ភ្នំពេញ ៖ វេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីភ្នំពេញដែលបានធ្វើឡើងនៅក្នុងវិទ្យាស្ថានជាតិអប់រំ សង្កាត់ចតុមុខ ខណ្ឌដូនពេញ ប្រជាពលរដ្ឋបានស្នើសុំឲ្យអាជ្ញាធរជួយកាប់ដើមឈើ ដែលមានសភាពទ្រុឌទ្រោមនិងមានវិធានការទៅលើការដ្ឋានសំណង់ដែលបានសាងសង់ធ្វើឲ្យប៉ះពាល់ដល់ផ្ទះប្រជាពលរដ្ឋបណ្តាលឲ្យប្រះស្រាំ។ ប៉ុន្តែអ្វីដែលជាការចាប់អារម្មណ៍ក្នុងវេទិកាផ្សព្វផ្សាយនិងពិគ្រោះយោបល់នេះ ប្រជាពលរដ្ឋមិនបានលើកឡើងពីបញ្ហា ចោរកម្ម សន្តិសុខ សណ្តាប់ធ្នាប់នោះទេ។
វេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីនេះបានធ្វើឡើងនៅព្រឹកថ្ងៃទី២៥ ធ្នូ២០១៨ ក្រោមអធិបតីភាពលោកម៉ប់ សារិន ប្រធានក្រុមប្រឹក្សារាជធានីភ្នំពេញ លោកឃួង ស្រេង អភិបាលរាជធានីភ្នំពេញ និងលោកសូ ម៉ារ៉ា ប្រធានក្រុមការងារថ្នាក់ជាតិចុះជួយខណ្ឌដូនពេញ ព្រមទាំងមានការចូលរួមពីប្រជាពលរដ្ឋជាង៧០០នាក់ផងដែរ។
មន្ត្រីរដ្ឋបាលរាជធានីភ្នំពេញបានបញ្ជាក់ថា វេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីនៅព្រឹកថ្ងៃទី២៥ធ្នូនេះ គឺផ្តោតសំខាន់ពាក់ព័ន្ធបញ្ហា៣ចំណុច ដែលទាក់ទងនឹងកង្វល់ផ្ទាល់របស់ប្រជាពលរដ្ឋ ក្នុងនោះរួមមាន បញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍមូលដ្ឋាន។
លោកម៉ប់ សារិន បានមានប្រសាសន៍លើកឡើងថា សម្រាប់រដ្ឋបាលរាជធានីភ្នំពេញ ការចូលរួមមតិយោបល់ និងលើកឡើងនូវសំណើ សំណួរ សំណូមពររបស់បងប្អូនប្រជាពលរដ្ឋ ពិតជាបាននាំមកនូវសក្តានុពលយ៉ាងធំធេង និងបានធ្វើឲ្យរដ្ឋបាលរាជធានីភ្នំពេញ ឆ្លុះបញ្ចាំងនូវចំណុចអសកម្មនានាពេលកន្លងមក ដើម្បីអោយរដ្ឋបាលរាជធានីធ្វើការកែលម្អឡើងវិញ និងអភិវឌ្ឍន៍ក្នុងមូលដ្ឋានឲ្យបានល្អប្រសើរ និងស្វែងរកនូវដំណោះស្រាយជូនប្រជាពលរដ្ឋឲ្យមានតម្លាភាព និងមានប្រសិទ្ធភាពក្នុងនាមជាតំណាងរដ្ឋបាលសាធារណៈ។
លោកបន្តថា វាទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីត្រូវបានធ្វើឡើងក្នុង១ឆ្នាំម្តង សម្រាប់មួយខណ្ឌៗ មានន័យថា ទាំង១២ខណ្ឌចំណុះឲ្យរដ្ឋបាលរាជធានីភ្នំពេញនិងធ្វើឡើងចំនួន១២ដង ស្របពេលដែលឆ្នាំ២០១៨នេះ រដ្ឋបាលរាជធានីភ្នំពេញបានបើកវេទិកាបានចំនួន១១ខណ្ឌរួចមកហើយ នេះជាខណ្ឌទី១២ហើយ ជាខណ្ឌចុងបញ្ចប់ផងដែរ។
