ភ្នំពេញ ៖ សម្តេចពញាចក្រី ហេង សំរិន ប្រធានរដ្ឋសភា បានណែនាំឲ្យយុវជនរួមគ្នាថែរក្សាសមិទ្ធផលសន្តិភាព ដែលជាមរតករណសិរ្ស២ធ្នូ ដើម្បីបន្តការអភិវឌ្ឍប្រទេសជាតិឲ្យកាន់រីកចម្រើនខ្លាំងឡើងបន្ថែមទៀត។ មានតែសុខសន្តិភាពទេ ដែលជាមូលដ្ឋានគ្រឹះ នៃលទ្ធិប្រជាធិបតេយ្យ សិទ្ធិសេរីភាពក្នុងការរស់នៅ ភាពរីកចម្រើន និងការអភិវឌ្ឍ។
ថ្លែងក្នុងជំនួបជាមួយជាក្រុមយុវជនដើរ «៤០គីឡូម៉ែត្រ ទៅកាន់ប្រវត្តិសាស្ត្រ» នៅឯបរិវេណវិមានអនុស្សាវរីយ៍២ធ្នូ ស្ថិតក្នុងទឹកដីភូមិជើងឃ្លូ ឃុំ២ធ្នូ ស្រុកស្នួល ខេត្តក្រចេះ កាលពីរាត្រីថ្ងៃទី៣០ ខែធ្នូ សម្តេចពញាចក្រី បានបញ្ជាក់ថា យុវជនសម័យសម្តេច បានហែលឆ្លងការលំបាកជាច្រើន រួមទាំងឆ្លងកាត់ការទម្លាក់គ្រាប់បែកពីអាកាស គ្រាប់រថគ្រោះ និងគ្រាប់បែកគ្រប់ធន់ ដោយជីវិតយុវជនសម័យនោះត្រូវផ្សងគ្រោះថ្នាក់ ដល់អាយុជីវិតគ្រប់វិនាទី។ សម្តេច ហេង សំរិន បន្តថា បើមិនមានឆន្ទៈខ្ពស់ ដើម្បីប្រជាជននិងប្រទេសជាតិទេ ការតស៊ូប្រមូលកម្លាំងមហាជន ដើម្បីផ្តួលរំលំរបបប៉ុលពត នៅថ្ងៃ ២ធ្នូ ឆ្នាំ១៩៧៨ គឺមិនអាចចូលរួមចលនាតស៊ូ និងទទួលបានជោគជ័យនាថ្ងៃ ៧ មករា ១៩៧៩នោះឡើយ។
សម្តេចពញាចក្រី បានបញ្ជាក់ថា ការតស៊ូរំដោះប្រទេសជាតិ ជាការលំបាក ហើយការកសាងអភិវឌ្ឍន៍ប្រទេសជាតិ ពីបាតដៃទទេក៏កាន់តែលំបាក ដែលនេះទាមឲ្យយុវជនជំនាន់ក្រោយ ត្រូវរួមគ្នាថែរក្សាសមិទ្ធផលដែលកម្ពុជា ទទួលបានដោយលំបាកនេះឲ្យបានគង់វង្ស រហូតទៅ។ សម្តេចពញាចក្រី ហេង សំរិន បានបញ្ជាក់ថា រណសិរ្សសាមគ្គីសង្គ្រោះជាតិកម្ពុជា បានបង្កើតឡើង នៅលើទឹកដីជាប្រវត្តិសាស្ត្រ ស្ថិតនៅភូមិជើងឃ្លូ ឃុំ២ធ្នូ ស្រុកស្នួល ខេត្តក្រចេះ ហើយ គឺជាមូលដ្ឋានដំបូងនៃការប្រកាសជាឱឡារិកចំពោះមតិជាតិ-អន្តរជាតិ ពីការប្រមូលផ្តុំកម្លាំងមហាជន និងការចូលរួមពីគ្រប់កម្លាំងចលនាតស៊ូ ដើម្បីបង្កើតរណសិរ្សសាមគ្គីសង្គ្រោះជាតិកម្ពុជា នៅថ្ងៃទី២ធ្នូ ឆ្នាំ១៩៧៨។
