នៅប្រទេសឡាវបានចុះហត្ថលេខាកិច្ចសហប្រតិបត្តិការចំនួន៤
នៅប្រទេសវៀតណាមបានចុះហត្ថលេខាកិច្ចសហប្រតិបត្តិការចំនួន ៥
ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាបានអញ្ជើញនិវត្តន៍មកដល់មាតុប្រទេសវិញនៅវេលាម៉ោងប្រមាណ១២ថ្ងៃត្រង់ថ្ងៃទី០៨ ខែធ្នូនេះបន្ទាប់ពីបានដឹកនាំគណៈប្រតិភូជាន់ខ្ពស់នៃរាជរដ្ឋាភិបាលកម្ពុជាបំពេញទស្សនកិច្ចផ្លូវការរយៈពេល៤ថ្ងៃ(ពីថ្ងៃទី៥ដល់៨ខែធ្នូ)នៅប្រទេស ឡា វនិងប្រទេសវៀតណាម។
ទស្សនកិច្ចនេះ ត្រូវបានវាយតម្លៃថា មានលក្ខណៈប្រកបដោយផ្លែផ្កាជាវិជ្ជមាន។ សម្តេចតេជោ ហ៊ុន សែន បានផ្តើមដំណើរទស្សនកិច្ចជាផ្លូវការទៅកាន់ប្រទេសឡាវកាលពីថ្ងៃទី០៥ខែធ្នូកន្លងទៅនេះតបតាមការអញ្ជើញរបស់នាយករដ្ឋមន្ត្រីឡាវលោក ថងលូន ស៊ីសូលីត នាយករដ្ឋមន្ត្រីឡាវ។
ខណៈពេលដែលសម្តេចត្រូវបានជ្រើសតាំងជានាយករដ្ឋមន្ត្រីនៃព្រះរាជាណាចក្រកម្ពុជាជាថ្មី ទៀតសម្រាប់រដ្ឋសភានីតិកាលទី៦ កាលពីខែកញ្ញា ដែលនេះគឺជាដំណើរទស្សនកិច្ចសំដែងការគួរសមផង និង ជាការពង្រឹងនូវចំណងមិត្តភាពនិងកិច្ចសហប្រតិបត្តិការរវាងប្រទេសមានភូមិផងរបងជាមួយ។
សូមជម្រាបជូនដែរថា ជាទម្លាប់របស់ប្រទេសនៅក្នុងសហគមន៍អាស៊ាន នាយករដ្ឋមន្ត្រីឡើងថ្មីត្រូវតែទៅសំដែងការគួរសមជាមួយសមាជិកអាស៊ានទាំង១០។
ក្នុងដំណើរទស្សនកិច្ចជាផ្លូវការនៅប្រទេសឡាវសម្តេចតេជោហ៊ុន សែន ក្រៅពីការជួបពិភាក្សាការងារទ្វេភាគីជាមួយនាយករដ្ឋមន្ត្រីឡាវនោះសម្តេចតេជោក៏បានចូលជួបសម្តែងការគួរសមជាមួយ ប្រធានរដ្ឋឡាវនិងប្រធានរដ្ឋសភាឡាវផងដែរ។
នៅក្នុងជំនួបទ្វេភាគីនោះប្រមុខដឹកនាំកម្ពុជានិងឡាវបានអំពាវនាវរួមគ្នានិងស្នើសុំឲ្យប្រធានាធិបតីបារាំងក៏ដូចជារដ្ឋាភិបាលបារាំងផ្ដល់មកឲ្យប្រទេសទាំងពីរនូវឯកសារពាក់ព័ន្ធនានាដែលមានប្រយោជន៍ ដើម្បីឈានទៅដោះស្រាយបញ្ហាព្រំដែនកម្ពុជា-ឡាវឲ្យបានឆាប់ចប់ ។ បញ្ហាព្រំដែនកម្ពុជា-ឡាវដែលនៅសេសសល់មានប្រមាណ១៦ភាគរយទៀត។
បញ្ហាព្រំដែនគឺជាប្រធានបទដ៏សំខាន់មួយនៅក្នុងដំណើរទស្សនកិច្ចរបស់លោកនាយករដ្ឋមន្ដ្រី ហ៊ុន សែន នៅប្រទេសឡាវរយៈពេលពីរថ្ងៃ។ នៅក្នុងជំនួបជាមួយសមភាគីឡាវគឺលោក ថងលូន ស៊ីស៊ូលីត សម្តេចតេជោ ហ៊ុន សែន បានគូសបញ្ជាក់ថា កម្ពុជានិងឡាវនឹងបន្តពិភាក្សាគ្នាលើបញ្ហាព្រំដែនដើម្បីពង្រាង ឯកសារផ្ញើទៅកាន់ភាគីបារាំង។