លោកបញ្ជាក់ប្រាប់ប្រជាពលរដ្ឋថា អ្វីដែលចាំបាច់ត្រូវតែលើកឡើង ដើម្បីឲ្យអាជ្ញាធរដោះស្រាយជូន ព្រោះវេទិកានេះ ក្នុងមួយឆ្នាំមានតែម្តង។ លោកឃួង ស្រេង បានមានប្រសាសន៍លើកឡើងថា ការដោះស្រាយរាល់កង្វល់ សំណូមពរប្រជាពលរដ្ឋ គឺពិតជាដោះស្រាយមិនងាយនឹងអស់ទេ ពោលគឺតែងតែកើតមាន ដូចយើងរៀនអញ្ចឹងដែរ គឹរៀនមិនចេះបញ្ចប់នោះទេ ដូច្នេះទេក្នុងនាមអាជ្ញាធរ និងមន្ត្រីជំនាញយើងត្រូវរួមគ្នាដើម្បីដោះស្រាយរាល់បញ្ហាប្រឈមដែលប្រជាពលរដ្ឋលើកឡើង។
លោកឃួង ស្រេងបានបន្តថា វេទិកាផ្សព្វផ្សាយនិងពិគ្រោះយោបល់ខាងលើនេះ មានសំណួរសំណូមពរផ្ទាល់មាត់ចំនួន៥នាក់និង លាយលក្ខអក្សរចំនួន៥៩បញ្ហា ដែលនាំឲ្យរដ្ឋបាលរាជធានី មើលឃើញពីចំណុចខ្វះខាត ដើម្បីបន្តដោះស្រាយជូនប្រជាពលរដ្ឋ។ ក្នុងនាមជាតំណាងប្រជាពលរដ្ឋ យើងត្រូវដោះស្រាយជូនប្រជាពលរដ្ឋដោយមានតម្លាភាព។
ក្រៅពីនេះ លោកអភិបាលរាជធានីភ្នំពេញក៏បានជំរុញឲ្យលោកអភិបាលខណ្ឌដូនពេញត្រូវតែចុះទៅមើលភ្លាមៗ បើមានបណ្តឹងប្រជាពលរដ្ឋ ពោលគឺបើរឿងសំណង់ត្រូវហៅអ្នកជំនាញទៅពិនិត្យ បើពិនិត្យឃើញថា ប្រជាជនត្រូវ យើងត្រូវឃាត់សំណង់ទាំងនោះ។ កុំបិទភ្នែក ព្រោះនេះជាកិច្ចការងាររបស់យើង ដែលត្រូវតែធ្វើជូនពួកគាត់។
ជុំវិញបញ្ហាសំរាមវិញ លោកអភិបាលរាជធានីភ្នំពេញក៏បានលើកឡើងដែរថា ចាប់ពីចូលឆ្នាំថ្មីនេះទៅ រដ្ឋបាលរាជធានីភ្នំពេញ សហការជាមួយអន្តរក្រសួងអាចនឹងមានវិធានការម៉ឺងម៉ាត់បំផុតជាមួយនឹងអ្នកចោលសំរាមផ្ដេសផ្ដាសនៅតាមទីសាធារណៈ។
លោកបន្តថា ផុតចូលឆ្នាំនេះយើងក៏នឹងទៅប្រទេសចិន ដើម្បីសូមការជួយពីចិន លើការងារប្រមូលសំរាមនេះ តាមរយៈការសុំរថយន្តសំអាតសំរាម។
ពាក់ព័ន្ធនឹងរឿង អគ្គិសនី លោកអភិបាលក៏បានបញ្ជាក់បន្ថែមថា អគ្គិសនីសម្រាប់ផ្គត់ផ្គង់អាជីវកម្មធុនតូច នៅតាមផ្សារគឺមានតម្លៃ៧៤០រៀលក្នុងមួយគីឡូវ៉ាត់ តែសម្រាប់អគ្គិសនីផ្គត់ផ្គង់ឲ្យប្រជាពលរដ្ឋនៅតាមផ្ទះមានតម្លៃ៤៨០រៀលក្នុងមួយគីឡូវ៉ាត់ នេះជាកាដូថ្មីមួយទៀតរបស់សម្តេចតេជោជូនចំពោះបងប្អូនប្រជាពលរដ្ឋ។
លោកបញ្ជាក់ថា អ្នកម៉ៅការធំពីអគ្គិសនីកម្ពុជា ត្រូវប្រញាប់ទំនាក់ទំនងជាមួយអគ្គិសនីកម្ពុជាដើម្បីអោយខាងអគ្គិសនីកម្ពុជាជួយសម្រាលលើការងារនេះ៕
Source: Kampuchea Thmey Daily
0 Comments