កំពង់ស្ពឺ ៖ សំណុំរឿងដ៏ក្តៅគគុកពាក់ព័ន្ធករណីជនឆបោកមួយក្រុម ដែលមានរៀបចំផែនការ និងយុទ្ធសាស្ត្រច្បាស់លាស់ ត្រូវបានកម្លាំងនគរបាលទទួលផែនសន្តិសុខ នៃស្នងការដ្ឋាននគរបាលខេត្តកំពង់ស្ពឺ បំបែកបានដោយឃាត់ខ្លួនជនសង្ស័យ៧នាក់ បញ្ជូនទៅកាន់តុលាការដើម្បីបន្តនីតិវិធីតាមផ្លូវច្បាប់។
ក៏ប៉ុន្តែសំណុំរឿងមួយនេះ កំពុងកើតមានភាពចំរូងចំរាសយ៉ាងក្តៅគគុករវាងសមត្ថកិច្ចជាអ្នកអនុវត្តច្បាប់ និងអ្នករត់ការការពារក្រុមជនសង្ស័យដើម្បីបាននៅក្រៅឃុំ និងមានអាថ៌កំបាំងមិនប្រក្រតីជាច្រើនទៀត រហូតរង្គោះរង្គើដល់ស្ថាប័នតុលាការនៅមិនសុខផងដែរ។
ពាក់ព័ន្ធរឿងឆបោកប្រាក់ជាង១លានដុល្លារ ដ៏ចំរូងចំរាសនេះ លោកឧត្តមសេនីយ៍ ញ៉ែម សៅ ស្នងការរង ទទួលផែនសន្តិសុខ នៃស្នងការដ្ឋាននគរបាលខេត្តកំពង់ស្ពឺ លោកមិនធ្វើអត្ថាធិប្បាយអ្វីវែងឆ្ងាយនោះទេ ដោយបានបញ្ជាក់យ៉ាងខ្លីថា «ភាពចំរូងចំរាសក្នុងករណីបំបែកសំណុំក្រុមឆបោកលុយដ៏ច្រើនសន្ធឹកសន្ធាប់នេះ ផ្ទុះឡើងដោយសារតែសាច់ឯងប៉ុណ្ណោះ»។
សូមរម្លឹកថា កាលពីថ្ងៃទី០៣ ខែធ្នូ ឆ្នាំ២០១៨ កន្លងមកនេះ មេខ្លោង និងអ្នកពាក់ព័ន្ធក្នុងសំណុំរឿងប្រើល្បិចរៀបចំផែនការ និងយុទ្ធសាស្ត្របោកប្រាស់អ្នករកស៊ីចងការប្រាក់ប្រមូលលុយបានប្រមាណជាង ១លានដុល្លារ នោះ ត្រូវបានកម្លាំងជំនាញទទួលផែនការងារសន្ដិសុខ នៃស្នងការដ្ឋាននគរបាលខេត្តកំពង់ស្ពឺ ឃាត់ខ្លួនបានជាបន្តបន្ទាប់បាន ៧នាក់ រួមមាន
១-ឈ្មោះ ភឿង សុភ័ន ភេទស្រី អាយុ២៥ឆ្នាំ ទីលំនៅភូមិព្រះខែ ឃុំកាហែង ស្រុកសំរោងទង បច្ចុប្បន្នស្នាក់នៅផ្ទះជួលម្ដុំហាងខារ៉ាអូខេរស្មីអង្គរ ជាមេខ្លោង មានមុខរបរ អ្នករកស៊ីចងការប្រាក់ និងផ្ដល់សេវាបង់ផ្ដាច់តាមធនាគារ។
២-ឈ្មោះ នី វណ្ណារី ភេទស្រី អាយុ៣១ឆ្នាំ ទីលំនៅភូមិផ្សារគីឡូលេខ៩ សង្កាត់ច្រាំងចំរេះ ខណ្ឌឫស្សីកែវ រាជធានីភ្នំពេញ ជាមេខ្លោង។