កម្ពុជានិងឡាវអំពាវនាវនិងស្នើសុំឲ្យប្រទេសដែលធ្លាប់ជាអាណាព្យាបាលរបស់ខ្លួននេះផ្ដល់មកឲ្យខ្លួននូវឯកសារពាក់ព័ន្ធនានាដែលមានប្រយោជន៍ដើម្បីឈានទៅដោះស្រាយបញ្ហាព្រំដែនកម្ពុជា-ឡាវ។ ការងារពង្រាងឯកសារនេះប្រមុខរដ្ឋាភិបាលកម្ពុជា-ឡាវ ព្រមព្រៀងគ្នាប្រគល់ឲ្យរដ្ឋមន្ដ្រីក្រសួងការបរទេសនៃប្រទេសទាំងពីរជាអ្នកអនុវត្ត។ ក្រៅពីការងារនេះសម្តេចតេជោ ហ៊ុន សែន ក៏បានផ្ទុកផ្ដាក់ឲ្យប្រមុខការទូតនៃប្រទេសទាំងពីរនូវការងារសំខាន់មួយទៀតដែលជាការងារអាទិភាព។ នោះគឺរៀបចំបែបបទបច្ចេកទេស យ៉ាងណាឲ្យភាគីបារាំងផ្ទេរផែនទីពីខ្នាត១/១០០ ០០០ពាន់ មកផែនទី UTM ខ្នាត១/៥០ ០០០។
ក្នុងដំណើរទស្សនកិច្ចនេះ ក៏មានការចុះហត្ថលេខាលើឯកសារសំខាន់ៗចំនួន៤ផងដែររួមមាន ទី១. កិច្ចព្រមព្រៀងស្តីពីវិស័យអប់រំសម្រាប់រយៈពេល៥ឆ្នាំពីឆ្នាំ២០១៩ ដល់ឆ្នាំ២០២៣ ,ទី២.អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យវប្បធម៌និងសិល្បៈសម្រាប់ឆ្នាំ២០១៩-២០២១, ទី៣.អនុស្សរណៈនៃការយោគយល់គ្នាស្តីពីការខ្ចីសត្វដំរីសម្រាប់ការបង្ហាញសិល្បៈនិងការផ្លាស់ប្តូរវប្បធម៌ នៅសួនសត្វសាហ្វារីរាជធានីភ្នំពេញ និង ទី៤.អនុស្សរណៈនៃការយោគយល់គ្នាស្តីពីកិច្ចព្រមព្រៀងទិញ-លក់ថាមពលអគ្គិសនីតាមតង់ស្យុងខ្ពស់ ២៣០ និង ៥០០គីឡូវ៉ុល ពីស្ថានីយបានហាត ប្រទេសឡាវ មកស្ថានីយស្ទឹងត្រែងរបស់ប្រទេសកម្ពុជា។
ក្រោយពីបញ្ចប់ដំណើរទស្សនកិច្ចនៅប្រទេសឡាវប្រកបដោយផ្លែផ្កានៅល្ងាចថ្ងៃទី០៦ខែធ្នូ សម្តេចតេជោ ហ៊ុន សែន បានដឹកនាំគណៈប្រតិភូបន្តដំណើរបំពេញទស្សនកិច្ចផ្លូវការទៅកាន់ទីក្រុងហាណូយប្រទេសវៀតណាមដើម្បីបំពេញទស្សនកិច្ចផ្លូវការរយៈពេល៣ថ្ងៃ(ពីថ្ងៃទី៦ដល់៨ធ្នូ)។
នៅល្ងាចថ្ងៃទី៦ខែធ្នូនៅទីក្រុងហាណូយក្នុងឱកាសដំណើរទស្សនកិច្ចជាផ្លូវការនៅវៀតណាមនាយករដ្ឋមន្ត្រីកម្ពុជា សម្ដេចតេជោ ហ៊ុន សែន និង នាយករដ្ឋមន្ត្រីវៀតណាមលោក Nguyen Xuan Phuc បានអញ្ជើញចូលរួមវេទិកាធុរកិច្ច វៀតណាម-កម្ពុជា។
