រតនគិរី ៖ ស្ត្រីវ័យចំណាស់ម្នាក់ បាន សម្រេចចិត្តបញ្ចប់ជីវិតខ្លួនឯង ចោលកូននិងចៅ ខណៈមានជំងឺរ៉ាំរ៉ៃជាច្រើនឆ្នាំមកហើយនោះ។
ហេតុការណ៍បង្កការភ្ញាក់ផ្អើលនេះ បានកើតឡើងកាលពីវេលាម៉ោង៥និង៥នាទីល្ងាចថ្ងៃសៅរ៍ ១កើត ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៨ ខែធ្នូ ឆ្នាំ២០១៨ នៅចំណុចលើផ្ទះជនរងគ្រោះស្ថិតនៅភូមិឡូន សង្កាត់យក្ខឡោម ក្រុងបានលុង។
លោក ជាង ហឿង នាយប៉ុស្តិ៍រដ្ឋបាលសង្កាត់យក្ខឡោម បានឲ្យដឹងថា ស្ត្រីម្នាក់ធ្វើអត្តឃាតខ្លួនឯងឈ្មោះ ចេក រឹង អាយុ៧៥ឆ្នាំ ជនជាតិទំពួន មានទីលំនៅភូមិ/ឃុំកើតហេតុខាងលើ។ ជនរងគ្រោះបានយកខ្សែអង្រឹងប្រវែង២ម៉ែត្រទៅចង.កជាប់នឹងធ្នឹមផ្ទះ ក្រោយមកសាច់ញាតិបានទៅប្រទះឃើញហើយមានការឆោឡោតែម្តង។
លោកថា មូលហេតុ ជនរងគ្រោះមានជំងឺប្រចាំកាយជាច្រើនឆ្នាំហើយតែព្យាបាលមិនជាសះស្បើយសោះ ទើបពេលនេះគាត់សម្រេចចិត្តបញ្ចប់ជីវិត កុំឲ្យកូនចៅពិបាកចិត្តដោយសារគាត់។
ក្រោយពេលកើតហេតុកម្លាំងប៉ុស្តិ៍បានចុះទៅដល់កន្លែងកើតហេតុ ឃើញជនរងគ្រោះត្រូវបានក្រុមគ្រួសារកាត់ខ្សែអង្រឹងយកមកក្រោមផ្ទះដើម្បីតម្កល់សពទុកធ្វើបុណ្យទៅតាមប្រពៃណីជនជាតិដើមភាគតិចទំពួនផងដែរ៕
Source: Kampuchea Thmey Daily
0 Comments