ភ្នំពេញ ៖ ស្ត្រីម្នាក់ ត្រូវបានកម្លាំងនគរបាលប្រចាំទីរួមផ្សារធំថ្មី នៃអធិការដ្ឋាននគរបាលខណ្ឌដូនពេញ នៅថ្ងៃទី១០ ខែធ្នូ ឆ្នាំ២០១៨ វេលាម៉ោង១៥រសៀល ឃាត់ខ្លួនពីបទលួចកាបូបលុយដែលបានប្រព្រឹត្តិកាលពីថ្ងៃទី១៦ ខែវិច្ឆិកាឆ្នាំ២០១៨ វេលាម៉ោង១៣នាទី នៅចំណុចក្នុងតូបលក់ខោអាវ លេខI196 ក្នុងទីរួមផ្សារធំថ្មីផ្លូវលេខ១៣៦ ភូមិ៤ សង្កាត់ផ្សារថ្មីទី១ ខណ្ឌដូនពេញ រាជធានីភ្នំពេញ។
សមត្ថកិច្ចបានឲ្យដឹងថា ជនសង្ស័យត្រូវឃាត់ខ្លួនឈ្មោះ ប៉ែន ស្រីមុំ ភេទស្រី អាយុ៤៥ឆ្នាំ ជនជាតិខ្មែរ មុខរបរលក់បាយ ស្នាក់នៅភូមិបាលាយ ឃុំអង្កាញ់ ស្រុកអង្គរបូរី ខេត្តតាកែវ។ ចំណែកជនរងគ្រោះឈ្មោះ ហេង សុផាន់ណា ភេទស្រី អាយុ២២ឆ្នាំ ជនជាតិខ្មែរ មុខរបរលក់ខោអាវ ក្នុងផ្សារធំថ្មី មានទីលំនៅផ្ទះលេខ១៥៨ ផ្លូវលេខ១៦១ សង្កាត់អូរឬស្សីទី២ ខណ្ឌ៧មករា រាជធានីភ្នំពេញ។ សម្ភារៈបាត់បង់ កាបូបលុយ ពណ៌ខ្មៅ ចំនួន១ មានលុយចំនួន២០០៩ដុល្លារ។
សមត្ថកិច្ចបន្តថា កាលពីថ្ងៃទី១៦ ខែតុលា ឆ្នាំ២០១៨ វេលាម៉ោង១៣រសៀល មុនពេលកើតហេតុ ជនរងគ្រោះឈ្មោះ ហេង សុផាន់ណា ភេទស្រី អាយុ២២ឆ្នាំ កំពុងលក់ខោអាវនៅចំណុចតូបលេខI196 ក្នុងទីរួមផ្សារធំថ្មី ពេលកំពុងលក់ខោអាវ ក៏មានជនសង្ស័យម្នាក់ឈ្មោះ ប៉ែន ស្រីមុំ ភេទស្រី បានចូលមកទិញអាវពីជនរងគ្រោះ។ ពេលជនរងគ្រោះខ្ចប់ខោអាវរួចហើយ ជនសង្ស័យក៏ចូលទៅក្នុងតូបរបស់ជនរងគ្រោះ លើកខោអាវមើលធ្វើដូចរកទិញខោអាវថែមទៀត ឆ្លៀតឱកាសល្អ ជនសង្ស័យក៏ធ្វើសកម្មភាពលួចយកកាបូបលុយរបស់ជនរងគ្រោះដែលទុកលើគំនរខោអាវបានសម្រេច ហើយក៏ដើរចេញទៅខាងក្រៅផ្សារជិះម៉ូតូឌុបគេចខ្លួនបាត់។
ប្រភពព័ត៌មានបានបន្តថា បន្ទាប់មកជនរងគ្រោះបានមកដាក់ពាក្យបណ្តឹងនៅទីស្នាក់ការប្រចាំទីរួមផ្សារធំថ្មីតែម្តង ហើយក្រោយពីទទួលបានពាក្យបណ្តឹងកម្លាំងយើង បានសហការជាមួយជនរងគ្រោះពិនិត្យមើលកាមេរ៉ាសុវត្ថិភាព ឃើញរូបភាពសកម្មភាពរបស់ជនសង្ស័យឈ្មោះ ប៉ែន ស្រីមុំ ធ្វើសកម្មភាពលួចកាបូបលុយពិតប្រាកដមែន លុះរហូតដល់ថ្ងៃទី១០ខែធ្នូ ឆ្នាំ២០១៨ វេលាម៉ោង១៥រសៀលជនសង្ស័យក៏ជិះម៉ូតូជាមួយប្តីចូលមកក្នុងទីរួមផ្សារធំថ្មី ដើរទៅដល់ក្បែរតូបរបស់ជនរងគ្រោះ ក៏ត្រូវជនរងគ្រោះឃើញបានសហការជាមួយកម្លាំងនគរបាលទីរួមផ្សារធំថ្មី ឃាត់ខ្លួនជនសង្ស័យនាំមកទីស្នាក់ការទីរួមផ្សារធំថ្មី ដើម្បីធ្វើការសាកសួរតែម្តង។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌដូនពេញដើម្បីកសាងសំណុំរឿងចាត់ការតាមនីតិវិធីច្បាប់៕
Source: Kampuchea Thmey Daily
0 Comments