បញ្ហាទាក់ទងនឹងពាណិជ្ជកម្ម ការប្រែប្រួលអាកាសធាតុ និងប្រទេសអ៊ុយក្រែន បានធ្វើឲ្យមេដឹកនាំពិភពលោកមានការបែកបាក់គ្នាកាលពីថ្ងៃសុក្រខណៈប្រធានាធិបតីអាមេរិកលោក Donald Trump ស្ថិតនៅក្រោមសម្ពាធហើយមេដឹកនាំអារ៉ាប៊ីសាអ៊ូឌីតបានចូលមកក្នុងកិច្ចប្រជុំ G20។
មេដឹកនាំនៃប្រទេសដែលតំណាងឲ្យ៤ភាគ៥នៃសេដ្ឋកិច្ចពិភពលោកបានបើកកិច្ចប្រជុំរយៈពេលពីរថ្ងៃនៅប្រទេសអាហ្សង់ទីនហើយបានប្រឈមនឹងការបែកបាក់ខ្លាំងបំផុតចាប់តាំងពីកិច្ចប្រជុំកំពូល G20 លើកដំបូងដែលរៀបចំកាលពី១០ឆ្នាំមុនអំឡុងពេលមានវិបត្តិហិរញ្ញវត្ថុ។
លោក Trump ត្រូវបានគេវាយប្រហារដោយសារតែការបំផ្លាញសាមគ្គីភាពអតីតកាលរបស់ក្រុមនេះលើបញ្ហាពាណិជ្ជកម្មនិងការប្រែប្រួលអាកាសធាតុ។ ប៉ុន្តែគាត់បានទទួលជោគជ័យមួយជាមួយនឹងការចុះហត្ថលេខាលើកិច្ចព្រមព្រៀងពាណិជ្ជកម្មថ្មីមួយសម្រាប់តំបន់អាមេរិកខាងជើងនិងបានបញ្ឆេះសង្គ្រាមពាណិជ្ជកម្មជាមួយប្រទេសចិនហើយបានអួតអាងអំពី “សញ្ញាល្អៗ” មុនពេលទទួលទានអាហារពេលល្ងាចនៅថ្ងៃសៅរ៍ជាមួយលោក Xi Jinping។
នៅក្នុងសុន្ទរកថាទៅកាន់កិច្ចប្រជុំកំពូលនេះ លោក Xi បានអះអាងជាថ្មីនូវការសន្យារបស់គាត់ចំពោះកំណែទម្រង់សេដ្ឋកិច្ចជាមួយនឹងការខិតខំប្រឹងប្រែងកាន់តែខ្លាំងឡើងក្នុងការការពារកម្មសិទ្ធិបញ្ញានិងការនាំចូលកាន់តែច្រើន។
កិច្ចប្រជុំកំពូលនេះបានចាប់ផ្តើមនៅក្នុងទីក្រុង Buenos Aires ជាមួយនឹងការថតរូបគ្រួសារតាមទម្លាប់ដោយមេដឹកនាំនៃក្រុមមួយដែលទំនាក់ទំនងរបស់ពួកគេមានភាពកក់ក្តៅនិងល្អក់កករ។
ប្រធានាធិបតីរុស្ស៊ីលោក Vladimir Putin បានស្ថិតនៅក្រោមសម្ពាធបន្ទាប់ពីកងកម្លាំងសន្តិសុខរបស់គាត់បានរឹបអូសនាវាអ៊ុយក្រែនចំនួន៣គ្រឿង។
កិច្ចប្រជុំកំពូលនេះគឺកត់សម្គាល់ជាមួយនឹងការវិលត្រឡប់ទៅកាន់ឆាកអន្តរជាតិវិញសម្រាប់រាជទាយាទ Mohammed bin Salman របស់ប្រទេសអារ៉ាប៊ីសាអ៊ូឌីតបន្ទាប់ពីការសម្លាប់អ្នកកាសែត Jamal Khashoggi នៅក្នុងស្ថានកុងស៊ុលរបស់ប្រទេសនេះប្រចាំទីក្រុងអ៊ីស្តង់ប៊ុល។
ប្រធានាធិបតីបារាំងលោក Macron និងនាយករដ្ឋមន្ត្រីអង់គ្លេសលោកស្រី Theresa May បានលើកឡើងអំពីករណីឃាតកម្មលោក Khashoggi អំឡុងជំនួបជាមួយព្រះអង្គម្ចាស់ព្រះជន្ម៣៣វស្សាអង្គនេះ៕ AFP
Source: Kampuchea Thmey Daily
0 Comments