៣-ឈ្មោះ ភឿង ចាន់ឌី ភេទស្រី អាយុ២៩ឆ្នាំ ទីលំនៅបច្ចុប្បន្ន ភូមិព្រះស្រែ ឃុំកាហែង ស្រុកសំរោងទង ខេត្តកំពង់ស្ពឺ អ្នករួមគំនិតក្នុងអំពើឆបោក (ដើរតួជាអ្នកខ្ចីប្រាក់កូនបំណុលជាបងបង្កើតឈ្មោះភឿង សុភ័ន)។
៤-ឈ្មោះ អ៊ូច សុភា ភេទស្រី អាយុ ៤២ឆ្នាំ ទីលំនៅបច្ចុប្បន្ន ភូមិក្តាន់រោយ ឃុំដំណាក់អំពិល ស្រុកអង្គស្នួល ខេត្តកណ្តាល អ្នករួមគំនិតក្នុងអំពើឆបោក។ ៥-ឈ្មោះ ស៊ឹម លាប ភេទស្រី អាយុ៣២ឆ្នាំ ទីលំនៅបច្ចុប្បន្ន ភូមិស្លា ឃុំវល្លិស ស្រុកសំរោងទង ខេត្តកំពង់ស្ពឺ ជាអ្នករួមគំនិតក្នុងអំពើឆបោក។ ៦-ឈ្មោះ ប៉ែន ស្រីមាន ភេទស្រី អាយុ ៥២ឆ្នាំ ទីលំនៅបច្ចុប្បន្ន ភូមិថ្មី សង្កាត់ផ្សារដីហុយ ខណ្ឌពោធិ៍សែនជ័យ រាជធានីភ្នំពេញ រួមគំនិតក្នុងអំពើឆបោក។ ៧-ឈ្មោះ ផូ ថេង ភេទប្រុស អាយុ២៤ឆ្នាំ ទីលំនៅបច្ចុប្បន្ន ភូមិរកាជោ ឃុំពើក ស្រុកអង្គស្នួល ខេត្តកណ្តាល អ្នកផ្តល់មធ្យោបាយ (សមគំនិត អ្នករត់កង់បី)។
នគរបាលបានឲ្យដឹងថា កម្លាំងជំនាញផែនការងារសន្ដិសុខ នៃស្នងការដ្ឋាននគរបាលខេត្តកំពង់ស្ពឺ បានបើកបច្ចេកទេសស៊ើបអង្កេតដើម្បីឈានដល់ការបំបែកសំណុំរឿងករណីឆបោកប្រាក់ជាប្រព័ន្ធដែលមានលក្ខណៈអង្គការចាត់តាំងច្បាស់លាស់ក្នុងការទំនាក់ទំនងជាមួយម្ចាស់បំណុល និងភ្នាក់ងារផ្នែកកម្ចីឥណទាន (CO) ក្លែងក្លាយហើយចាត់ តាំងមនុស្សឲ្យធ្វើជាកូនបំណុលដែលត្រូវខ្ចីប្រាក់ដើម្បីយកទៅបង់ផ្ដាច់នៅតាមធនាគារ និងគ្រឹះស្ថានមីក្រូហិរញ្ញវត្ថុឯកជនផ្សេងៗ។
នគរបាលសន្តិសុខនិយាយថា អ្នកពាក់ព័ន្ធ២នាក់ទៀត តាំងខ្លួនជាភ្នាក់ងារផ្តល់កម្ចីរបស់ធនាគារ ABA (CO) កំពុងគេចខ្លួនហើយសមត្ថកិច្ចកំពុងតាមប្រមាញ់បន្តទៀត។
ក្រុមជនឆបោកប្រាក់ ដែលរៀបផែនការបានយ៉ាងល្អឥត ខ្ចោះទាំង០៧នាក់ គឺក្រោមការបញ្ជារបស់ឈ្មោះ ភឿង សុភ័ន និងឈ្មោះ នី វណ្ណារី រៀបចំផែនការធ្វើការទំនាក់ទំនងជាមួយអ្នកមានប្រាក់ និងអ្នកមានមុខរបររកស៊ីចងការប្រាក់ឯកជន។
