ទីក្រុងប៉ារីសនឹងដកហូតពានរង្វាន់សេរីភាពកិត្តិយសពីលោកស្រី អ៊ួងសានស៊ូជី ជុំវិញបរាជ័យរបស់លោកស្រីក្នុងការនិយាយប្រឆាំងនឹងការបង្ក្រាបមួយលើជនជាតិភាគតិចរ៉ូហ៊ីងយ៉ារបស់ប្រទេសមីយ៉ាន់ម៉ា។ នេះបើតាមការឲ្យដឹងកាលពីថ្ងៃសុក្រពីអ្នកនាំពាក្យរបស់ចៅហ្វាយក្រុង។
អ្នកនាំពាក្យរូបនេះបានប្រាប់ AFP ថា ចៅហ្វាយក្រុង Anne Hidalgo បានសម្រេចលុបចោលរង្វាន់កិត្តិយសនេះដោយសារតែការរំលោភសិទ្ធិមនុស្សជាច្រើនលើកដែលត្រូវបានកត់ត្រានៅក្នុងប្រទេសមីយ៉ាន់ម៉ាព្រមទាំងអំពើហិង្សានិងការធ្វើទុក្ខបុកម្នេញដោយកម្លាំងសន្តិសុខមីយ៉ាន់ម៉ាប្រឆាំងនឹងជនជាតិភាគតិចរ៉ូហ៊ីងយ៉ា។
ការដកហូតនេះដែលកើតឡើងបន្ទាប់ពីការសម្រេចចិត្តស្រដៀងគ្នាដោយទីក្រុង Glasgow, Edinburgh និង Oxford នឹងធ្វើឲ្យមេដឹកនាំមីយ៉ាន់ម៉ារូបនេះក្លាយជាមនុស្សដំបូងគេដែលត្រូវបាត់បង់ពានរង្វាន់សិទ្ធិសេរីភាពទីក្រុងបារាំងដែលជាពានរង្វាន់និមិត្តរូបសេរីភាពមួយ។
អ្នកនាំពាក្យរូបនេះបានឲ្យដឹងថា ការដកហូតនេះនឹងត្រូវធ្វើឡើងដោយក្រុមប្រឹក្សាក្រុងក្នុងកិច្ចប្រជុំមួយនៅពាក់កណ្តាលខែធ្នូ។
ម្ចាស់ជ័យលាភីពានរង្វាន់ណូបែលសន្តិភាពលោកស្រី ស៊ូជី ដែលធ្លាប់ជានិមិត្តរូបនៃលទ្ធិប្រជាធិបតេយ្យសម្រាប់ការដឹកនាំប្រឆាំងនឹងរបបយោធារបស់ប្រទេសមីយ៉ាន់ម៉ាបានបាត់បង់ការពេញចិត្តពីបណ្តាប្រទេសលោកខាងលិចដោយសារតែភាពអសមត្ថភាពរបស់ខ្លួនក្នុងការប្រឈមមុខនឹងការបង្ក្រាបលើជនជាតិមូស្លីមរ៉ូហ៊ីងយ៉ា។
ជនជាតិរ៉ូហ៊ីងយ៉ាជាង៧០០,០០០នាក់បានរត់គេចពីអំពើហឹង្សានៅក្នុងប្រទេសពុទ្ធសាសនាភាគច្រើនមួយនេះកាលពីឆ្នាំមុនហើយធ្វើដំណើរទៅកាន់ប្រទេសបង់ក្លាដែស។
ក្រុមសិទ្ធិមនុស្សរបស់អង្គការសហប្រជាជាតិបានរកឃើញភស្តុតាងនៃការសម្លាប់រង្គាល ការរំលោភ ការធ្វើទារុណកម្មនិងការដុតបំផ្លាញហើយបានអំពាវនាវឲ្យឧត្តមសេនីយ៍កំពូលៗត្រូវនាំទៅកាត់ទោសពីបទអំពើប្រល័យពូជសាសន៍ ឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងមនុស្សជាតិ៕ AFP
Source: Kampuchea Thmey Daily
0 Comments