លោកនាយករដ្ឋមន្ត្រីវៀតណាម Nguyen Xuan Phuc បានលើកឡើងនៅក្នុងវេទិកានោះថា នេះជាឱកាសដើម្បីសហគ្រាសនៃប្រទេសទាំងពីរជំរុញយ៉ាងខ្លាំងក្លានូវកិច្ចសហប្រតិបតិ្តការលើវិស័យវិនិយោគអាជីវកម្មជាពិសេសគឺក្នុងកាលៈទេសៈដែលទំនាក់ទំនងរវាងប្រទេសទាំងពីរកំពុងរីកចម្រើនយ៉ាងល្អប្រសើរគ្រប់ជ្រុងជ្រោយ ។ លោកនាយករដ្ឋមន្ត្រីវៀតណាមចាត់ទុកថាតាមការប៉ាន់ស្មានគឺទំហំពាណិជ្ជកម្មទ្វេភាគីវៀតណាម-កម្ពុជាក្នុងឆ្នាំ២០១៨អាចទទួលបាន៥ពាន់លានដុល្លាហើយដល់ឆ្នាំ២០ ២០អាចឡើងដល់ពី៧ទៅ៨ពាន់លានដុល្លា។
ចំណែកឯសម្តេចនាយករដ្ឋមន្ត្រី ហ៊ុន សែន បានវាយតម្លៃខ្ពស់ចំពោះសកម្មភាពសហប្រតិបត្តិការលើវិស័យពាណិជ្ជកម្មនិងវិនិយោគរវាងប្រទេសទាំងពីរនាពេលកន្លងទៅព្រមទាំងរំលេចចេញសក្ដានុពលជាច្រើននៃខឿនសេដ្ឋកិច្ចកម្ពុជាចំពោះវិនិយោគិនផងដែរ។ ក្នុងនោះរាជរដ្ឋាភិបាលកម្ពុជាបានដាក់ចេញយុទ្ធសាស្ត្រអភិវឌ្ឍវិស័យឧស្សាហកម្ម(២០១៥-២០២៥) ដោយជំរុញការកែលម្អបរិយាកាសវិនិយោគអាជីវកម្មជាពិសេសគឺផ្នែកពន្ធគយ ព្រមទាំងអភិវឌ្ឍន៍ ហេដ្ឋារចនាសម្ព័ន្ធទាំងរឹងទាំងទន់ក៏ដូចជាកសាងផ្លូវហាយវ៉េដែលតភ្ជាប់ជាមួយកំពង់ផែនានាផងដែរ។
ក្នុងដំណើរទស្សនកិច្ចនៅប្រទេសវៀតណាមសម្តេចតេជោ ហ៊ុន សែន ក្រៅពីជំនួបទ្វេភាគីជាមួយនាយករដ្ឋមន្ត្រីវៀតណាមក៏បានអញ្ជើញជួបសម្តែងការគួរសមជាប្រធានរដ្ឋវៀតណាមលោក ង្វៀន ហ៊្វុជុង និងចូលជួបសំដែងការគួរសមជាមួយលោកស្រីប្រធានរដ្ឋសភាវៀតណាមផងដែរ ។ ជាមួយនេះសម្តេចតេជោ នាយករដ្ឋមន្ត្រីក៏បានអនុញ្ញាតឲ្យសមាគមមិត្តភាពវៀតណាមកម្ពុជាចូលជួបសំដែងការគួរសមផងដែរ។
ឯកសារសំខាន់ៗចំនួន៥ ត្រូវបានចុះហត្ថលេខាបន្តក្រោមអធិបតីភាពសម្តេចតេជោហ៊ុន សែន និង លោក ង្វៀន សួនហ៊្វុក។
ឯកសារដែលបានចុះហត្ថលេខានោះរួមមាន ទី១. អនុស្សរណៈនៃការយោគយល់គ្នាស្តីពីយុទ្ធសហប្រតិបត្តិការលើវិស័យដឹកជញ្ជូនសម្រាប់រយៈពេល៧ឆ្នាំ ពីឆ្នាំ២០១៨-២០២៥ និងចក្ខុវិស័យឈានឆ្ពោះទៅឆ្នាំ ២០៣០។ ទី២.អនុស្សរណៈយោគយល់គ្នាស្តីពីការបញ្ចប់ការចរចាកិច្ចព្រមព្រៀងពាណិជ្ជកម្មនៅតាមព្រំដែនរវាងកម្ពុជានិងវៀតណាម។ ទី៣.កិច្ចសហប្រតិបត្តិការសម្រាប់ឆ្នាំ ២០១៩ រវាងក្រសួងអប់រំយុវជននិងកីឡានៃកម្ពុជានិងក្រសួងអប់រំវៀតណាម។ ទី៤.កំណត់ហេតុលទ្ធផលនៃកិច្ចប្រជុំរវាងគណៈកម្មការចម្រុះកិច្ចការព្រំដែនរវាងប្រទេសទាំងពីរកម្ពុជានិងវៀតណាម និង ទី៥ .អនុស្សរណៈ យោគយល់គ្នាស្ដីពី គម្រោងនៃការកសាងមជ្ឈមណ្ឌលផ្ដល់សេវាព្យាបាលដល់សហគមន៍ និងដោយស្ម័គ្រចិត្តសម្រប់ប្រជាពលរដ្ឋដែល ញៀនគ្រឿងញៀននៅខេត្តព្រះសីហនុ។
