កំពង់ស្ពឺ ៖ ក្មេងទំនើង២ក្រុម បានជិះម៉ូតូដេញកាប់ចាក់គ្នាលើផ្លូវជាតិលេខ៣ ដូចក្នុងរឿងហុងកុង បានជ្រុលទៅបុករថយន្តមួយគ្រឿងញេញមួយទំហឹង បណ្ដាលឲ្យស្លាប់ម្នាក់ របួសធ្ងន់ម្នាក់ និងឆេះកាប៊ីនរថយន្តខូចខាតទាំងស្រុងតែម្ដង។
ហេតុការណ៍ដេញកាប់ចាក់គ្នាដូចក្នុងហុងកុងនេះ កើតឡើងនៅវេលាម៉ោង២១និង៣០នាទី ថ្ងៃទី០៧ ខែធ្នូ ឆ្នាំ២០១៨នេះ តាមបណ្ដោយផ្លូវជាតិលេខ៣ ខាងត្បូងផ្សារត្រាំខ្នា ចន្លោះគីឡូម៉ែត្រ (៤៤-៤៥) ស្ថិតនៅក្នុងភូមិត្រាំខ្នា ឃុំសុភី ស្រុកបាទី ខេត្តតាកែវ។
នគរបាលបានឲ្យដឹងថា ក្មេងទំនើងមួយក្រុម ជិះម៉ូតូ ម៉ាក MSX ពណ៌ខ្មៅ គ្មានស្លាកលេខ បើកបរដោយឈ្មោះ សឿន វណ្ណា ភេទប្រុស អាយុ១៩ឆ្នាំ រស់នៅភូមិសង្គមមានជ័យ ឃុំពោធិអង្គ្រង ស្រុកបរសេដ្ឋ ខេត្តកំពង់ស្ពឺ ទិសដៅពីត្បូង ទៅជើង ដោយដេញកាប់ចាក់គ្នាជាមួយក្រុមម្ខាងទៀត ប៉ុន្តែបានជ្រុលទៅបុកជាប់ក្រោមរថយន្តកូរ៉េមួយគ្រឿងទៀត ខណៈពេលកំពុងធ្វើចរាចរណ៍បញ្ច្រាសទិសគ្នា បង្កជាអគ្គិភ័យឆាបឆេះយ៉ាងសន្ធោសន្ធៅ។
នគរបាលបានឲ្យដឹងទៀតថា ចំពោះក្មេងទំនើងដែលបើកបរម៉ូតូ ឈ្មោះ សឿន វណ្ណា ភេទប្រុស អាយុ១៩ឆ្នាំ បានស្លាប់ភ្លាមៗម្នាក់ និងម្នាក់ទៀត ឈ្មោះ ឃីម រ៉ាវី ភេទប្រុស អាយុ២០ឆ្នាំ រងរបួសធ្ងន់។ ចំណែករថយន្ត ម៉ាក HYUNDIA ចំណុះ១.៥តោន ពណ៌ខៀវ គ្មានស្លាកលេខ អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់។
បន្ទាប់ពីកើតហេតុ កម្លាំងនគរបាលបានប្រើប្រាស់រថយន្តពន្លត់អគ្គិភ័យរបស់អធិការដ្ឋាននគរបាលស្រុកបាទី០១គ្រឿង ដើម្បីអន្តរាគមន៍ជួយសង្គ្រោះ និងបាញ់ទឹកពន្លត់អគ្គិភ័យដែលឆាបឆេះរថយន្តនោះ។
បច្ចុប្បន្ន សព ត្រូវបានក្រុមគ្រួសារយកទៅធ្វើបុណ្យតាមប្រពៃណី។ ចំណែកវត្ថុតាងយកទៅរក្សាទុកនៅអធិការដ្ឋានស្រុកបាទីរង់ចាំដោះស្រាយគ្នាតាមនីតិវិធីច្បាប់៕
Source: Kampuchea Thmey Daily
0 Comments