គណបក្សប្រជាជនកម្ពុជា ដែលកើតចេញពីចលនាតស៊ូរណសិរ្សសាមគ្គីសង្គ្រោះជាតិកម្ពុជា២ធ្នូ បានចាត់ទុកថ្ងៃទី២ ខែធ្នូ ថាជាព្រឹត្តិការណ៍ជាតិមួយដ៏មានសារសំខាន់បំផុតចំពោះបុព្វហេតុនៃការរស់រានមានជីវិតឡើងវិញរបស់មាតុភូមិ និងប្រជាជនកម្ពុជា។ រណសិរ្យ២ធ្នូ មិនត្រឹមតែសង្គ្រោះជីវិតប្រជាជនកម្ពុជាទាំងអស់ឲ្យចាកផុតពីគ្រោះមហន្តរាយនៃរបបប្រល័យពូជសាសន៍ប៉ុណ្ណោះទេ ប៉ុន្តែរណសិរ្យ២ធ្នូ នៅបានជួយស្តារ កសាង និងអភិវឌ្ឍសង្គមជាតិនៅគ្រប់ទិសទី ធ្វើឲ្យមាតុភូមិកម្ពុជាមានការប្រែប្រួល មានការប្រែមុខមាត់ថ្មីជាបន្តបន្ទាប់ គួរឲ្យមានមោទនភាព។
លោក ហ៊ុន ម៉ានី សមាជិករដ្ឋសភា និងជាប្រធានសហភាពសហព័ន្ធយុវជនកម្ពុជា បានគាំទ្រចំពោះអនុសាសន៍របស់សម្តេចពញាចក្រី ដែលជំរុញដល់យុវជនបន្តថែរក្សាសន្តិភាពឲ្យនៅគង់វង់ បន្ទាប់ពីបានដឹកនាំយុវជនជិត១ពាន់នាក់ ចូលរួមព្រឹត្តិការណ៍ដើរ«៤០គីឡូម៉ែត្រ ទៅកាន់ប្រវត្តិសាស្ត្រ» នៅតំបន់កកើតចលនាតស៊ូរំដោះជាតិមាតុភូមិនៅក្នុងទឹកដីស្រុកស្នួល ដើម្បីសិក្សាស្វែងយល់ពីការតស៊ូដ៏លំបាក ពីអតីតកាលរបស់វីរជនស្នេហាជាតិជំនាន់មុន ដែលបានតស៊ូរំដោះ និងកសាងប្រទេសជាតិ រហូតទទួលបានសុខសន្តិភាព និងការអភិវឌ្ឍដូចសព្វថ្ងៃនេះ។ លោកប្រធានសហភាពសហព័ន្ធយុវជនកម្ពុជាបានលើកឡើងថា ព្រឹត្តិការណ៍ដើរ«៤០គីឡូម៉ែត្រ ទៅកាន់ប្រវត្តិសាស្ត្រ» របស់ក្រុមយុវជនពីថ្ងៃទី២៩ ខែវិច្ឆិកា ដល់ថ្ងៃទី១ ខែធ្នូ ឆ្នាំ២០១៨ ដោយត្រូវធ្វើដំណើរកាត់ព្រៃ ឆ្លងទឹក និងសម្រាកក្នុងព្រៃមួយយប់ មុននឹងមកជួបជុំគ្នា នៅវិមានអនុស្សាវរីយ៍២ធ្នូ ដែលជាកន្លែងសម្តេចអគ្គមហាពញាចក្រី ហេង សំរិន ទទួលជួបសំណេះសំណាល និងរៀបរាប់ពីដំណើរតស៊ូរបស់សម្តេច និងឥស្សរជន ស្នេហាជាតិផ្សេងៗទៀត ក្នុងបុព្វហេតុប្រជាជននិងប្រទេសជាតិ កាលពី៤០ឆ្នាំមុន៕
Source: Kampuchea Thmey Daily
0 Comments