យោធាកូរ៉េខាងត្បូងបាននិយាយថា ទាហានកូរ៉េខាងជើងម្នាក់ បានរត់ផ្តាច់ខ្លួនទៅកាន់ប្រទេសកូរ៉េខាងត្បូងដោយឆ្លងកាត់ព្រំដែនដីគោកភាគខាងកើតនៅថ្ងៃសៅរ៍។
ការរត់ចោលជួរឆ្លងកាត់ព្រំដែនអន្តរកូរ៉េដែលមានការយាមកាមយ៉ាងដិតដល់គឺជារឿងដ៏កម្រហើយការរត់លើកនេះបានកើតឡើងខណៈប្រទេសជិតខាងទាំងពីរកំពុងបន្តដំណើរការផ្សះផ្សារគ្នាឡើងវិញ។
នាយសេនាធិការចម្រុះ (JCS) បាននិយាយនៅក្នុងសេចក្តីថ្លែងការណ៍មួយថា “ទាហានកូរ៉េខាងជើងម្នាក់ត្រូវបានប្រទះឃើញឆ្លងកាត់ខ្សែបន្ទាត់ព្រំដែនយោធាដោយកងទ័ពកូរ៉េខាងត្បូងដោយប្រើឧបករណ៍ឃ្លាំមើល”។
JCS បាននិយាយថា “ទាហាននេះមានសុវត្ថិភាពនៅក្នុងមន្ទីរឃុំឃាំងរបស់យើង។ ភ្នាក់ងារដែលពាក់ព័ន្ធគ្រោងនឹងស៊ើបអង្កេតគាត់ទាក់ទងនឹងព័ត៌មានលម្អិតអំពីរបៀបដែលគាត់បានមកដល់ប្រទេសកូរ៉េខាងត្បូង”។
ទោះបីជាកិច្ចចរចាស្តីពីការលុបបំបាត់អាវុធនុយក្លេអ៊ែររវាងក្រុងវ៉ាស៊ីនតោននិងក្រុងព្យុងយ៉ាងបានជាប់គាំងក៏ដោយ កូរ៉េទាំងពីរកំពុងជំរុញដំណើរការផ្សះផ្សារដោយចាត់វិធានការដើម្បីបន្ធូរបន្ថយភាពតានតឹងនៅតាមបណ្តោយព្រំដែនដ៏រឹងមាំរបស់ពួកគេ។
ពួកគេបានចាប់ផ្តើមតភ្ជាប់ប្រព័ន្ធផ្លូវដែករបស់ពួកគេឡើងវិញហើយបានដោះមីននិងបំផ្លាញប៉ុស្តិ៍យោធានៅផ្នែកខ្លះនៃព្រំដែន។
ជនស៊ីវិលកូរ៉េខាងជើងជាង៣ម៉ឺននាក់បានភៀសខ្លួនចេញពីស្រុកកំណើតរបស់ពួកគេប៉ុន្តែភាគច្រើនបានរត់ភៀសខ្លួនឆ្លងកាត់ព្រំប្រទល់ដែលងាយស្រួលចូលជាមួយប្រទេសចិនហើយកម្រមានការឆ្លងកាត់ព្រំដែនអន្តរកូរ៉េដែលត្រូវបានការពារដោយចម្ការមីននិងលួសបន្លាណាស់។
គួរបញ្ជាក់ថា ការរត់ផ្តាច់ខ្លួនចុងក្រោយបំផុតដែលពាក់ព័ន្ធនឹងជនជាតិកូរ៉េខាងជើងបានកើតឡើងនៅក្នុងខែឧសភានៅពេលដែលជនស៊ីវិលពីរនាក់ជិះទូកដ៏តូចមួយភៀសខ្លួនទៅកូរ៉េខាងត្បូងដោយឆ្លងកាត់សមុទ្រលឿង៕ AFP
Source: Kampuchea Thmey Daily
0 Comments