រតនគិរី ៖ រាត្រីសមោសរដើម្បីកៀរគរមូលនិធិសប្បុរសធម៌ ត្រូវបានគណៈកម្មាធិការសាខាកាកបាទក្រហមកម្ពុជាខេត្តរតនគិរី ប្រារព្ធធ្វើឡើងនៅសាលាខេត្ត នារាត្រីថ្ងៃទី២៥ ខែធ្នូ ឆ្នាំ២០១៨កន្លងទៅ ក្រោមវត្តមាន លោក ថង សាវុន អភិបាលខេត្ត និងជាប្រធានគណៈកម្មាធិការ សាខាកាកបាទក្រហមខេត្ត។
ថ្លែងទៅកាន់សប្បុរសជនជាង៦០០នាក់ ដែលបានអញ្ជើញចូលរួមក្នុងរាត្រីសមោសរដើម្បីកៀរគរមូលនិធិសប្បុរសធម៌នាឱកាសនេះ លោក ថង សាវុន មានប្រសាសន៍ថា ចលនាកាកបាទក្រហម អឌ្ឍចន្ទក្រហមបានទាញ ការយកចិត្តទុកដាក់របស់ពិភពលោកលើបច្ចុប្បន្នភាព នៃបញ្ហាប្រឈមជាសកលតាមរយៈការប្រារព្ធទិវាពិភពលោកកាកបាទក្រហម អឌ្ឍចន្ទក្រហម លើប្រធានបទជាបន្តបន្ទាប់ ដែលជាថ្ងៃពិសេសក្នុងការកៀរគរមូលនិធិសប្បុរសជន។
ការងារស្វែងរកមូលនិធិនេះ គឺជាការងារមួយចម្បង និងឈានមុខគេដែលសាខាត្រូវពង្រីកពង្រឹងគ្រប់រូបភាពដើម្បីឆ្លើយតបទៅ និងតម្រូវការរបស់ជនងាយរងគ្រោះនានាសាខាបាននិងកំពុងដំណើរការជាបណ្តើរៗ ដើម្បីធានាភាពជាម្ចាស់លើហិរញ្ញវត្ថុរបស់សាខា។
លោកអភិបាលខេត្តបន្តថា រាត្រីនេះ បានឆ្លុះបញ្ចាំងឲ្យឃើញពីសកម្មភាពដែលកាកបាទក្រហមអាចដំណើរការទៅបានក៏អាស្រ័យលើការជឿជាក់ដែលបានចាប់ផ្ដើមពីខ្ញុំ និងអ្នកទាំងអស់គ្នាដែលបានចូលរួមគាំទ្រវិភាគទានជាសម្ភារៈ និងថវិកាពីសំណាក់ លោក លោកឧកញ៉ា លោកជំទាវ លោក លោកស្រី សប្បុរសជន ដែលអ្នកស្ម័គ្រចិត្ត កាកបាទក្រហមយុវជន កាកបាទក្រហមដែលជាកម្លាំងចូលរួមមិនអាចខ្វះបានឡើង។ ជាការពិតយើងមានរាជរដ្ឋាភិបាលជាអ្នកដឹកនាំ និងគ្រប់គ្រង ដោយឡែកយើងទាំងអស់គ្នាក៏មានតួនាទីចូលរួម ក្នុងកិច្ចការសង្គមនេះផងដែរ ព្រោះថារាជរដ្ឋាភិបាលនៅមានខ្វះចន្លោះក្នុងការបំពេញ ឲ្យបាននៅការខ្វះខាតទាំងអស់នោះទេ ដែលជាហេតុតម្រូវឲ្យមានកាកបាទក្រហម កម្ពុជា ជាជំនួយការឲ្យអាជ្ញាធរសាធារណៈផ្នែកមនុស្សធម៌។
លោក ថង សាវុន ក្នុងនាមគណៈកម្មាធិការសាខាកាកបាទក្រហមខេត្ត បានថ្លែងនូវអំណរគុណចំពោះវត្តមានសម្បុរសជនទាំងអស់ដែលបានចូលរួម និងអំពាវនាវដល់ទឹកចិត្តសប្បុរសធម៌ របស់លោក លោកឧកញ៉ា លោកជំទាវ លោក លោកស្រី អ្នកនាងកញ្ញា ប្រធាន អនុប្រធានមន្ទីរស្ថាប័ន អនុសាខា ក្រុងស្រុក អង្គការក្នុង និងក្រៅរដ្ឋាភិបាល ក្រុមហ៊ុននានា សណ្ឋាគារ ផ្ទះសំណាក់ ភោជនីយដ្ឋាន អាជីវករ ទាំងអស់ ដែលបានចូលរួមចែករំលែកជាសម្ភារៈ ថវិកា តាមវប្បធម៌ចែករំលែកដើម្បីជាកម្លាំងមនុស្សធម៌ដ៏រឹងមាំជួយសម្រាប់ទុក្ខលំបាកវេទនារបស់ជនងាយរងគ្រោះនានាក៏នៅទូទាំងខេត្តរតនគិរីទាំងមូល។
សូមបញ្ជាក់ថា ថវិកាដែលប្រមូលបានពីកម្មវិធីរាត្រីសមោសរនាពេលនេះ បានចំនួនជាង២ម៉ឺនដុល្លារ៕
Source: Kampuchea Thmey Daily
0 Comments