ភ្នំពញ ៖ មជ្ឈមណ្ឌលជាតិកម្ចាត់មីនកម្ពុជា (ស៊ីម៉ាក់)សហការជាមួយសម្ព័ន្ធអន្តរជាតិការពារសត្វនិងអង្គភាពសង្គ្រោះសត្វកម្ពុជារួមគ្នាប្រយុទ្ធប្រឆាំងនឹងការជួញដូរនិងបរិភោគសាច់សុនខ ឬ ឆ្កែ នៅប្រទេសកម្ពុជាដើម្បីលើកកម្ពស់ប្រពៃណីថ្លៃថ្នូរនិងសីលធម៌នៅក្នុងសង្គមខ្មែរ។
ការសហការនេះបានធ្វើឡើងតាមរយៈការចុះអនុស្សរណៈលើកិច្ចព្រមព្រៀងមួយរវាងលោក ហេង រតនា អគ្គនាយកមជ្ឈមណ្ឌលជាតិកម្ចាត់មីនកម្ពុជា (ស៊ីម៉ាក់)ជាមួយ លោកស្រីវេជ្ជបណ្ឌិត Kathrine Polak ប្រធានក្រុមសម្ព័ន្ធអន្តរជាតិការពារសត្វ (VIER PFOTEN International) និងលោកស្រីវេជ្ជបណ្ឌិត Martina Mayr នាយក និងស្ថាបនិកអង្គភាពសង្គ្រោះសត្វកម្ពុជា ដើម្បីសហការគ្នាសម្របសម្រួលការងារសត្វសុនខ ក៏ដូចជាជំរុញការផ្សព្វផ្សាយប្រឆាំងនឹងការជួញដូរ និងបរិភោគសាច់សុនខនៅកម្ពុជា។
បើតាមលោក ហេង រតនា បានឲ្យដឹងថា កិច្ចព្រមព្រៀងនេះអង្គការទាំង២ នឹងជួយគាំទ្រស៊ីម៉ាក់ឲ្យរៀបចំសិក្ខាសាលា ថតស្ពតអប់រំ ការងារផ្សព្វផ្សាយតាមវិទ្យុ ទូរទស្សន៍ សារព័ត៌មាននិងការងារផ្តល់ការជួយថែទាំសុខភាពសត្វសុនខជាដើម។
លោកបានបន្តថា អង្គភាពស៊ីម៉ាក់ចូលរួមលើកកំពស់វប្បធម៌ ប្រពៃណី និងសីលធម៌ស្រលាញ់សុនខ ទាំងរូបភាពជាសុនខគ្រួសារ សុនខបំរើការងារដោះមីន ការងារសន្តិសុខជាដើម។
គួរបញ្ជាក់ថា កាលពីពេលថ្មីៗកន្លងទៅនេះ លោក ហេង រតនា អគ្គនាយកស៊ីម៉ាក់ បានបញ្ចេញទស្សនៈរបស់ខ្លួនក្នុងគោលបំណងដើម្បីប្រឆាំងការជួញដូរ និងហូបសាច់សុនខនៅកម្ពុជា។
លោក ហេង រតនា បានលើកឡើងថា ស្ថានភាពការជួញដូរ និងហូបសាច់សុនខកម្ពុជា អាចបង្កឲ្យមានបញ្ហា៤សំខាន់ៗ រួមមាន ទី១បាត់បង់វប្បធម៌ទំនៀមទម្លាប់ និងប្រពៃណីដ៏ល្អរបស់ប្រជាជនខ្មែរ ដែលផ្តាំតកូនចៅដោយហាមមិនឲ្យបរិភោគសាច់សុនខឡើយ រហូតដល់យល់ថា ជាទង្វើនាំឲ្យចង្រៃដល់ខ្លួនឯង និងគ្រួសារ។ បើគ្មានវិធានការទេ ប្រពៃណី និងវប្បធម៌ដ៏ប្រពៃថ្លៃថ្នូរនេះ នឹងរលាយសាបសូន្យមិនខានឡើយ។ ទី២៖ ការបង្កអំពើចោរកម្ម និងបង្កបទល្មើសផ្សេងៗក្នុងសង្គម រួមទាំងទង្វើកាចសាហាវបង្កហិង្សាក្នុងគ្រួសារ។ ទី៣៖ មានផលប៉ះពាល់ដល់សុខភាពសាធារណៈ មានប្រភេទជំងឺឆ្លងផងដែរ (នេះបើយោងតាមការវាយតម្លៃ មន្ត្រីជំនាញសុខភាពមកពីប្រទេសអូស្ត្រាលី ហើយអង្គភាពស៊ីម៉ាក់ នឹងសហការរយៈ២ឆ្នាំ២០១៩-២០២០ ជាមួយសាស្ត្រាចារ្យមកពីសាកលវិទ្យាល័យមែលប៊ន ដើម្បីតាមដានជំងឺសុនខ នៃអង្គភាពស៊ីម៉ាក់) ទី៤៖ ភាពអសីលធម៌ចំពោះគុណបំណាច់សុនខបម្រើមនុស្សជាតិ ជាពិសេសសុនខហិតមីន សុនខសន្តិសុខ (សម្រាប់សន្តិសុខគ្រួសារ និងសាធារណៈ) សុនខប្រឆាំងភេវរកម្ម សុនខប្រឆាំងគ្រឿងញៀន សុនខការពារព្រំដែនជាដើម។
ជាមួយគ្នានេះដែរ អគ្គនាយកស៊ីម៉ាក់ ក៏បានអំពាវនាវថា «ពេលនេះជាពេលវេលាយ៉ាងសមស្របសម្រាប់ប្រជាជនកម្ពុជា និងអ្នកអនុវត្តច្បាប់អាចចូលរួមលុបបំបាត់ភាពអសកម្មក្នុងសង្គមខ្មែរ និងរួមគ្នាលើកកម្ពស់ប្រពៃណី និងសីលធម៌សង្គមខ្មែរ»៕
Source: Kampuchea Thmey Daily
0 Comments