ភ្នំពេញ ៖ ប្រភពពីមន្ត្រីនគរបាលខណ្ឌច្បារអំពៅបានប្រាប់កម្ពុជាថ្មីថា រហូតមកដល់រសៀលថ្ងៃទី១ខែធ្នូនេះ លោកផ្កាយ២នគរបាលព្រំដែនគោកក្រសួងមហាផ្ទៃ ដែលបាញ់បោះសេរីទាំងកណ្តាលយប់មកនោះ គឺមិនទាន់បញ្ជូនទៅណាទេដោយឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌច្បារអំពៅ។
មន្ត្រីនគរបាលដដែលបាននិយាយថា មូលហេតុដែលថ្នាក់លើមិនទាន់អនុញ្ញាតឲ្យបញ្ជូនលោកផ្កាយ២ឈ្មោះប្រាក់ តូចវាសនា មុខងារជាអនុប្រធាននាយកដ្ឋានព្រំដែនគោកដែលបង្កការបាញ់បោះទាំងកណ្តាលអធ្រាត្រនាយប់ថ្ងៃទី២៩ ខែវិច្ឆិកា ស្ថិតនៅមុខផ្ទះរបស់លោកលេខ២Cផ្លូវលេខ៦៦៦ ភូមិតាងៅក្រោម សង្កាត់និរោធ ខណ្ឌច្បារអំពៅ ដោយបាញ់អស់៨គ្រាប់នោះនៅមិនទាន់បញ្ជូនទៅតុលាការ ឬ អង្គភាពសាមីឡើយមកដល់រសៀលថ្ងៃទី១ខែធ្នូនេះ។
មន្ត្រីនគរបាលដដែលបានបន្តថា យោងតាមការសួរចម្លើយ គឺលោកផ្កាយ២ខាងលើបាញ់បោះឡើងលើអស់៨គ្រាប់ដោយមិនរងរបួសដល់មនុស្សម្នានោះ គឺដោយសារលោកខឹងប្រពន្ធវាខុសពីចម្លើយសារភាពដំបូងថា មកពីមានបុរសម្នាក់មកឈរក្បែររថយន្តរបស់លោកដែលចតមុខផ្ទះទំនងជាប៉ុនប៉ងធ្វើសកម្មភាពខ្វីមួយទើបលោកបាញ់បង្អើលតែម្តងទៅ។ ទោះជាយ៉ាងណាក៏ប្រជាពលរដ្ឋដែលរស់នៅក្នុងភូមិមានការភ្ញាក់ផ្អើលដោយសារតែការបាញ់បោះរហូតដល់៨គ្រាប់ហើយមិនទាន់មានទោសដូចឧត្តមសេនីយ៍មុនៗ៕
Source: Kampuchea Thmey Daily
0 Comments