ភ្នំពេញ ៖ នៅថ្ងៃទី១០ ខែធ្នូ ឆ្នាំ២០១៨ ដែលជាខួបលើកទី៧០ នៃទិវាសិទ្ធិមនុស្សអន្តរជាតិនេះ នៅប្រទេសកម្ពុជា មានការរៀបចំយ៉ាងគគ្រឹកគគ្រេងនៅទីតាំងផ្សេងៗគ្នា ក្នុងនោះតំណាងសហជីព កម្មករ កម្មការិនី និងសង្គមស៊ីវិល បានរៀបចំនៅទីលានប្រជាធិបតេយ្យ និងមជ្ឈមណ្ឌលមង្គលឧត្តម ចំណែកតំណាងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជាបានរៀបចំនៅពហុកីឡាដ្ឋានជាតិអូឡាំពិក (កាលពីល្ងាចថ្ងៃសៅរ៍ ទី០៨ ខែធ្នូ) រីឯរាជរដ្ឋាភិបាលកម្ពុជា បានរៀបចំកម្មវិធីនេះយ៉ាងឱឡារិកនៅមជ្ឈមណ្ឌលពាណិជ្ជកម្មកោះពេជ្រ នារាជធានីភ្នំពេញ។
លោក អាត់ អន់ ប្រធានសហភាពការងារកម្ពុជា ដែលបានដឹកនាំសហជីព និងកម្មករ រៀបចំអបអរសាទរនៅមជ្ឈមណ្ឌលមង្គលឧត្តមបានថ្លែងថា ថ្ងៃនេះជាថ្ងៃពិសេសដែលសហជីពកម្មករបាននាំគ្នារៀបចំអបអរសាទរទិវាសិទ្ធិមនុស្សអន្តរជាតិ ខួបលើកទី៧០ (១០ ធ្នូ ១៩៤៨-១០ ធ្នូ ២០១៨) ហើយកម្មវិធីនេះ ត្រូវបានរៀបចំធ្វើឡើងរៀងរាល់ឆ្នាំ ហើយតែងតែមានការចូលរួមពីអង្គការសំខាន់ៗយ៉ាងច្រើនរាប់ពាន់នាក់។ ទោះយ៉ាងណាលោក អាត់ អន់ បានត្អូញត្អែរថា រយៈពេល២ឆ្នាំចុងក្រោយនេះ ការរៀបចំហាក់ដូចជាមិនបានធំដំដូចមុនៗទេ ក្រោយពីមានភាពតាមតឹងខ្លះផ្នែកនយោបាយ។
ជាមួយនឹងការលើកខាងលើនេះ ក្នុងនាមតំណាងឲ្យសហភាពការងារកម្ពុជា លោក អាត់ អន់ បានលើកឡើងជាសំណើសំនួន១៩ផងដែរ ដើម្បីឲ្យរាជរដ្ឋាភិបាលជួយដោះស្រាយ ដែលរួមមានកំណត់ប្រាក់ឈ្នួល២០៧ដុល្លារ ក្នុងមួយខែ, ពង្រឹកសេវារបបសន្តិសុខសង្គម និងធានានូវសេរីភាពសហជីពជាដើម។
ចំណែកលោក វន់ ពៅ ប្រធានសមាគម ប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ (IDEA) ដែលបានដឹកនាំរៀបចំពិធីនេះនៅទីលានប្រជាធិបតេយ្យបានអំពាវនាវឲ្យភាគីពាក់ព័ន្ធអនុវត្តន៍តាមសារាចរណែនាំរបស់រាជរដ្ឋាភិបាល ដែលមិនអនុញ្ញាតឲ្យយកលុយ ពីអ្នកលក់ដូរតាមកញ្ច្រែង តាមល្អី ជាពិសេសត្រូវរៀបចំអនាម័យ និងសន្តិសុខសម្រាប់អាជីវករ។
លោកបញ្ជាក់ថា សព្វថ្ងៃនៅតែមានអាជីវករជាច្រើន បានរងគ្រោះដោយការប្រើអំពើហិង្សា ដូចជាការចាក់បន្លែ ឬសម្ភារៈផ្សេងៗចោល ដែលបញ្ហានេះផ្ទុយទៅនឹងសារាចររបស់រាជរដ្ឋាភិបាល លេខ១១សរ ពីព្រោះសារាចរនេះ មិនអនុញ្ញាតឲ្យសមត្ថកិច្ចយកភាស៊ីពីអ្នកលក់ដូរតាមកញ្ច្រែង តាមល្អីនោះទេ។
នៅទីលានប្រជាធិបតេយ្យនោះដែរ លោក រ៉ុង ឈុន ប្រធានសហភាពសហជីពកម្ពុជា បានលើកឡើងពីគំរោងដកប្រព័ន្ធអនុគ្រោះពន្ធ (EBA) ពីកម្ពុជា របស់សហភាពអឺរ៉ុប (EU) ដោយអះអាងថា បច្ចុប្បន្នមានកម្មករប្រមាណជា៩០ភាគរយ បានជំពាក់លុយធនាគារ ដូច្នេះបើមានការដកមែននោះ នឹងប៉ះពាល់យ៉ាងខ្លាំងដល់កម្មករ កម្មការិនី និងអ្នកពាក់ព័ន្ធ។
ទាក់ទងបញ្ហាសិទ្ធិមនុស្សនេះដែរ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី ដែលបានអញ្ជើញចូលរួមទិវាសិទ្ធិមនុស្សអន្តរជាតិ នៅសាលមហោស្រពកោះពេជ្រ កាលពីព្រឹកថ្ងៃទី១០ ខែធ្នូ ឆ្នាំ២០១៨ បានលើកឡើងថា ស្ថានភាពសិទ្ធិមនុស្សនៅកម្ពុជា មានភាពល្អប្រសើរ បើប្រៀបធៀបនឹងបណ្តាប្រទេសមួយចំនួននៅទ្វីបអាស៊ី នៅអឺរ៉ុប ហើយនៅកម្ពុជា សន្តិភាព គឺជាគន្លឹះមួយដែលនាំឲ្យសិទ្ធិមនុស្សកាន់តែត្រូវបានលើកកម្ពស់៕
Source: Kampuchea Thmey Daily
0 Comments