ប៉ូលិស​បារាំង​តាម​ប្រមាញ់​ខ្មាន់កាំភ្លើង​ បន្ទាប់ពី​ការវាយប្រហារ​នៅឯ​ផ្សារ​បុណ្យ​ណូអែល

ក្រុម​មន្ត្រី​បាន​និយាយ​កាលពី​ថ្ងៃ​ពុធ​ថា ប៉ូលិស​ប្រឆាំង​ភេរវកម្ម​របស់​បារាំង​រាប់រយ​នាក់​កំពុង​តាម​ប្រមាញ់​ខ្មាន់កាំភ្លើង​ម្នាក់ ​ដែល​បាន​វាយប្រហារ​អ្នកទិញ​ឥ​វ៉ាន់​សម្រាប់​ពិធីបុណ្យ​ណូអែល​នៅ​ផ្សារ​មួយ​ក្នុង​ទីក្រុង Strasbourg ខណៈ​ស្រែកថា “Allahu akbar” (​ព្រះ​ជា​ម្ចាស់​ដ៏​អស្ចារ្យ​)​។​
​
ការវាយប្រហារ​នៅក្នុង​ទីក្រុង​នេះ​កាលពី​យប់​ថ្ងៃ​អង្គារ​បាន​បណ្តាលអោយ​ម​នុស្ស​ពីរ​នាក់​ស្លាប់​និង​១៣​នាក់​រងរបួស​។​
​
រដ្ឋអាជ្ញា​ប្រឆាំង​ភេរវកម្ម​បារាំង​លោក Remy Heitz បាន​និយាយ​កាលពី​ថ្ងៃ​ពុធ​ថា ជនសង្ស័យ​ដែលមាន​ដើមកំណើត​នៅ​ទីក្រុង Strasbourg អាយុ​២៩​ឆ្នាំឈ្មោះ Cherif Chekatt បាន​បើក​ការបាញ់ប្រហារ​ដោយ​ប្រើ​កាំភ្លើងខ្លី​ហើយ​ចាក់​អ្នកធ្វើដំណើរ​អំឡុងពេល​ការវាយប្រហារ​របស់គាត់​។​
​
លោក Chekatt ដែល​ស្ថិតក្នុង​បញ្ជី​តាមដាន​សម្រាប់​ជនសង្ស័យ​ជ្រុលនិយម​សាសនា​គឺ​ត្រូវបាន​កាត់ទោស​៧​ដង​រួចទៅហើយ​នៅក្នុង​ប្រទេស​បារាំង អាល្លឺម៉ង់​និង​ស្វី​ស​សម្រាប់​ឧក្រិដ្ឋកម្ម​ជាច្រើន​រួមទាំង​អំពើ​ហឹ​ង្សា​និង​ការ​ប្លន់​ផងដែរ​។​
​
ម្តាយ​និង​ឪពុក​របស់គាត់​ព្រមទាំង​បងប្អូន​ពីរ​នាក់​ត្រូវបាន​ឃាត់ខ្លួន​ដើម្បី​សាកសួរ​នៅ​ថ្ងៃ​ពុធ​។​
​អនុរដ្ឋមន្ត្រី​ក្រសួងមហាផ្ទៃ​លោក Laurent Nunez បាន​ប្រាប់​វិទ្យុ France Inter កាលពី​ថ្ងៃ​ពុធ​ថា លោក Chekatt ត្រូវបាន​កំណត់ដោយ​ក​ង​កម្លាំង​សន្តិសុខ​បារាំង​នៅ​ឆ្នាំ​២០១៥​ថា​អាចជា​ជន​ជ្រុលនិយម​ខណៈពេល​ស្ថិតនៅក្នុង​ពន្ធនាគារ​បន្ទាប់ពី​គាត់​បាន​អំពាវនាវ​អោយមាន​ការអនុវត្តន៍​ទម្រង់​រ៉ាឌីកាល់​នៅក្នុង​តំបន់​។​
​
គាត់​បានរស់នៅ​ក្នុង​អចលនទ្រព្យ​មួយ​នៅ​ជិត​ផ្សារ​លក់​ផលិតផល​បុណ្យ​ណូអែល​នេះ​ដែល​បាន​ទាក់ទាញ​មនុស្ស​ប្រមាណ​ពីរលាន​នាក់​ជា​រៀងរាល់ឆ្នាំ​។​
​
តំបន់​ភាគច្រើន​នៅក្នុង​ទីក្រុង​នេះ​ក៏ដូចជា​អគារ​សភា​អ៊ឺរ៉ុប​ផងដែរ​គឺ​ត្រូវ​បិទទ្វា​ពេញ​មួយ​យប់​ខណៈដែល​ក្រុមប៉ូលិស​និង​ទាហាន​កំពុង​ស្វែងរក​ជនប្រដាប់អាវុធ​។​
​
រដ្ឋមន្ត្រី​មហាផ្ទៃ​លោក Christophe Castaner បាន​ប្រាប់​សមាជិកសភា​នៅ​ទីក្រុង​ប៉ារីស​ថា មនុស្ស​បីនាក់​បាន​ព្យាយាម​បញ្ឈប់​លោក Chekatt ដែល​ម្នាក់​ក្នុងចំណោម​ពួកគេ​ត្រូវបាន​គាត់​ចាក់​ប៉ុន្តែ​មិន​ស្លាប់​ទេ​។​
​ក្នុងអំឡុងពេល​នៃ​ការវាយប្រហារ​របស់គាត់ គាត់​បាន​រងរបួស​នៅក្នុង​ការបាញ់​តបត​ជាមួយ​ទាហាន​ដែល​កំពុង​ដើរល្បាត​តំបន់​នេះ​ជា​ផ្នែក​មួយ​នៃប្រតិបត្តិ​ការប្រឆាំង​ភេរវកម្ម​ជា​ទៀងទាត់​។​
​
ប្រភពព័ត៌មាន​ជិតស្និទ្ធ​នឹង​ការស៊ើបអង្កេត​បាន​ប្រាប់ AFP ថា បន្ទាប់មក ខ្មាន់កាំភ្លើង​បាន​ភៀសខ្លួន​ចេញពី​កន្លែងកើតហេតុ​នៅក្នុង​ឡាន​តាក់ស៊ី​មួយគ្រឿង​ចេញទៅ​តាម​សង្កាត់ Neudorf ភាគខាងត្បូង​របស់​ទីក្រុង​នេះ​ដែលជា​កន្លែង​គាត់​បាន​បាញ់​តបត​ជាមួយ​ប៉ូលិស​ម្តងទៀត​មុនពេល​បាត់​ខ្លួន​៕ AFP

​

Source: Kampuchea Thmey Daily