ក្រោយពីការទំនាក់ទំនងតាមផែនការរួចឈ្មោះ ភឿង សុភ័ន និងឈ្មោះ នី វណ្ណារី បានរៀបចំឲ្យអ្នកនៅក្រោមបញ្ជាទៅជួបជាមួយនឹងម្ចាស់ប្រាក់ ដើម្បីទទួលប្រាក់ ករណីនេះខាងម្ចាស់ប្រាក់ចង់ដឹងថា នៅខ្វះលុយប៉ុន្មាន? នៅក្នុងស្ថាប័នធនាគារឯកជនមួយណា? អ្នកណាជាអ្នកកាន់ឯកសារកូនបំណុល និងបានឲ្យលេខទូរស័ព្ទភ្នាក់ងារផ្តល់កម្ចី (CO) ក្លែងក្លាយ ទៅដល់ម្ចាស់ប្រាក់ទាក់ទងសួរនាំអំពីសាច់ប្រាក់របស់អតិថិជនដែលចង់ខ្ចីបង់ផ្ដាច់ និងការផ្ដល់កម្ចីឲ្យបន្ដវិញ។
ក្រុមឆបោកដោយមានអង្គការចាត់តាំងត្រឹមត្រូវនេះ ដើរស៊ើបរកអ្នកមានប្រាក់រួចទៅទាក់ទងរបៀបខ្ចីប្រាក់រយៈពេលខ្លីរួចសងវិញដោយផ្ដល់ការប្រាក់ខ្ពស់រួចចាប់ផ្ដើមបញ្ជូនមនុស្សទៅខ្ចីបន្ដបន្ទាប់ធ្វើឲ្យម្ចាស់លុយមានការជឿទុកចិត្ដឈានដល់ការឆបោក រួចឆ្លើយរកលេសនេះ លេសនោះថាធនាគារកំពុងជាប់បិតបញ្ជីជាដើម....។
មេខ្លោងឈ្មោះ ភឿង សុភ័ន ត្រូវបានតុលាការឃុំខ្លួនក្នុងពន្ធបណ្ដោះអាសន្ន ប៉ុន្តែបានអ្នកមានឥទ្ធិពលដែលស្និទ្ធស្នាលនឹងមន្ត្រីតុលាការរត់ការធានាចេញពីពន្ធនាគារខេត្ដកំពង់ស្ពឺ ដើម្បីដាក់ឲ្យស្ថិតនៅក្រៅឃុំបណ្ដោះអាសន្នក្នុងសំណុំរឿងឆបោកប្រាក់ដ៏ច្រើនសន្ធឹកសន្ធាប់ជាង ១.០០០.០០០ (មួយលានដុល្លាអាមេរិក) ខណៈពេលកំពុងរងបណ្ដឹងជាច្រើនទៀតនៅស្ថាប័នអយ្យការអមសាលាដំបូងខេត្តកំពង់ស្ពឺ និងរាជធានីភ្នំពេញផងនោះ។
នៅថ្ងៃទី០៦ ខែធ្នូ ឆ្នាំ២០១៨ កន្លងមកនេះ អ្នកនាំសាលាដំបូងខេត្តកំពង់ស្ពឺ បានចេញសេចក្តីថ្លែងថា នៅថ្ងៃទី០៣ ខែធ្នូ ឆ្នាំ២០១៨ កន្លងមកនេះ អយ្យការអមសាលាដំបូងខេត្តកំពង់ស្ពឺ បានទទួលសំណុំរឿងព្រហ្មទណ្ឌ ពីស្នងការនគរបាលខេត្តកំពង់ស្ពឺ ក្នុងករណីឆបោកជាក្រុមមានការចាត់តាំងត្រឹមត្រូវ និងបញ្ជូនជនសង្ស័យ ០៧នាក់។
