ព្រៃវែង ៖ នៅព្រឹកថ្ងៃទី២៥ ខែធ្នូ ឆ្នាំ២០១៨ បានរៀបចំពិធីអបអរសាទរទិវាជាតិប្រយុទ្ធប្រឆាំងអំពើជួញដូរមនុស្ស ១២ធ្នូ ឆ្នាំ២០១៨ ក្រោមអធិបតីភាព ឯកឧត្ដម ជា សុមេធី អភិបាលខេត្តព្រៃវែង និងមានការអញ្ជើញចូលរួមមន្ទីរអង្គភាពនានាជុំវិញខេត្ត សិស្សានុសិស្សចំនួន២១៤នាក់។
លោកជំទាវ លៀង ស្រីម៉ុល ប្រធានលេខាធិការដ្ឋានប្រយុទ្ធប្រឆាំងអំពើជួញដូរមនុស្សបានឲ្យដឹងថាអំពើជួញដូរមនុស្ស និងអំពើការធ្វើអាជីវកម្មផ្លូវភេទ គឺជាបរិបទសាកល ដែលនៅតែបន្តកើតមានអាស្រ័យកត្តាចំនួន បី គឺ ការអប់រំសង្គម ការអនុវត្តច្បាប់ និងការឆក់ឱកាសពីជនល្មើស។ រូបភាព នៃអំពើជួញដូរមនុស្ស មិនត្រឹមតែជាការជួញដូរ ឬកេងប្រវ័ញ្ចកម្លាំងពលកម្ម និងផ្លូវភេទប៉ុណ្ណោះទេ តែក្នុងឆ្នាំកន្លងទៅ ក៏មានលេចចេញនូវបាតុភាពមួយចំនួន ដែលមានទំនោរទៅអំពើជួញដូរសរីរាង្គ និងបទល្មើសរត់ពន្ធ ឬជួញដូរទារកឆ្លងដែន ដែលហៅថា បទអន្តរការី នៃអំពើពពោះជំនួស។ នេះជាកង្វល់ដែលគណៈកម្មាធិការជាតិប្រយុទ្ធប្រឆាំងអំពើជួញដូរមនុស្សចាំបាច់ ត្រូវដាក់វិធានការស៊ើបអង្កេត ស្រាវជ្រាវ និងបង្ក្រាបឲ្យបានទាន់ពេលវេលា និងបានកសាងច្បាប់ បទដ្ឋានគតិយុត្តិពាក់ព័ន្ធបន្ថែមទៀត ដើម្បីជៀសវាងការដុះដាល នៃបទល្មើសដែលនាំឲ្យបង្កគ្រោះថ្នាក់កាន់តែច្រើនឡើងដល់ជីវិតមនុស្ស។
លោកជំទាវបានបន្តទៀតថា គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សមានគោលបំណងធ្វើការផ្សព្វផ្សាយតាមសាលារៀនឲ្យមានការប្រុងប្រយ័ត្នចំពោះល្បិចកលរបស់ជនឆបោក។
សម្រាប់បងប្អូនប្រជាពលរដ្ឋដែលធ្វើការចំណាកស្រុកឲ្យគាត់ចេះការពារខ្លួន បើករណីនេះកើតឡើងត្រូវចេះរាយការណ៍ទៅអាជ្ញាធរមានសមត្ថកិច្ចឲ្យបានទាន់ពេលវេលា។
ឯកឧត្ដម ជា សុមេធី អភិបាលខេត្តបានថ្លែងការកោតសរសើរចំពោះគ្រប់កិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីគ្រប់លំដាប់ថ្នាក់មាន ឃុំ សង្កាត់ ក្រុង ស្រុក និងអង្គការមិនមែនរដ្ឋាភិបាលជាតិ និងអន្តរជាតិ ព្រមទាំងវិស័យឯកជននានា ដែលតែងតែខិតខំប្រឹងប្រែងរួមគ្នាជម្នះដោះស្រាយបញ្ហាចំពោះមុខ ដោយមិនខ្លាចនឿយហត់ ពុះពារប្រឆាំងដាច់ខាតទៅនិងសកម្មភាពរបស់ឧក្រិដ្ឋជន ស្របទៅតាមទិសដៅ នៃគោលនយោបាយជាតិ។
ឯកឧត្ដមបានបន្ថែមទៀតថា រាជរដ្ឋាភិបាលកម្ពុជា បាននិងកំពុងរិះរកគ្រប់វិធានការ និងពង្រឹងការអនុវត្តច្បាប់ពាក់ព័ន្ធនានា ដើម្បីការពារប្រជាពលរដ្ឋពីបទល្មើសដ៏ស្មុគស្មាញនេះ គណៈកម្មាធិការខេត្តប្រយុទ្ធប្រឆាំងអំពើជួញដូរមនុស្ស បាននិងកំពុងជំរុញអនុវត្តយុទ្ធសាស្ត្រទាំងបួនរបស់ផែនការជាតិ ដែលមានជាអាទិ៍ ការងារបង្ការទប់ស្កាត់ កិច្ចការពារជនរងគ្រោះ ការពង្រឹងការអនុវត្តច្បាប់ និងការពង្រឹងកិច្ចសហការដើម្បីរួមចំណែកធានាបាន” គ្មានអំពើជួយដូរមនុស្សនៅកម្ពុជា”។
ឆ្លៀតនៅក្នុងឱកាសនោះដែ ឯកឧត្ដម ក៏សូមផ្ដាំផ្ញើដល់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្សត្រូវខិតខំអនុវត្តបន្តទៀត ដើម្បីកាត់បន្ថយករណីជួញដូរមនុស្ស និងវែកមុខសញ្ញាណាជនខិលខូច មេខ្យល់យកមកផ្ដន្ទាទោសទៅតាមច្បាប់។ និងសូមដាស់តឿនដល់ប្រជាពលរដ្ឋទាំងអស់ សូមកុំប្រកាន់យកអំពើពពោះជំនួសជាមធ្យោបាយក្នុងការដោះស្រាយជីវភាព ព្រោះជាអំពើអមនុស្សធម៌ ជាអំពើបាប និងជាបទល្មើស។ គ្រួសារ និងស្ត្រីក្រីក្រជាច្រើនបានព្យាយាមប្រឹងប្រែងរកមធ្យោបាយ ដើម្បីដោះស្រាយជីវភាពខ្លួន និងចិញ្ចឹមកូន ទោះជាលំបាកយ៉ាងណាក៏ដោយ តែមិនបានយកជម្រើសលក់ ឬបោះបង់កូនខ្លួនបានពពោះ ដើម្បីដោះស្រាយការលំបាក់របស់ខ្លួនឡើយ៕
Source: Kampuchea Thmey Daily
0 Comments