ជាលទ្ធផលដំណើរទស្សនកិច្ចរបស់សម្តេចតេជោនាយករដ្ឋមន្ត្រីទៅកាន់ប្រទេសឡាវនិងប្រទេសវៀតណាមមានលក្ខណៈប្រកបដោយផ្លែផ្កានិងជោគជ័យ គឺទី១-បន្តការជំរុញគោលនយោបាយប្រទេសជិតខាងភូមិផងរបងជាមួយដើម្បីបន្តរក្សាសន្តិភាពកិច្ចសហប្រតិបត្តិការនិងការអភិវឌ្ឍ ស្របទៅយុទ្ធសាស្ត្ររបស់សម្ដេចតេជោនាយករដ្ឋមន្ត្រីដែលបានដាក់ចេញគឺប្រែក្លាយតំបន់អតីតសមរភូមិទាំងអស់នៅក្នុងប្រទេសកម្ពុជាឲ្យក្លាយទៅជាទីផ្សារនិងតំបន់អភិវឌ្ឍន៍ យុទ្ធសាស្ត្រនេះកំពុងសម្រេចបានជោគជ័យយ៉ាងធំធេង។ ទី២.គឺការប្រែក្លាយតំបន់ព្រំដែនជាមួយប្រទេសជិតខាងទាំងអស់ឲ្យក្លាយទៅជាព្រំដែនសន្តិភាពមិត្តភាពសហប្រតិបត្តិការនិងការអភិវឌ្ឍ។
ទី៣-ជំរុញប្រតិបត្តិការតាមព្រំដែនជាពិសេសគឺការដោះស្រាយបញ្ហាព្រំដែនដែលនៅសេសសល់ជាមួយនឹងប្រទេសជិតខាងឡាវនិងវៀតណាមឲ្យបានឆាប់។ទី៤.ជំរុញកិច្ចសហប្រតិបត្តិការគ្នាលើវិស័យ សេដ្ឋកិច្ច ពាណិជ្ជកម្មវិនិយោគ ទេសចរណ៍ និង វប្បធម៌ជាមួយនឹងប្រទេសជិតខាងទាំងពីរ ជាពិសេសជំរុញវិស័យឯកជននៃប្រទេជិតខាងឲ្យមានកិច្ចសហការគ្នាល្អ។ ទី៥.ជំរុញការតភ្ជាប់ជាមួយប្រទេសជិតខាងតាមរយៈការកសាងហេដ្ឋារចនាសម្ព័ន្ធផ្លូវគោក និង តាមរយៈការភ្ជាប់ជើងហោះហើរនិងផ្លូវទឹក និង ការភ្ជាប់ទំនាក់ទំនងរវាងប្រជាជននិងប្រជាជន រួមទាំងការសហការលើវិស័យថាមពលដែលកម្ពុជានឹងបន្តទិញថាមពលពីឡាវនិងវៀតណាមពេលពី៥ទៅ១០ឆ្នាំបន្តទៀត ។ ជា មួយគ្នាននេះសម្ដេចក៏បានស្នើឲ្យវៀតណាមនិងឡាវទិញភ្លើងពីប្រទេសកម្ពុជាទៅវិញផងដែរ ដែលនេះគឺជាការផ្លាស់ប្តូរពាណិជ្ជកម្មរវាងប្រទេសជិតខាងភូមិផងរបងជាមួយ ។ ទី៦-ទស្សនកិច្ចផ្លូវការរបស់សម្ដេចតេជោនាយករដ្ឋមន្ត្រីទៅកាន់ប្រទេសឡាវនិងវៀតណាមបានចូលរួមវិភាគទានយ៉ាងសំខាន់ក្នុងការពង្រឹងពង្រីកទំនាក់ទំនងគឺខ្លាចបាត់ការទ្វេភាគីលើគ្រប់វិស័យជាពិសេសការចូលរួមជាមួយកិច្ចសហប្រតិបត្តិការជាមួយប្រទេសទាំងពីរនៅក្នុងអនុតំបន់និងក្នុងតំបន់ផងដែរ៕
Source: Kampuchea Thmey Daily
0 Comments