ក្រោយពីទទួលបានសំណុំរឿងតំណាងអយ្យការបានពិនិត្យសំណុំរឿងរួច បើកការស៊ើបសួរលើជនសង្ស័យ ០៨នាក់ ( ០៦នាក់ក្នុងចំណោម០៧នាក់ដែលនគរបាលឃាត់ខ្លួន និង០២នាក់ទៀតកំពុងរត់គេចខ្លួនដែលតាំងខ្លួនជាបុគ្គលិកធនាគារ ABA ) ត្រូវបានដាក់ក្រោមការពិនិត្យពីបទឆបោកមានស្ថានទម្ងន់ទោស ដែលបានប្រព្រឹត្តនៅភូមិត្រពាំងលើក សង្កាត់រកាធំ ក្រុងច្បារមន ខេត្តកំពង់ស្ពឺ កាលពីថ្ងៃទី១៦ ខែវិច្ឆិកា ឆ្នាំ២០១៨ តាមមាត្រា៣៧៧ និងមាត្រា៣៨០ នៃក្រមព្រហ្មទណ្ឌ។
អ្នកនាំពាក្យសាលាដំបូងខេត្តកំពង់ស្ពឺ បានបញ្ជាក់ថា ឈ្មោះ ផូ ថេង ភេទប្រុស អាយុ២៤ឆ្នាំ ទីលំនៅបច្ចុប្បន្ន ភូមិរកាជោ ឃុំពើក ស្រុកអង្គស្នួល ខេត្តកណ្តាល អ្នករត់ម៉ូតូកង់បីក្រោយពីសាកសួរពុំមានពាក់ព័ន្ធក្នុងករណីនេះឡើយ។
ចំពោះស្ត្រីឈ្មោះ ភឿង សុភ័ន ភេទស្រី អាយុ ២៥ឆ្នាំ ទីលំនៅភូមិព្រះខែ ឃុំកាហែង ស្រុកសំរោងទង បច្ចុប្បន្នស្នាក់នៅផ្ទះជួលម្ដុំហាងខារ៉ាអូខេរស្មីអង្គរ អ្នកនាំពាក្យសាលាដំបូងខេត្តកំពង់ស្ពឺ បានបញ្ជាក់បន្ថែមថា មានសំណុំរឿងព្រហ្មទណ្ឌជាច្រើនទៀត ដែលតុលាការកំពុងចាត់ការ ក្នុងករណីឆបោក ហើយជននេះធ្លាប់បានតុលាការដោះលែងឲ្យនៅក្រៅឃុំបណ្តោះអាសន្នក្រោមហេតុផលមានផ្ទៃពោះជិតគ្រប់ខែ។
ពាក់ព័ន្ធសំណុំរឿងឆបោកទ្រង់ទ្រាយធំ ដែលមានអង្គការចាត់តាំងត្រឹមត្រូវហើយកំពុងតែមានរឿងចំរូងចំរាសបង្កើតរឿងរ៉ាវដើម្បីចោទប្រកាន់គ្នាទៅមក រវាងម្ចាស់ករណី និងអ្នករត់ការកាងក្រុមជនសង្ស័យរហូតធ្វើឲ្យស្ថាប័នតុលាការរំជើបរំជួលឈានដល់ចេញសេចក្តីថ្លែងការណ៍ជាសាធារណៈបែបនេះ។
មហាជនរង់ចាំមើលថា តើតុលាការអាចឃុំមនុស្សមួយក្រុមនេះ ដែលរៀបចំផែនការយ៉ាងល្អិតល្អន់ដើរបោកប្រាស់យកប្រាក់អ្នកដទៃបានរហូតជាង១លានដុល្លារ បានរយៈពេលប៉ុន្មានខែដែរ?៕
Source: Kampuchea Thmey Daily
0 Comments