កណ្តាល ៖ ជនសង្ស័យម្នាក់ បានត្រូវនគរបាលឃាត់ខ្លួន ចាប់វាយខ្នោះ ខណៈដែលជនសង្ស័យជិះម៉ូតូកាន់កាំបិតដើរកាប់គេឯង។
ហេតុការណ៍នេះបានកើតឡើងនៅថ្ងៃច័ន្ទ២រោច ខែមិគសិរ ឆ្នាំច សំរឹទ្ធស័ក ពុទ្ធសករាជ ២៥៦២ ត្រូវនឹងថ្ងៃទី២៤ ខែធ្នូ ឆ្នាំ២០១៨ វេលាម៉ោង២២និង០០នាទី ចំណុចភូមិពុកឫស្សីលើ ស្រុកខ្សាច់កណ្តាល ខេត្តកណ្តាល។
ជនរងគ្រោះឈ្មោះ ហម ពក ភេទប្រុស អាយុ៣៨ឆ្នាំ ជនជាតិខ្មែរ មុខរបរកសិករ មានទីលំនៅភូមិក្រូចសើច ឃុំពុកឫស្សី ស្រុកខ្សាច់កណ្តាល ខេត្តកណ្តាល (មានរបួសស្នាមកំភួនដៃខាងឆ្វេង០១កន្លែង ដេរចំនួន០៧ថ្នេរ)។
ជនសង្ស័យឈ្មោះ ស៊ឺន គឹមហុង ភេទប្រុស អាយុ២៧ឆ្នាំ ជនជាតិខ្មែរ មុខរបរកសិករ មានទីលំនៅភូមិឃុំកើតហេតុ (មានរបួសក្បាល០១កន្លែង)។
នគរបាលប្រាប់ឲ្យដឹងថា នៅថ្ងៃទី២៤ ខែធ្នូ ឆ្នាំ២០១៨ វេលាម៉ោង១១និង០០នាទី ឈ្មោះ ស៊ឺន គឹមហុង បានជិះម៉ូតូធំម៉ាក Yamaha ពណ៌ខៀវ ក្នុងដៃមានកាន់កាំបិតខ្វែវ១ដើម ជិះចេញពីទិសខាងត្បូងទៅទិសខាងជើង ឆ្ពោះទៅអាស្រមរបស់ លោកតា ទិត្យ នៅមុខវត្តឥន្ទលីបូណ៌ ភូមិពុកឫស្សីលើ ឃុំពុកឫស្សី ហើយធ្វើការអុកឡុករកកាប់ លោកតា ទិត្យ បានបន្តិច ឈ្មោះ ស៊ឺន គឹមហុង ជិះចេញពីអាស្រមលោកតាទិត្យ ទៅទិសខាងជើង ពេលមកដល់ហាងកាហ្វេរបស់ឈ្មោះ ផែន ដារ៉ា ហៅ ផាន់ នៅភូមិពុកឫស្សីលើ ឃុំពុកឫស្សី ឈ្មោះ ស៊ឺន គឹមហុង បានឈប់ម៉ូតូអុកឡុកក្នុងហាងកាហ្វេ និងយកកាំបិតខ្វែវដេញកាប់ឈ្មោះ ផែន ដារ៉ា ពេលនោះឈ្មោះ ផែន ដារ៉ា បានរាយការណ៍ជូនសមត្ថកិច្ចនគរបាលប៉ុស្តិ៍ពុកឫស្សី កម្លាំងនគរបាលប៉ុស្តិ៍បានចុះដល់កន្លែងកើតហេតុ ស្របពេលនោះឈ្មោះ ហម ពក ជាកូនសិស្សលោកតាទិត្យ ក៏បានទៅដល់កន្លែងកើតហេតុដែរ ហើយបានចូលទៅជួយឃាត់ និងដណ្ដើមកាំបិតខ្វែវពី ឈ្មោះ ស៊ឺន គឹមហុង ស្រាប់តែឈ្មោះ ស៊ឺន គឹមហុង ស្ទុះមកកាប់ ឈ្មោះ ហម ពក មួយកាំបិតខ្វែវត្រូវចំកំភួនដៃខាងឆ្វេងបណ្តាលឲ្យមានរបួសស្នាម ភ្លាមនោះកម្លាំងនគរបាលប៉ុស្តិ៍ រួមជាមួយប្រជាពលរដ្ឋ បានចូលចាប់ឃាត់ឈ្មោះ ស៊ឺន គឹមហុង បញ្ជូនមកអធិការដ្ឋាននគរបាលស្រុក ដើម្បីចាត់ការតាមនីតិវិធី៕
Source: Kampuchea Thmey Daily
0 Comments