉ាងដូច្នេះថា «ខ្ញុំពិតជាចូលរួមអបអរសាទរ និងកោតសរសើរ ដល់ក្មួយៗទាំងអស់ និងអរគុណចំពោះអ្នកពាក់ព័ន្ធទាំងអស់ ដែលមានគំនិតផ្ដួចផ្ដើមនេះហើយ មានបង្កើតគណៈកម្មការត្រឹមត្រូវណាស់ ហើយបើគ្មានការសាមគ្គី ឆន្ទៈ ធ្វើមិនបាននោះទេ ចឹងហើយបានគេដាក់ថា រួមគ្នាដើម្បីកម្ពុជារុងរឿង-ខ្មែរសាមគ្គី គឺខ្មែរឈ្នះ ចឹងពាក្យនេះ មានអត្ថន័យជ្រាលជ្រៅណាស់»។

សម្ដេចក្រឡាហោម ស ខេង ក៏បានចាត់ទុកថា ការធ្វើទូក «ង» ដែលវែងជាងគេ រហូតបំបែកឯតទគ្គកម្មបាននោះ មិនមែនជារឿងសាមញ្ញនោះទេ ព្រោះបើគ្មានការផ្ដួចផ្ដើមគំនិត គ្មានឆន្ទៈ គ្មានការរួបរួមគ្នា គ្មានការតស៊ូ អត់ទ្រាំចំពោះការលំបាក ហើយគ្មានបុព្វហេតុច្បាស់លាស់ទេនោះ គឺមិនអាចធ្វើទូកនេះបានឡើយ៕